بەلگىلى تەلەجۇرگىزۋشى، سوڭعى كەزدەرى باسى داۋعا قالىپ جۇرگەن امان تاسىعان مۇحتار شاحانوۆپەن سۇقباتىن Youtube ارناسىنا جاريالادى. اتالعان سۇحبات كەزىندە تانىمال اقىن مۇحتار شاحانوۆ ديماش قونايەۆپەن بىرگە نە ءۇشىن جىلاعانىن ايتتى دەپ جازادى Qamshy.kz اقپارات اگەنتتىگى. 

«مەن سسر حالىق دەپۋتاتى ەدىم. ەكى ادام ماعان ارىز ايتىپ كەلدى. تاشكەنتتىڭ شىعىسىندا بوستاندىق اتتى اۋدان بولاتىن. بۇل قازاقتىڭ اۋدانى ەدى. سول جەردى 25 جىل وزبەكتەرگە جالعا بەرگەن ەكەن. جەردى جالعا بەرۋ مەرزىمىنەن ءوتىپ كەتىپتى. كەيىن مەن ارىزدى تەرەڭىرەك زەرتتەۋ جۇرگىزۋ ءۇشىن دىنمۇحاممەد قونايەۆقا باردىم. اعاعا بارلىق جاعدايدى ءتۇسىندىردىم. سوسىن، ديمەكەڭ ماعان بۇل جايتقا قاتىستى 67 قاعاز بارىن ايتىپ، كەلەسى كۇنى سول قاعازداردى ماعان اكەلىپ بەردى. ديمەكەڭ ماعان «ءسىز بوستاندىق اۋدانىنا بارىپ، وسى ماسەلەنى زەرتتەڭىز، كوپ ماسەلەگە كوزىڭىزدى جەتكىزىڭىز»، دەپ ايتتى. ءسويتىپ، مەن بوستاندىق اۋدانىنا باردىم. سول اۋداندا تۇراتىن زيالى ادام بار ەكەن، مەنى سول ۇيگە الىپ باردى. مەن ۇيىنە بارعان ادامنىڭ نەمەرەسى مە، بالاسى ما بىلمەدىم بىرنەشە بالا ساباقتان كەلدى. بارلىعىنىڭ باسىندا وزبەكتىڭ تاقياسى بار، بالالار وزبەكشە سويلەسىپ ءجۇر. سودان كەيىن مەن بىرەۋىنەن وزبەكسىڭ بە، قازاقسىڭ با دەپ سۇرادىم. ولار «اكەم — قازاق، مەن —وزبەكپىن»، — دەپ جاۋاپ بەردى. بۇل اۋداندا قازاق بالالار وزبەكشە وقىماسا ولاردىڭ اتا-اناسىنا، وتباسىنا قىسىم جاسايدى ەكەن. وسىنداي ماسەلەلەردىڭ بارلىعىن زەرتتەپ ەلگە قايتتىم. سول كەزدە پارلامەنتتىڭ باستىعى سەرىكبولسىن ءابدىلدين بولاتىن. وعان وسى جاعدايدى ءتۇسىندىردىم. مەن بايانداما جاسادىم. پارلامەنت تۇگەل قولداپ، شەشىم شىعاردى. مەن سول شەشىمدى وزبەكستاننىڭ پرەزيدەنتىنە جىبەردىم. كەيىن سول كەزدەگى باسشىلاردىڭ بىرىمەن وزبەكستاننىڭ پرەزيدەنتى جولىعىپ، «شەكارا ءقازىر قالاي بولسا سول كۇيىندە قالسىن»، دەگەنگە قول قويدىرىپ جىبەرىپتى. سوندا ءبىز، قونايەۆ ەكەۋمىز ەڭكىلدەپ ءتۇرىپ جىلاعانبىز. ال بۇنى جۇرتتار بىلمەيدى»، دەپ ەسكە الدى مۇحتار شاحانوۆ. 

سونىمەن بىرگە مۇحتار شاحانوۆ ۇلتقا، تىلگە قاتىستى ءوز پىكىرىن ءبىلدىرىپ، شىندىعىنان ايىرىلعان ادامدى ادام قۇرلى كورمەيتىنىن، ارالاسقىسى دا، سىيلاسقىى دا كەمەيتىنىن ايتىپ ءوتتى. 

سونىمەن بىرگە اقىننىڭ شامىنا ءتيىپ، جاۋاپ بەرگىسى كەلمەگەن سۇراقتار دا بولدى. ونىڭ ءبىرى «سوڭعى رەت ەلباسىمەن قاشان كەزدەستىڭىز؟» دەگەن ساۋال قويىلدى. مۇحتار شاحانوۆ ەلباسىنىڭ كەزدەسۋگە شاقىرعانىن، الايدا ءوزىنىڭ باس تارتقانىن ايتتى. ءبىراق «ەلباسىمەن كەزدەسسەڭىز قانداي سۇراق قويار ەدىڭىز؟»، دەگەن سۇراققا «ونىڭ نە كەرەگى بار؟ قاجەتى جوق. الىپ تاستا»، - دەپ قىسقا قايىردى. 

ءجۋرناليستىڭ «سوڭعى رەت قاشان سەزىممەن قاشان ولەڭ جازدىڭىز؟» دەگەن ساۋالىنا دا اقىن نەگە ەكەنى بەلگىسىز جاۋاپ بەرگىسى كەلمەدى. «ماحاببات تۋرالى ولەڭدەرىم بار عوي»، - دەپ قويا سالدى.