پاۆلودارلىق ءتىل جاناشىرى رۋزا بەيسەنبايتەگى رەداكسيامىزعا حابارلاسىپ، وزىنە كۇش قولدانىلعانىن ايتتى. قوعامدىق ورىنداردا قازاق تىلىندە قىزمەت كورسەتۋدى سۇراعان  تۇرعىنعا كۇش قولدانىلسا دا،  جەرگىلىكتى پوليسيا قول ۇشىن سوزباعان كورىنەدى. بۇگىن 13 جىل بويى قازاق ءتىلى ءۇشىن كۇرەسىپ كەلە جاتقان رۋزا بەيسەنبايتەگى اكسياعا شىقپاق.

— بۇگىن «باقاۋوۆ، قازاق ءتىلىن قورلاتپا!» دەگەن ۇرانمەن اكسياعا شىعامىن. سەبەبى پوليسيا ەشتەڭە ىستەمەي وتىر. وسىدان ءبىراز ۋاقىت بۇرىن جاسقايرات قايىروۆ دەگەن جەرگىلىكتى پوليسيا باسشىسى «ءبىز بارلىق پوليسيا قىزمەتكەرلەرىن شاقىرىپ بارلىق تۇرعىن قازاق تىلىندە سويلەۋگە، قازاق تىلىندە جاۋاپ الۋعا قۇقىلى ەكەنىن ايتامىز. تىلگە بايلانىستى داۋ شىقسا، وقيعا ورنىنان بارىپ شەشەمىز»، - دەپ ايتقان بولاتىن.  ارادا  ءبىر اپتا وتسە دە،  ەشقانداي ناتيجە بولعان جوق، - دەيدى رۋزا بەيسەنبايتەگى.

ءتىل جاناشىرىنىڭ ايتۋىنشا، جەرگىلىكتى بيلىك پەن جەرگىلىكتى پوليسيا قۇرعاق سوزبەن جىلى جاۋىپ قويۋعا  ۇيرەنگەن. پاۆلودار وبلىسىنىڭ اكىمى بولات باقاۋوۆقا ەكى رەت تەلەفونوگرامما جىبەرگەنىن دە ايتتى.

— باقاۋوۆقا ەكى رەت تەلەفونوگرامما تاستادىم. ەكەۋى دە قوعامدىق كولىكتە ايالدامالاردى، جول اقىسىن تولەۋدى قازاق تىلىندە ايتۋدى سۇراعانىما بايلانىستى.  بىرىنشىسىندە ەگەر پوليسيا قىزمەتكەرلەرى كەلمەسە، اۆتوبۋستىڭ استىنا تۇسەمىن دەپ ايتتىم. ال ەكىنشىسىندە اكسيا جاساعالى جاتقانىمدى حابارلادىم»، - دەيدى رۋزا بەيسەنبايتەگى.  

ايتا كەتسەك، وسىدان اي بۇرىن رۋزا بەيسەنبايتەگى رەداكسيامىزعا حابارلاسىپ، اۆتوبۋس كوندۋكتورىنان جولاقىسىن  قازاق تىلىندە سۇراۋدى وتىنگەن. ارتىنشا ءىس ناسىرعا شاۋىپ، پوليسيا قىزمەتكەرلەرى كەلمەسە، اۆتوبۋستىڭ استىنا تۇسەتىنىن ايتقان ەدى.

رۋزا بەيسەنبايتەگىنىڭ ايتۋىنشا، ونىڭ اكسياعا شىققاننان باسقا امالى قالماعان. جەرگىلىكتى پوليسيا وبلىسى اكىمىنە باعىنىشتى، ونىڭ سوزىنەن اتتاپ شىعا المايدى.

— قولىمدا قازاق تىلىندە قىزمەت كورسەتۋىن سۇراعانىم ءۇشىن مەنى اۆتوبۋستان سۇيرەپ شىعارعان، تەلەفونىمدى تارتىپ العان ۆيدەولار بار. مەن سول ۆيدەولاردى پوليسياعا كورسەتكىم كەلدى. الايدا مەنى مازاق قىلعان ادامشا ءۇش پوليسيا كولىگى جانىمنان ءوتتى. مەندە ونىڭ دا ۆيدەوسى بار. ءبىر ساعاتتان كەيىن ايالدامادان 100 مەتر جەرگە پوليسيا كولىگى كەلىپ توقتادى. بارىپ، ءمان-جايدى ايتقانىمدا، «بىزگە ەشقانداي تاپسىرما بەرىلگەن جوق، ەشتەڭە ىستەي المايمىز»، - دەپ ايتتى، - دەيدى رۋزا بەيسەنبايتەگى.

— مەن وسىلاي ەتپەسەم، ءبىز وسىلاي ەتپەسەك قازاق ءتىلى قورلانا بەرەدى، - دەپ كۇيىنىشپەن اياقتادى ءسوزىن رۋزا بەيسەنبايتەگى.