الماتى وبلىسىنىڭ تالعار اۋدانىندا ءۇش جاسار بالانى ازاپتاعان كۇتۋشى ايەلگە ۇكىم شىقتى، دەپ حابارلايدى Qamshy.kz اقپارات اگەنتتىگى  قازاقپارات مالىمەتىنە سۇيەنىپ.

جەرگىلىكتى تۇرعىنداردىڭ ۇيىنە كۇتۋشى بولىپ جۇمىسقا ورنالاسقان كەلىنشەك ءۇش جاسار بالامەن جالعىز قالعان كەزدە وعان ايعايلاعان، ۇرىپ-سوققان. ول تۋرالى بالانىڭ اكە-شەشەسى ۇيگە ورناتىلعان بەينەباقىلاۋ كامەراسىنان بىلگەن.

— سوتتالۋشى ءوز ايىبىن مويىندادى. سوتتىڭ شەشىمىمەن ق ر قك 110-بابى، 2-بولىگى، 1-تارماعىنا («كورىنەۋ كامەلەتكە تولماعان ادامعا قاتىستى ۇدايى ۇرىپ-سوعۋ نەمەسە وزگە دە كۇش قولدانۋ ارەكەتتەرى») سايكەس، ءۇش جىلعا باس بوستاندىعىنان ايىرۋ جازاسىنا كەسىلدى، - دەلىنگەن ۇكىمدە.

وبلىستىق سوت وكىلدەرىنىڭ ايتۋىنشا، ول جازاسىن قىلمىستىق-اتقارۋ جۇيەسىنىڭ ورتاشا ءقاۋىپسىز مەكەمەسىندە وتەيدى.