قازاقستاندا مەملەكەتتىك ساياسي قىزمەتشىلەر سانى 8 ەسەگە ازايادى. بۇل تۋرالى بۇگىن استانادا وتكەن مەملەكەتتىك قىزمەت ىستەرى اگەنتتىگى جانىنداعى مەملەكەتتىك قىزمەتتى جەتىلدىرۋ ماسەلەلەرى جونىندەگى ساراپتامالىق كەڭەستىڭ توعىزىنشى وتىرىسىندا ايتىلدى.جيىن بارىسىندا اگەنتتىكتىڭ ءتوراعاسى ءاليحان بايمەنوۆ 26 ناۋرىزدا قر-دا مەملەكەتتىك قىزمەتتىڭ جاڭا مودەلى جۇمىس جاسايتىندىعىن ايتتى. بۇل رەتتە مەملەكەتتىك قىزمەت تۋرالى زاڭعا وزگەرىستەر ەنگىزىلەتىن بولادى. «- ءبىز زاڭعا ەنەتىن وزگەرىستەردىڭ نەگىزگى قاعيداتتارىن وتكەن سەگىز باسقوسۋدا تالقىلادىق. مەملەكەتتىك قىزمەتتى جەتىلدىرۋ ءۇشىن زاڭعا وزگەرىستەردىڭ ەنگىزىلگەنى دۇرىس. سەبەبى ءقازىر كەيبىر باسشىلار قىزمەتىن اۋىستىرعاندا ىزىنەن ءوزىنىڭ «كومانداسىن» جينايدى، ەكىنشىدەن، ءالى دە بولسا مەملەكەتتىك قىزمەتكەرلەرگە ادەپتىلىك جانە جەمقورلىق تۇرعىسىنان العاندا، كەيبىر تالاپتاردىڭ ورىندالماۋى كورىنىپ جاتادى. ۇشىنشىدەن، مەملەكەتتىك قىزمەتكەرلەردىڭ كاسىبي دەڭگەيى مەن مەملەكەتتىك قىزمەتتىڭ كورسەتۋ ساپاسىن كوتەرۋ كەرەك»، - دەدى ءا.بايمەنوۆ. سونىمەن قاتار اگەنتتىك ءتوراعاسى الداعى ۋاقىتتا مەملەكەتتىك ساياسي قىزمەتشىلەر سانى 8 ەسەگە قىسقاراتىنىن جەتكىزدى. «الەمدىك تاجىريبە نەگىزىندە، ەلىمىزدەگى 3300-گە جۋىق ساياسي قىزمەتكەرلەر سانى 400-گە قىسقارتالادى.، - دەدى ول. http://www.baq.kz