شەيح ءابساتتار  قاجى دەربىسالىنىڭ   ءمۇفتياتتى  باسقارعان  تۇسى  حالىقتىڭ دىنگە بەتبۇرىسى كەرەمەتتەي اۋجالعان  ءبىر كەزەڭ بولدى. سونىمەن قاتار،  بۇل كەزەڭدە ەلدەگى  ءدىن  ەركىندىگىن  ارام پيعىلمەن  پايدالانىپ،  قوعامعا  زيان كەلتىرەتىن   كەرى  ءدىني اعىمداردىڭ   تارالۋى  اشكەرەلەنىپ،  ولارمەن كۇرەسۋ  شارالارىنىڭ  قولعا  الىنعان كەزەنiن وتكەردى.  الايدا،  بۇل  مەملەكەتتىك ءدىني باسقارمانىڭ  ءىسى  ەمەس ەدى.  ول  اتا زاڭىمىزدا  رۇقسات  ەتىلگەن  "ەركىندىكتىڭ" تەرىس  ناتيجەسى بولاتىن. ال وسى  ورايدا، ءدىني باسقارما شاما-شارقىنشا  ءوزىنىڭ قۇقىعى كولەمىندەگى ىستەردەن  ەش اقاۋ شىعارماي،  جەمىستى  اتقاردى.  مۇنى   يمامداردىڭ سارالانۋىنان، تالدانىپ قويىلا باستاۋىنان، ءدىني باسقارمانىڭ  بەت-بەدەلىنىڭ حالىق الدىندا   كۇننەن-كۇنگە كوتەرىلۋىنەن ايقىن كورۋگە بولادى. ءدىني سايتتار قاتارىنىڭ مولىعۋى  جانە ونىڭ كاسىپتىك دەڭگەيىنىڭ ءسات ساناپ ءوسۋى – باسقارما  جۇمىسىنىڭ  دۇرىس  جۇزەگە اسىرىلۋىنان بولسا  كەرەك.  بۇل كەتكەلى وتىرعان مۇفتيگە وڭ  باعامىزدى بەرۋىمىز   ودان  ءبىر نارسە دامەتۋ ەمەس، قايتا ەتكەن ەڭبەگىن لايىقتى باعالاۋىمىز! انىق باعا،  ارينە  ءبارىن ءبىلۋشى،  شىنايى ءادىل باعالاۋشى اللاھ تاعالانىڭ قۇزىرىندا!

سونىمەن قاتار،   ءبىز   كەلەر  مۋفتيدەن  كوپ يگى  جاقسىلىق  كۇتەمىز! ويتكەنى بۇگىنگى  تاڭدا ەلىمىزدىڭ  ءدىن  سالاسىندا  كۇرمەۋى  قيىن  كوكەيتەستى  ماسەلەلەر  جەتەرلىك.  ونىڭ ءبىرىنشىسى  ارينە،   "اعىمداردىڭ"  كوبەيۋى.  جاڭا ءمۇفتي  سان ساققا  شاشىراپ،  باستارى قوسىلماي  كەتكەن  وسى توپتاردىڭ باسشىلارىن  ءبىر  ورتالىققا   توعىستىرسا،  ولاردى  قوعامعا  زالال كەلتىرمەيتىن  ورتاق مامىلەگە كەلتىرسە. ءبىر سوزبەن ايتقاندا،  اعىمداردى  «اۋىزدىقتاۋعا» كىرىسكەنى ءجون دەر ەدىك!

ەكىنشى، "ءدىن زاڭىنا" وزگەرىستەر مەن تولىقتىرۋلار ەنگىزىلگەنى  ءجون. زاڭداعى   بۇل جاڭالىقتار  ەلدىڭ  ءدىن ىسىنە تولىق جاۋاپ بەرەتىندەي دەڭگەيدە بولسا، زاڭ   حالىقتىڭ  يگىلىگى  ءۇشىن  قىزمەت ىستەيتىندەي  تياناقتالسا!

ءۇشىنشى، ەلىمىزدەن شەتەلدەن ءدىن ءىلىمىن وقيتىن وقۋشىلاردىڭ قاي ەلدە، قانداي  ءبىلىم الىپ  جاتقاندىعىن   باقىلاپ  وتىرۋ  قاجەت.  سوندىقتان،  ءدىني  ءبىلىم  بەرۋدى  باسقارما ءوز قولىنا الۋى كەرەك.  ايتپەگەندە،  شەتەلدە  بەلگىسىز  باعىتتا   ءبىلىم الىپ،  ەلىمىزگە كەلىپ  دىنگە  جات پىكىر تاراتاتىندار ەسەبىنەن  اعىمداردى تەجەۋ قيىنعا  تۇسەتىن بولادى.

ءتورتىنشى، مەملەكەتتىڭ يمامدارعا ەڭبەكاقى تاعايىنداۋ   ماسەلەسى  ءوز شەشىمىن تابۋى قاجەت.  مەملەكەت  ءدىن "ساياساتتان تىس" ەكەنىن  العا تارتۋى  مۇمكىن. دەي تۇرعانمەن، ءقازىردىڭ وزىندە ول ساياسات قاعاز جۇزىندە قالىپ وتىرعانى دا شىندىق. ويتكەنى، ءدىن ساياساتتان تىس بولعانىمەن،  جۇرەگىنىڭ ىشىندە  بولادى عوي.  دەمەك، ءدىن ءىسى قانشا ساياساتتان تىس  بولعانىمەن،  مەملەكەت ونى بەلگىلى مولشەردە قاداعالايتىنى ءسوزسىز. ءدىني  قىزمەتكەرلەرگە  مەملەكەت  كوز  قىرىن سالسا كەرەك.

بەسىنشى، قازىرگى جۇزەگە اسىرىلىپ جاتقان  تۇتاس ەلدى ءبىر عانا ءمازھابتى  ۇستانۋعا  كوشىرۋ  ماقساتى تۇبەگەيلى ىسكە  اسقانعا  دەيىن  بۇل  جايتتى  جۇيەلى ءارى جاۋاپكەرشىلىكپەن   قاداعالاپ وتىرۋدى ءبىر ساتكە دە نازاردان تىس قالدىرماۋ كەرەك.

التىنشى، يمامداردىڭ  حالىقپەن جۇمىس ىستەۋىنە  كوڭىل بولىنسە.  يمامداردىڭ مەكتەپتەرمەن، قوعام مۇشەلەرىمەن تىعىز بايلانىستا بولۋلارىن  مىقتاپ  قاداعالاعان ءجون.

ەڭ سوڭىندا ايتارىمىز، ءدىني باسقارما مۇشەلەرى جانە يمامدار باسپاسوزدەن  ۇنەمى  كورىنىپ،  كوپشىلىكتىڭ  كوكەيىندەگى  سۇراقتارعا  جاۋاپ  بەرىپ  وتىرۋعا  ۇمتىلۋى  لازىم. ءتىپتى وسى باسقارمانىڭ تىكەلەي ءوز قۇزىرىمەن تاراتىلاتىن  تەلەارنا اشىلسا.  بۇل دا  وتە وزەكتى  ماسەلەلەردىڭ  ءبىرى.

 بىزدەگى قوعامدىق تالاپ − وسى.  كىسىلىك ءۇمىت! جالعاستى «جاقسى بولساقتىڭ»  جانايعايى.

قۇل-كەرىم  ەلەمەس

"قامشى"  سىلتەيدى