الماتىدا دارىگەردىڭ بالاسى جانۇر بايقونىستى ءولتىردى دەگەن كۇدىكتىنىڭ تۋىستارى ارتى ولىمگە اكەلگەن جانجالدىڭ سەبەبىن ايتىپ بەردى، - دەپ حابارلايدى Qamshy.kz اقپارات اگەنتتىگى Tengrinews.kz سايتىنىڭ دەرەگىن نەگىزگە الىپ. 

15 جاستاعى كۇدىكتىنىڭ تۋىستارىنىڭ ايتۋىنشا، "سپۋتنيك" ويىن-ساۋىق ورتالىعىنىڭ ماڭىنداعى جانجال جينالماعان ىدىس ءۇشىن جانۇر بايقونىسپەن سالعىلاسىپ قالعاننان كەيىن باستالعان. 

"شامامەن 10 كۇن بۇرىن بالام اكۆاپاركتەن كەيىن ءۇش دوسىمەن ءبىر دوسىنىڭ ۇيىندە تۇسكى اس ىشكەن. كەيىنىرەك ۇيگە جانۇر كەلىپ، بالالاردى ءوز ارتىنان ىدىستى جۋماي كەتكەنى ءۇشىن "جازالاعىسى" كەلگەن. ءبىراق ولار ءبىزدىڭ ۇيدە دە، باسقا ۇيدە دە اس ىشەدى عوي، بالالار ەمەس پە"، - دەيدى كۇدىكتىنىڭ وتباسىنداعىلار.

ولاردىڭ ايتۋىنشا، ناتيجەسىندە شۋ شىعىپ، بالالار بىر-بىرىنە جۇدىرىق الا جۇگىرگەن.

"ۇلىم 9-سىنىپ بىتىرگەن، ال جانۇر 11-سىنىپتى ءبىتىردى. جانۇر ءبىرىنشى بولىپ، ءبىزدىڭ بالانى قۇلاتقان. كەيىن بالام بىزگە "مەن قالاي ەكەنىن بىلمەيمىن، قۇلادىم" دەپ ايتتى. جۇرەگىم ءقازىر ەكىگە ايىرىلاتىنداي. 15 جاستاعى بالانى قاماپ قويدى، بارلىق ءومىرى قۇرىدى. الدەقايداعى تاماق، ىدىس ءۇشىن... بالالار سونداي اشۋشاڭ"، - دەيدى كۇدىكتىنىڭ تۋىستارى.

كۇدىكتىنىڭ وتباسىندا ءۇش بالا بار ەكەن: تۇڭعىش ۇلى مەن ەكى قىزى. كۇدىكتى وقىعان № 13 مەكتەپتەگىلەر بالا جايلى جاعىمدى پىكىر ايتقان. ساباعىن جاقسى وقىعان، مەكتەپتەن ءجيى قالماپتى، 9-سىنىپتان كەيىنگى ەمتيحاندارىن 4 پەن 5-كە تاپسىرىپتى.

ەسكە سالساق، الماتىدا "اقساي" ۋنيۆەرسيتەتى كلينيكاسى باس دارىگەرىنىڭ ورىنباسارىنىڭ ۇلىن بىرەۋلەر ءولتىرىپ كەتتى دەپ حابارلانعان بولاتىن. كەيىنىرەك الماتى پوليسەيلەرى كۇدىكتىنى ۇستادى، ول كىناسىن مويىندادى.  مارقۇمنىڭ مۇعالىمدەرىنىڭ ايتۋىنشا، جانۇر بايقونىس الماتىداعى № 173 ليسەيدە وقىعان بالامەن توبەلەسكەن. ول سابىرلى، سالماقتى بولعانىن جانە قىتايلىق جوو-عا ءتۇسۋدى جوسپارلاعانىن، بىرنەشە ءتىل بىلەتىنىن ايتىپ وتىر. جانۇر بايقونىس ۇبت تاپسىرۋدان باس تارتىپ، قىتايعا كەتكىسى كەلىپتى. پەداگوگتار قاقتىعىس سەبەبى بەلگىسىز ەكەنىن ايتادى.