بالۋان مەيرامبەك ايناعۇلوۆقا ءۇمىت ارتقانىن جاسىرماعان بەردىبەك ساپاربايەۆ ونىڭ قولا مەدال تاققانىن قىنجىلىسپەن جەتكىزدى. وبلىس باسشىسى وڭىردەگى سپورتتىڭ تومەن دەڭگەيدە دامىپ جاتقانىنا كۇيىنىپ وتىر دەپ جازادى Qamshy.kz اقپارات اگەنتتىگى Aktobenews.kz سايتىنىڭ دەرەگىن نەگىزگە الىپ.
بۇگىن اقتوبە وبلىسى اكىمىنىڭ توراعالىعىمەن وڭىردەگى سپورتتىڭ دامۋ ماسەلەسى قارالدى. بەردىبەك ساپاربايەۆ سپورت ءبولىمى مەن فەدەراسيا باسشىلارىن اياماي سوكتى.
«ءۇش جىلدىڭ ىشىندە ءبىر ەمەس، بىرنەشە رەت كەزدەستىك. ءبىراق تالاي ايتىلسا دا، وكىنىشكە قاراي، سپورتتاعى جەتىستىكتەرىمىز وتە ناشار. سوڭعى ءۇش جىلدىڭ ىشىندە وليمپيادا ويىندارى قاتارىنا كىرەتىن سپورتتان ءبىر دە ءبىر الەم نە ازيا چەمپيونى جوق!»، — دەدى وبلىس باسشىسى.
بەردىبەك ساپاربايەۆ سوڭعى ازيا ويىندارىنىڭ ناتيجەسىنە ريزا ەمەس. اقتوبە قازاقستان بويىنشا سوڭعى ورىندا تۇر.
«ازيا ويىندارىنا بىلتىر 4، وسى جىلى 8 سپورتشى جىبەردىك دەپ ماقتانامىز. ايناعۇلوۆقا ءۇمىت ارتتىق، ءبىراق ول قولا الدى. ءجۇزۋشىمىز اقتىق توپقا دا كىرمەدى. مىنە، ءبىزدىڭ جۇمىسىمىزدىڭ ناتيجەسى!»، — دەدى وبلىس اكىمى.
بەردىبەك ماشبەك ۇلى سپورتشىلاردىڭ ىرىكتەلۋىنە توقتاپ، ونداعى ءادىل تاڭداۋعا كۇمان ءبىلدىردى.
«جارىستارعا «بلاتپەن» باراتىن سياقتى. ەگەر جاقسى سپورتشىلار ىرىكتەلگەندە، مۇنداي ناتيجە بولماس ەدى. ءار ءتۇرلى وقۋ جاتتىعۋ جيىندارىنا ميلليونداعان اقشا ءبولىنىپ جاتىر. ءبىراق سول جيىنداردىڭ ءبىر دە ءبىر قاتىسۋشىسى قازاقستان، ازيا چەمپيوناتتارىندا ورىن المايدى. جيىنعا 30 ادام قاتىستى دەپ ەسەپتە جازادى. ءبىراق شىنىمەن ودان دا از ادام قاتىسادى. ءبىر سوزبەن ايتقاندا، سپورتقا ءبولىنىپ جاتقان قاراجاتىمىز بەن كوڭىلىمىز اقتالماي جاتىر»، — دەدى بەردىبەك ساپاربايەۆ.
