جاكارتادا ءوتىپ جاتقان ازيا ويىندارىندا ريو وليمپياداسىنىڭ كۇمىس جۇلدەگەرى ەلدوس سمەتوۆتى جارىستان كەيىن اۋرۋحاناعا الىپ كەتتى، دەپ جازادى Qamshy.kz اقپارات اگەنتتىگى قازاقپارات سايتىنا سىلتەمە جاساپ.
ق ر ۇلتتىق وليمپيادالىق كوميتەتىنىڭ باسپا ءسوز قىزمەتىنىڭ حابارلاۋىنشا، دزيۋدودان قازاقستان كومانداسىنىڭ كوشباسشىسى ەلدوس سمەتوۆ جاكارتادا اۋرۋحاناعا جەتكىزىلدى. ءبىرىنشى اينالىمدا قارسىلاسىن ايقىن باسىمدىقپەن جەڭگەن ەلدوس ەكىنشى كەزدەسۋدە سولتۇستىك كورەيا بالۋانىنان ەسكەرتۋ سانىمەن ۇتىلعان بولاتىن. وسى جەكپە-جەكتەن سوڭ ەلدوس سمەتوۆتى اۋرۋحاناعا الىپ كەتتى.
«جاڭا عانا ەلدوستى جەدەل جاردەممەن اۋرۋحاناعا الىپ كەتتى. رەنتگەننەن وتكىزەدى. ەكىنشى بەلدەسۋ كەزىندە جاراقات العان. وڭ جاق قابىرعاسى سىندى دەگەن بولجام بار»، - دەيدى دزيۋدودان قازاقستان كومانداسىنىڭ دارىگەرى ناتاليا كۋداشيەۆا.
ايتا كەتەلىك، ەلدوس سمەتوۆ جۇبانىش بەلدەسۋىنە دە شىققان جوق.
