وسى جىلى وتاندىق جۇلدىزدار ەما پرەمياسىن ەلوردا تورىندە اتاپ ءوتتى. 7ء-شى مارتە ۇيىمداستىرىلعان جوبادا شوۋ-بيزنەس وكىلدەرى ادەتتەگىدەي قىزىل كىلەممەن ءجۇرىپ ءوتىپ، ماراپاتتاۋ راسىمىندە 15-تەن استام نوميناسيانى ءوزارا بولىسكە سالدى. «سامايا ۆىشكا» ترەگى ارقىلى تانىلعان ارتۋر مەن رايىم، «جىل جاڭالىعىمەن» قاتار «عالامتور تاڭداۋى» سىندى نوميناسيانى جەڭىپ الدى.

قانجىعاسى قوس بىردەي جۇلدەمەن مايلاعان مۋزىكانتتاردىڭ قاتارىندا – ناينتي ۋان ۇجىمى دا بار. اتالمىش بەستىكتىڭ «اياما» كليپى ساپالى بەينەبايانداردىڭ كوشىن باستاسا، سۋ جاڭا نوميناسيا «ۇزدىك كيۋ-پوپ ءارتىسى» مۇسىنشەسى دە «91» توبىنا تابىستالدى.

«كيۋ-پوپ باعىتىنا 3-اق جىل بولدى. ءبىرىنشى قىركۇيەكتەن باستاپ 3 جىل بولۋى كەرەك. جالپى كيۋ-پوپ باعىتى مويىندالىپ، وعان رەسمي تۇردە نوميناسيا ۇسىنىلۋى ءبىزدى وتە قاتتى قۋانتادى. كيۋ-پوپ باعىتىن شىنىمەن دە بار دەپ ءبىز ايتا الامىز»، – دەيدى «Ninety one» توبى.

«ۇزدىك دۋەت» نوميناسياسى بايان الاگوزوۆا باسقاراتىن ورتالىققا بۇيىردى. قىزدار ۇجىمىنا حايپ سىيلاعان ترەك، جەڭىستى دە تارتۋ ەتتى.

كەشيۋدىڭ ەكس-مۇشەلەرى دە جۇلدەدەن قۇر قالعان جوق. نازىك جاندىلار اراسىنداعى «ۇزدىك ورىنداۋشى» نوميناسياسىنا، اتىشۋلى ۇجىمنىڭ التىن قۇرامى لايىق دەپ تاڭدالعان. الايدا، جانار دۇعالوۆا مەن ايدانا مەدەنوۆانى كامشات جولدىبايەۆا جولدا قالدىردى.

 «مەن شىنىمەندە جانارعا دا، ايداناعا دا ىشتەي جانكۇيەر بولىپ وتىردىم. قالاي بولعاندا دا، بۇل ۇلكەن جەڭىس»، – دەدى كامشات جولدىبايەۆا.

قايرات نۇرتاس – «ۇزدىك ورىنداۋشى»! حالىقتىڭ تاڭداۋىندا توپ جارعان حيتمەن، بۇل جولى ماراپاتىن ىنىسىنە تابىستادى.

«زاڭعارعا ايتارىم، بارلىعى اللانىڭ قالاۋىمەن. سوندىقتان العا باسا بەر. تىڭدايتىنداردى تىڭدا، تىڭدامايتىنداردى تىڭداما!»، – دەدى قايرات نۇرتاس.