استانا قالاسىنداعى اتىشۋلى №2 اۋرۋحانا باسشىلىعى قازاق ءتىلىن قورلاعاندارىن مويىنداپ، حالىقتان دا، ەمدەلۋشى مۇقاعالي بالقىبايەۆتان دە كەشىرىم سۇرادى. مۇنى Qamshy.kz اقپارات اگەنتتىگىنە اۋرۋحاناعا تىكەلەي بارىپ، باسشىلىقتان كەشىرىم سۇراتقان زاڭگەر جاسۇلان يسا راستادى.

بولعان جاعدايعا ءبىر كوز جۇگىرتىپ وتسەك... مۇقاعاليعا 27 تامىز قۇلاعىنا وپەراسيا جاساتىپ، سول كۇنى كەشكە «وتولارينگولوگيا» بولىمشەسىنىڭ 9-پالاتاسىنا جاتقىزىلعان. 28 تامىز پالاتاعا تازالىق ساقتاۋشى ورىس ايەل كىرىپ، ەمدەلۋشىلەرگە ورىسشا سويلەي باستايدى. مۇقاعالي ءوزىنىڭ ورىسشا تۇسىنبەيتىنىن ايتىپ، مەملەكەتتىك تىلدە سويلەۋىن تالاپ ەتەدى. الايدا ايەل قازاق تىلىندە سويلەي المايتىنىن ايتىپ، ەمدەلۋشىمەن سوزگە كەلىپ قالادى. ارتىنشا پالاتاعا دارىگەر اسحات نيكولايۇلىن ەرتىپ كەلەدى. «دارىگەرىم مەنى قورعايتىن شىعار» دەپ سەنگەن ەمدەلۋشىنىڭ ءۇمىتى اقتالمادى. ءمۇقاعاليدىڭ ايتۋىنشا، دارىگەر ەمدەلۋشىنىڭ وزىنە تاپ بەرگەن. ءتىپتى «قازاقشا سويلە دەپ قاقساي بەرسەڭ، اۋرۋحانادان شىعاسى، شىعارۋ تۋرالى انىقتامانى دا ورىس تىلىندە جازىپ بەرەمىن» دەپ «قوقان-لوقى» كورسەتكەن كورىنەدى.

مۇقاعاليمەن  تىلدەسكەن ءبىز كەيىن دارىگەرى اسحات نيكولاي ۇلىنىڭ دا پىكىرىنە قۇلاق اسپاق بولىپ، حابارلاستىق. ەمدەلۋشىسىنە، قالا بەردى مەملەكەتتىك تىلگە اراشا ءتۇسىپ، قولدايىن دەگەن دارىگەردى كورمەدىك. كەرىسىنشە، «50-دەن اسىپ قالعان تازالىق ساقتاۋشىعا قۇرمەتسىزدىك كورسەتتى» دەپ ءمۇقاعاليدىڭ ءوزىن ايىپتاي باستاعان ەدى. 

ال بۇگىن جانىنا ءبىر توپ جالىندى جاستاردى جيناعان جاسۇلان يسا اۋراحاناعا بارىپ، باسشىلىعىمەن دە، قىزمەتكەرلەرىمەن دە سويلەسىپ، ولاردىڭ ارەكەتتەرىنىڭ دۇرىس ەمەستىگىنە كوزدەرىن جەتكىزىپ كەلدى. 

زاڭگەردىڭ ايتۋىنشا، №2 قالالىق اۋرۋحانانىڭ باس دارىگەرى يۆان لي، ونىڭ ورىنباسارى، سونىمەن قاتار ءمۇقاعاليدىڭ دارىگەرى اسحات نيكولاي ۇلى دا قاتەلىكتەرىن مويىنداپ، ەمدەلۋشى مەن حالىقتان كەشىرىم سۇرادى.

مۇقاعاليعا حابارلاسقانىمىزدا، قۋانىشىندا شەك جوق ەكەنىن بايقادىق. وسى ءىستى قولىنا الىپ، سوڭىنا دەيىن جەتكىزگەن جۋرناليستەر مەن بەلسەندى جاستارعا زور العىسىن ءبىلدىردى.