بۇل تۋرالى 2018-2019 وقۋ جىلىنا دايىندىق تۋرالى باسپا ءسوز ءماسليحاتىن وتكىزگەن ق ر ءبىلىم جانە عىلىم ءمينيسترى ەرلان ساعادييەۆ مالىمدەدى، دەپ حابارلايدى  Qamshy.kz اقپارات اگەنتتىگى Baq.kz-كە سىلتەمە جاساي وتىرىپ.

"مينيسترلىك ءوز تاراپىنان پەداگوگتار تولتىرۋعا ءتيىس قۇجاتتاردىڭ تىزبەسىن العاش رەت بەكىتتى. ول تەك 5 قۇجات، ودان باسقا مۇعالىمدەردەن ەشقانداي ەسەپ، ەشقانداي قاعاز سۇرالماۋى ءتيىس. جاڭا وقۋ جىلىنان باستاپ ۇبت-عا قاتىسۋ مىندەتىنەن مۇعالىمدەردى بوساتۋ تالقىلانۋدا. مينيسترلىك ونى قولدايدى. ءمۇعالىم تەك ساپالى ءبىلىم بەرۋمەن اينالىسۋى كەرەك. مەكتەپتەردىڭ ۇبت بويىنشا رەيتينگىن دە الىپ تاستادىق" - دەيدى مينيستر.

سونىمەن قاتار مينيستر ۇستازدارعا تولەنەتىن جالاقى جانە اتتەستاتتاۋ بويىنشا قانداي جۇمىستار جۇرگىزىلىپ جاتقاندىعى تۋرالى ايتتى.

"بارلىقتارىڭىز بىلەسىزدەر، جاڭارتىلعان ءبىلىم بەرۋ مازمۇنى بويىنشا ساباق بەرەتىن 205 مىڭ (67%) ءمۇعالىمنىڭ جالاقىسى 30%-عا كوبەيدى. جانە بيىل پەداگوگتاردى اتتەستاتتاۋدىڭ جاڭا جۇيەسى ەنگىزىلدى. ول بىلىكتىلىك ساناتتارى ءۇشىن لاۋازىمدىق جالاقىعا 30-دان 50%-عا دەيىن قوسىمشا ۇستەماقىنى قاراستىرادى. اتتەستاتتاۋعا مامىر ايىندا 60 مىڭعا جۋىق ءمۇعالىم قاتىسىپ، ولاردىڭ ىشىنەن 36 مىڭنان استامى اتتەستاسيادان ءوتتى. ولار 63%-دى قۇرادى. وسى جىلدىڭ قىركۇيەك ايىنان باستاپ جاڭا اتتەستاسيا تارتىبىنەن وتكەن مۇعالىمدەرگە كاتەگوريالارىنا سايكەس قوسىمشا اقى تولەنەدى" - دەدى ەرلان ساعادييەۆ.

ءمينيستردىڭ ايتۋىنا قاراعاندا ۇستازداردى تەگىن كۋرسپەن قامتاماسىز ەتۋ ماسەلەسى دە دۇرىس جولعا قويىلعان.

"بيىلعى جىلى 110 مىڭنان استام پەداگوگ رەسپۋبليكالىق بيۋدجەت ەسەبىنەن بىلىكتىلىكتى ارتتىرۋ كۋرستارىنان وتۋدە. 8 مىڭنان استام ءپان ءمۇعالىمى جەكە پاندەردى اعىلشىن تىلىندە وقىتۋ ءۇشىن تىلدىك كۋرستاردا وقىپ جاتىر. ولاردىڭ 5 مىڭعا جۋىعى وسى وقۋ جىلىنان باستاپ ساباق بەرۋگە كىرىسەدى. «ۇستاز» ورتالىعى بارلىق وڭىرلەردە اعىلشىن تىلىندە ساباق بەرە باستايتىن ءتورت جارىم مىڭنان استام ءمۇعالىم ءۇشىن مەنتورلىق ارقىلى قولداۋ جاسايدى. ءبىر جىل بويى بۇل مۇعالىمدەردى تولىعىمەن قولداپ، ۇيرەتىپ، ساباقتارىنا قاتىسىپ، ناقتى كومەك كورسەتىلەتىن بولادى" - دەيدى ول.