29 تامىزدا استانادا «Chaplin» كينوتەاترىندا «قازاقستان» تەلەراديوكورپوراسياسىنىڭ كۇزگى تەليەۆيزيالىق ماۋسىمىنىڭ تانىستىرىلىمى ءوتتى، دەپ حابارلايدى Qamshy.kz اقپارات اگەنتتىگى.
شارادا «Qazaqstan»، «Qazsport» جانە «balapan» تەلەارنالارىنىڭ جەتەكشىلەرى جاڭا ماۋسىمداعى جوبالارمەن تانىستىرىپ، بولاشاقتاعى جوسپارلارىمەن ءبولىستى. سونىمەن، ادەتتەگىدەي قىركۇيەك ايىندا «Qazaqstan» ارناسىنىڭ جاڭا جوبالارى كورەرمەنگە جول تارتاتىن بولادى. ماسەلەن، تانىمال «QAREKET» توك-شوۋىنىڭ فورماتى وزگەرەدى. ەندى، بەيسەن قۇرانبەكپەن بىرگە باعدارلامانى جاڭا جۇرگىزۋشىلەر، تانىمال كاسىبي جۋرناليستەر: سەرىك ابىكەن، نۇربول باتىرباي، دوسان قىزايبەك جانە ەسبولات ايدابوسىن جۇرگىزەتىن بولادى. سونداي-اق، قىركۇيەك ايىندا كۇن سايىن شىعاتىن جاڭا وتباسىلىق «SHANYRAQ» توك-شوۋىنىڭ جۇرگىزۋشىسى جۇلدىز ابدۋكاريموۆا بولماق. ودان باسقا، سەنبىلىك ويىن-ساۋىقتىق «QAIYRLY KESH، QAZAQSTAN!»، دەنساۋلىق سالاسىن تالدايتىن «SHIPAGER» تانىمدىق باعدارلامالارى ۇسىنىلاتىن بولادى. تاعى دا ايتا كەتەتىن جاڭالىق، «JAN JYLYY» اتتى الەۋمەتتىك جوبا ەفيرگە قايتا ورالادى.
جاڭا ماۋسىم اياسىندا كورەرمەندەر «وتىڭدى وشىرمە»، «كۇي عۇمىر»، «كەيكى مەرگەن»، «ابىسىندار»، «جانىم مەنىڭ»، «راۋان»، «وسيەت»، «ارمانعا 20 قادام»، «شىراعىم» اتتى جاڭا وتاندىق تەلەحيكايالاردى، «جاڭا قونىس»، «كوزايىم» تۋىندىلارىنىڭ ءۇشىنشى ماۋسىمىن تاماشالايتىن بولادى. سونىمەن قاتار، دەرەكتى فيلمدەر تىزبەگى «ۇلى دالا ۇلاعاتى»، «كوشپەندىلەر»، «ۆيرتۋالدى سوعىستىڭ جازبالارى»، «اققان جۇلدىز» جانە ت.ب تۋىندىلارمەن تولىقتىرىلماق.
«Qazaqstan» جانە «Qazsport» ارنالارىنىڭ جاڭا تەليەۆيزيالىق ماۋسىمىنىڭ نەگىزگى جاڭالىعى - «Qazaqstan FIGHTER» بىرەگەي رەاليتي-شوۋى. جوبا ماقساتى - سپورت پەن باسەكەلەستىك رۋحتى، سالاۋاتتى ءومىر سالتىن دامىتۋمەن قاتار، MMA كاسىبي سپورت ءتۇرىن كەڭىنەن ناسيحاتتاۋ. مۇنداي بىرەگەي جوبا قازاقستاندىق تەليەۆيزيا نارىعىندا العاش رەت ۇسىنىلماق. ءادىلقازىلار قۇرامىن تانىمال سپورتشىلار، باپكەرلەر، وليمپيادا چەمپيوندارى قۇرايدى. ايتا كەتەيىك، «Qazsport» تەلەارناسى سپورت الەمىندەگى باستى جانە اۋقىمدى شارالاردى كورسەتۋدى جالعاستىرادى. جاقىن ارادا سپورتسۇيەر قاۋىم جانىبەك ءالىمحان ۇلىنىڭ جەكپە-جەگىن، ال جەلتوقسان ايىندا قانات يسلام جانە مەيىرىم نۇرسۇلتانوۆتىڭ قاتىسۋىمەن وتەتىن جەكپە-جەكتەردى تاماشالاي الادى. سونىمەن قاتار، تەلەكورەرمەندەر ادەتتەگىدەي چەمپيوندار ليگاسى مەن ەۋروپا ليگاسى، ۋەفا ويىندارىن، قحل ويىندارىن، «بارىس» حوككەي كلۋبىنىڭ ويىندارىن، قازاقستان پرەمەر-ليگاسىن، فۋتبولدان قازاقستان كۋبوگىن، كۇرەستەن جانە دزيۋدودان الەم چەمپيوناتتارىن كورەتىن بولادى. ودان بولەك، «Qazsport» تەلەارناسى ۇلتتىق سپورت تۇرلەرىن ناسيحاتتاپ قانا قويماي، كورسەتىلىمدەرىنىڭ كولەمىن ۇلعايتۋدى كوزدەپ وتىر. جاڭا ماۋسىمعا «balapan» ارناسى كىشكەنتاي كورەرمەندەرىنە كوپتەگەن انيماسيالىق سەريالدار، عىلىمي-تانىمدىق، ساۋىقتىق جوبالار توپتاماسىن دايىندادى. بيىلعى جىلى انيماسيالىق فيلمدەر كولەمى اناعۇرلىم ارتتى. تەلەارنا ءوز كورەرمەندەرىنە «ەرتەمىر»، «ايدار»، «دالا ويىندارى»، «شاحمات پاتشالىعى»، «قوڭىر قاز»، «ەركەلەر»، «بابالار ءسوزى»، «دارا تۇلعا»، «كەل، شىرقايىق» سياقتى 10 انيماسيالىق سەريال ازىرلەدى. سونىمەن قاتار، تەلەارنا كونتەنتى «بيلە، بالاپان»، «دوس بولايىق»، «ءاميان»، «كوكە»، «سىنىق سىنىپ» سياقتى جاڭا، قىزىقتى جوبالارمەن تولىقتى. تاعى ءبىر جاڭالىق، كۇزگى ماۋسىمدا «قازاقستان» تەلەراديوكورپوراسياسىنىڭ قۇرامىنا تاعى دا ءبىر جاڭا «Tamasha tv» تەلەارناسى قوسىلدى. تەلەارنا ەفيرى كورپوراسيانىڭ ىشكى تەلەونىمدەرىمەن تولىقتىرىلاتىن بولادى. ايتا كەتسەك، «ءازىل الەمى» «جايدارمان»، « حاحا-شوۋ»، «ءازىل Man»، «كوڭىلدى تاپقىرلار الاڭى»، «قىزىق ەكەن»، كومەديالىق تەلەحيكايالار جانە ت.ب.
«Tamasha TV» تەلەارناسىنىڭ ورتاشا تاۋلىكتىك حابار تاراتۋ ۋاقىتى 22 ساعاتتى قۇرايتىن بولادى. «Tamasha tv» ارناسى OtauTV جانە iDTV پاكەتتەرىندە HD فورماتىندا قولجەتىمدى بولماق. سونداي-اق، الداعى ۋاقىتتا باسقا دا كابەلدىك وپەراتورلاردا SD فورماتتا تاراتىلاتىن بولادى.
