سينوپتيكتەردىڭ مالىمەتتەرىنە قاراعاندا، قىركۇيەكتىڭ باسىندا ەلدىڭ سولتۇستىك، شىعىس جانە ورتالىق بولىكتەرىندە كۇن سۋىتادى. ەلدىڭ سولتۇستىگىندە 1-2، ورتالىقتا 2-3، شىعىستا 3-4 قىركۇيەك كۇندەرى تۇندە 1...6 گرادۋس نولدەن جوعارى، كەي جەرلەردە 3 گرادۋسقا دەيىن اياز بولىپ، كۇندىز 8...16 گرادۋس جىلى بولادى.

تەك باتىس جانە وڭتۇستىك وڭىرلەردە جاۋىن-شاشىنسىز ىستىق اۋا رايى ساقتالىپ، تەمپەراتۋرا 23...30 گرادۋس ارالىعىندا بولادى.

ەلدىڭ سولتۇستىك بولىگىندە قىركۇيەكتىڭ ورتالارى مەن ءۇشىنشى ونكۇندىگىندە جاۋىن-شاشىندى سۋىق اۋا-رايىنىڭ ەكى تولقىنى جۇرەدى. تۇندە ۇسىك جۇرەدى جانە جاڭبىر جاۋىپ ارتى قارعا ۇلاسادى. قالعان كۇندەرى قىسقا مەرزىمدى بولسا دا اۋا تەمپەراتۋراسى 15...25 گرادۋسقا دەيىن كوتەرىلەدى، ال وڭتۇستىكتە 23...30 گرادۋس ىستىق ساقتالادى.  

سونىڭ ناتيجەسىندە قىركۇيەك ايىنىڭ ورتاشا اۋا تەمپەراتۋراسى باتىس قازاقستان، اتىراۋ، ماڭعىستاۋ وبلىستارىندا كليماتتىق نورمادان 1 گرادۋس جوعارى، ال سولتۇستىك قازاقستان، اقمولا، پاۆلودار جانە شىعىس قازاقستان وبلىستارىندا 1 گرادۋس تومەن، قالعان وبلىستاردا نورماعا جۋىق بولادى. باتىس قازاقستان، اتىراۋ، ماڭعىستاۋ، اقتوبە، قىزىلوردا، وڭتۇستىك قازاقستان وبلىستارىندا ايلىق جاۋىن-شاشىن مولشەرى ازداۋ بولادى، قالعان وڭىرلەردە نورماعا جۋىق بولادى.