اقش پەن ەۋروپالىق وداق وسى جىلدىڭ اياعىنا تامان تاعى دا سانكسيالار سوققىلايدى. رۋبل ودان ارى تومەندەيدى. ءبىز دە تەڭگەنى تومەندەتۋگە ءماجبۇر بولامىز. باسقا جاعدايدا رەسەي تاۋارلارى ءبىزدى باسىپ كەتەدى، ءبىراق باتىس شەت ەلدىك تاۋارلارىن ساتىپ الۋ تىم قىمبات تۇسەدى.

اقش پەن ەۋروپالىق وداق رەسەيدى تولىق داعدارىسقا اپارىپ، كۇيرەتۋ ماقساتىن قويىپ وتىر. قىرىمدى ۋكراينادان تارتىپ الام دەگەن رەسەي ۇلكەن بالەگە قالدى. سونىمەن بىرىككەن باتىس ەلدەرى رەسەيدى ىدىراتۋ ماقساتىن قويماق. رەسەيدە ساياسي تياناقسىزدىق ءوسىپ كەلەدى. پۋتين جاقسى تاكتيك، ءبىراق ناشار ستراتەگ دەۋشى ەدى ساراپشىلار، ول راس بولىپ شىقتى. مەنىڭشە، سول قايراتكەردىڭ تاكتيكاسى دا، ستراتەگياسى بىردەي رەسەيدى قۇردىمعا جەتەلەپ كەلەدى.

بىرنەشە مىسال: ينتەرنەتتە ءپۋتيندى، ونىڭ ساياساتىن جامانداۋ كوبەيىپ كەلەدى. كوپ نارازىلىقتى پەنسيالىق رەفورما تۋعىزدى. شال-كەمپىرلەر شەرۋى ءالى توقتار ەمەس. وپپوزيسيالىق باعىتتاعى ساراپشىلار شەتەلدەن ازاماتتىق الىپ، تولىق پارمەنمەن ءپۋتيندى سىناۋدا. پۋتين ەكى سوعىس جۇرگىزىپ كەلەدى: شىعىس ۋكراينادا جانە سيريادا. ادام شىعىنىن ەسەپتەمەگەندە ميللياردتاعان دوللار شىعىن. رەسەيدىڭ ورىس حالقىنىڭ باسىم كوپشىلىگى ءالى ءپۋتيندى قولدايدى، ءتىپتى جاقسى كورەدى. ولار پۋتين قىرىمدى رەسەيگە قايتاردى دەپ وعان ءدان ريزا. ال مەنىڭ پىكىرىم، ورىس جۇرتشىلىعىنىڭ دا جۇيكەسى جۇقارىپ كەلەدى: نە ەليتارلىق توڭكەرىس، نە حالىق بۇلقىنىسى بولۋى ىقتيمال. قارا دا تۇر! رەسەيدەگى كەلەڭسىزدىكتەن ازاماتتىق سوعىس، بانديتيزم كوتەرىلۋى مۇمكىن.

رەسەيدە 800 مىڭعا جۋىق قازاق تۇرادى. ەندى ولار اتالعان قالىپتاسقان جايسىزدىقتار مەن قاۋىپتەردى سەزىنۋى بايقالادى، ولار اتامەكەنگە كوشە باستادى. اتامەكەنگە كوشكەندەرگە جاعداي جاساۋ مەملەكەتىمىزگە سىن. ەلگە قانداستارىمىزدىڭ قوسىلۋى - ىرىس. ال قانداي باسقا زاۋال بار؟ ماسەلەن، قازاقستانداعى رەسەي بانكىلەرىندەگى (ولاردىڭ كوبىسى سانكسيالاردىڭ استىندا) ءوزىمىزدىڭ قارجى سالىمداردى جابۋ كەرەك. بارلىق رەسەي قارجى ينستيتۋتتارىمەن قاتىناستاردى ءۇزى كەرەك. بۇدان بىلاي رەسەي كورپوراسيالارىنىڭ كوبىسى سانكسيالاردىڭ استىندا نەمەسە سانكسيالارعا تۇسەدى. ءبىزدىڭ ەكونوميكالىق ۆەدومستۆولار سونداي پارمەن-اقىل بەرىپ جاتۋى ىقتيمال. ەكونوميكالىق بيزنەس قاتىناستاردى تەك باتىس ەلدەرىمەن جۇرگىزگەن ءجون. جۇڭگو ەكونوميكاسى دا اقش سانكسيالارىنان ءتۇسىپ جاتىر. ال يراننىڭ جاعدايى رەسەي مەن قىتايدان دا ناشار. ورتا ازيا ەلدەرىنىڭ ەكونوميكاسى تىم ءالسىز. ولاردىڭ قۇقىقتىق رەجيمى تىم قولايسىز. قولايلى فاكتور: مۇناي باعاسى جوعارى. بيىل بيداي مەن ۇن نارىق باعاسى ءتاۋىر كورىنەدى، ءبىراق ساتىپ الۋشى قات. جالپى العاندا ءبىز ءۇشىن گەوساياسي جانە گەوەكونوميكالىق كونيۋكتۋرا جامان ەمەس سياقتى.

ءازىمباي عالي