تانىمال ايتىسكەر اقىن سالاۋات يساقايەۆ 44 جاسىندا قايتىس بولدى دەپ جازادى Qamshy.kz اقپارات اگەنتتىگى. بۇل تۋرالى ايتىسكەر بالعىنبەك يماش ءوزىنىڭ ينستاگرام پاراقشاسىنا جاريالادى.
سالاۋات يساقايەۆ اتىراۋ وبلىسى قۇلسارى قالاسىنىڭ تۋماسى.
"بارشا ايتىسسۇيەر قاۋىمعا قارالى xابار ايتۋعا تۋرا كەلىپ تۇر. الاشتىڭ اقپا اقىندارىنىڭ ءبىرى، 90-جىلدارى ستۋدەنت جاستار اراسىندا وتكەن رەسپۋبليكالىق اقىندار ايتىسىندا باس بايگەنى جەڭىپ العان ءۇش اقىننىڭ ءبىرى، اتىراۋدىڭ اقتاڭگەرى، قۇلسارىنىڭ بەل بالاسى - سالاۋات يساقايەۆ اتتى اعا-دوس، زامانداسىمىزدان ايىرىلىپ قالدىق. اللانىڭ بۇيرىعى جەتىپ، ءدام-تۇزى تاۋسىلىپ، اماناتىن تاپسىرعان اقيىق اقىننىڭ اجالىنا جول بويىنداعى كولىكتىڭ قاعىپ كەتۋى سەبەپ بولعان ەكەن.
نەبارى 44 جىل جاساعان سالاۋاتتىڭ تالاي اڭگىمەلەرى، جىر-تەرمەلەرى، ءازىل-وسپاقتارى، ايتىستاعى ايتقان ايشىقتى شۋماقتارى ەسىمە ءتۇسىپ، جانىم كۇيزەلىپ، تىنىسىم تارىلىپ، جۇرەگىم قان جىلاپ وتىر.
اقىن دوسىمىزدىڭ وتباسىنا، جۇبايىنا، بالالارىنا، جانە ونەرىن باعالايتىن بارشا قاۋىمعا قابىرعامىز قايىسىپ، قايعىسىنا ورتاقتاسىپ كوڭىل ايتامىن! اللا مەيىرىمىنە السىن، باقۇل بول، قىمباتتى سالاۋات دوس!"، - دەپ جازادى بالعىنبەك يماش.
