مەكسيكالىق ساۋل «كانەلو» الۆارەستىڭ (49-1-2، 34 KO) مۇددەسىن قورعاپ جۇرگەن پروموۋتەر وسكار دە لا حوييا WBC، WBA جانە IBO بويىنشا الەم چەمپيونى گەنناديي گولوۆكيننىڭ كومانداسىن سىنعا الدى.  سەبەبى پروموۋتەردىڭ ايتۋىنشا، بوكسشىنىڭ كومانداسى جەكپە-جەك الدىندا مەملەكەتتىك گيمندى ورىنداۋدان باس تارتقان كورىنەدى. بۇل تۋرالى Boxing News and Views پورتالى جازدى.

الايدا دە لا حويي بۇدان ارتىق اقپارات بەرمەگەن.

«تىڭدا، بۇل اقىماقتىق. ولار ءوز مەملەكەتىن قولداماي ما؟ گولوۆكيننىڭ ادامدارى جەكپە-جەك الدىندا گيمننىڭ قوسىلعانىن قالامايدى. چەمپيوندىق جەكپە-جەكتەر الدىندا گيمندى ورىنداۋ -ناعىز كەرەك ءراسىم. گيمندى ورىنداۋ ارقىلى ءوزىڭنىڭ ۇلكەن شارانىڭ ءبىر بولىگى ەكەنىڭدى تۇسىنەسىڭ.

گولوۆكيننىڭ ادامدارى قازاقستان، مەكسيكا جانە اقش گيمندەرىنىڭ ورىندالعانىن قالامايدى. تاعى قانداي تالاپتارى شىعار ەكەن؟ قۇداي-اي، جەكپە-جەكتىڭ بولعانىن دا قالامايتىن شىعار. جاي عانا كۇرەس، بولدى»، - دەپ مالىمدەگەن دە لا حوييا.

ەسكە سالا كەتەيىك، گولوۆكين مەن الۆارەستىڭ 2018 جىلدىڭ 5 مامىرىنا جوسپارلانعان جەكپە-جەگى وتپەي قالعان ەدى. سەبەبى مەكسيكالىق بوكسشى دوپينگ داۋىنا ۇشىرادى.

بىرنەشە اي بويى ەكى تاراپ كەلىسىمگە كەلىپ، جەكپە-جەك لاس-ۆەگاستاعى T-Mobile ارەناسىندا 15 قىركۇيەك وتەدى.