28 جاستاعى استانا تۇرعىنى ماقپال ەسپەنبەتوۆا ماسا شاعىپ، كوزى ءىسىپ كەتكەن سوڭ ءبىرىنشى قالالىق اۋرۋحاناعا بارادى. ءبىراق دارىگەرلەر ۋكول سالعان سوڭ كەلىنشەك ءتىل تارتپاستان قايتىس بولادى. اۋرۋحاناداعىلاردىڭ الدىن الا قورىتىندىسى بويىنشا ول انافيلاكتيكالىق شوكتان كوز جۇمعان. ءبىراق مارقۇمنىڭ تۋىستارى تاۋەلسىز ساراپتاما جۇرگىزىپ، دارىگەرلەردىڭ ايتقانىنا سەنبەي وتىر دەپ جازادى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ. 

ماقپال ەسپەنبەتوۆانى بۇگىن تۋعان-تۋىسى سەمەي قالاسىندا جەرلەپ جاتىر. بولعان جاعدايدىڭ ءمان-جايىن ماقپالدىڭ جاقىن قۇربىسى بيبەن ءجۇنىسوۆا ايتىپ بەردى. بيبەن ماقپالدى ماسا شاققان كۇنى دە، اۋرۋحاناعا بارعان كۇنى دە قاسىندا بولعان ەكەن. 

"2018 جىلى 30 تامىز كۇنى قۇربىم ماقپال ەكەۋمىز ديپلوماتيالىق قالاشىققا باردىق. ونداعى ماقساتىمىز – قۇربىم جۋىردا عانا كولىك العان ەدى. سول اۋداندا كولىك ازايعان سوڭ، ول ماشيناسىن جۇرگىزىپ ۇيرەنگىسى كەلگەن. سول جەردە ماقپالدىڭ ءبىر كوزىن ماسا شاعىپ الدى. كادىمگى كۇندە ءوزىمىز كورىپ جۇرگەن ماسا. كوزى ءىسىپ كەتتى"، — دەيدى بيبەن ءجۇنىسوۆا. 

مارقۇم 31 تامىز كۇنى تاڭەرتەڭ قۇربىسى بيبەنگە كوزىنىڭ سۋرەتىن جىبەرگەن. بيبەننىڭ ايتۋىنشا، كوزىنىڭ ىسىگى ءسال باسىلسا دا، ماقپال دارىگەرگە بارعالى وتىرعانىن ايتىپتى. 

"31 كۇنى تاڭەرتەڭ قۇربىم ماعان كوزىنىڭ سۋرەتىن جىبەردى. ىسىگى ءسال قايتقان، ءبىراق ول ءبارىبىر دارىگەرگە بارىپ، كونسۋلتاسيا العىسى كەلدى. ءسويتىپ، 31 تامىز كۇنى كۇيەۋى ەكى بالاسىمەن ماقپالدى قوشقاربايەۆ كوشەسى، 66 مەكەن جايىنداعى استانا قالالىق 1 اۋرۋحاناعا الىپ باردى. ماعان بارا جاتقاندارىن ايتتى. تاكسيكولوگيا بولىمىنە بارىپ، كەزەك الدى. جولداسى مەن ەكى بالاسى كولىكتە كۇتكەن. كەزەك كوپ بولعان سوڭ،  ءارى بالالاردىڭ مازاسى كەتكەن سوڭ جولداسى بالالاردى ۇيىنە الىپ كەتكەن. بالالارىن ۇيگە قالدىرىپ، قايتا اۋرۋحاناعا كەلە جاتقاندا وعان "ايەلىڭىز قايتىس بولدى" دەگەن حابار كەلگەن"، — دەيدى مارقۇمنىڭ قۇربىسى.

"ناۋقاس ماسا شاققاننان كوز جۇمدى" 

بيبەن ءجۇنىسوۆا اۋرۋحاناعا كەلگەندە مارقۇم ماقپالدىڭ دەنەسى سۋىپ كەتكەن ەكەن. دارىگەرلەر ماقپالدىڭ كۇيەۋى مەن قۇربىسىنا "ول انافيلاكتيكالىق شوكتان" قايتىس بولدى دەگەن. 

"مەن كىرىپ، مارقۇمنىڭ دەنەسىن ۇستاعاندا، مۇزداپ كەتكەن. اۋزىندا تۇتىكشەلەر جاتتى. دارىگەرلەر وعان "پرەدنيزولون" دەگەن پرەپارات سالدىق دەدى. بىردەن ايتا كەتەيىنشى، ماقپالدىڭ نەگىزى اللەرگياسى بار. سوندىقتان دا ول ماسا شاققان سوڭ وزدىگىنەن ەمدەلمەي، دارىگەرگە بارعان. دارىگەرگە ەسكەرتكەن ەكەن، ءبىراق قانداي دا ءبىر ۋكول سالۋعا رۇقسات بەرمەگەن. ونىڭ ولىمىنە قاتىستى تولتىرىلعان قاعازداردى ءبىراق كوردىم. ول ەش جەرگە قول قويماعان، اۋرۋدىڭ تاريحى بوس. سودان مەن بىردەن وعان ۋكول سالعان دارىگەردى دە، ونىڭ كومەكشىسىن دە بەينەگە تۇسىرە باستادىم"، — دەيدى بيبەن ءجۇنىسوۆا. 

بيبەننىڭ ايتۋىنشا، دارىگەرلەر وزدەرىن كىنالى سەزىنبەگەن جانە بولعان جاعدايدى تەز "جۋىپ-شايعىسى" كەلگەن. بيبەن كىرىپ، قۇجاتتاردى قاراي باستاعاندا، دارىگەرلەر جينالىپ، باسقا جاقتان تولتىرىلعان قۇجاتتاردى اكەلگەن.

"بىزگە بەرگەن اناليز پاراقشاسىندا "ناۋقاستىڭ سالماعى 71 كگ، ەر ادام" دەپ جازىلىپ تۇردى. ماقپالدىڭ سالماعى نەبارى 54 كگ. دارىگەرلەر ۋكول سالعاننان كەيىن ول قۇسىپ، قىسىمى ءتۇسىپ كەتكەن دە ءتىل تارتپاي قايتىس بولعان. ەندى بىزگە بەرگەن قورىتىندى قۇجاتتا "ناۋقاس ماسا شاققاننان كەيىن كوز جۇمدى" دەپ جازىلىپ تۇر"، — دەيدى بيبەن ءجۇنىسوۆا. 

دەنساۋلىق ساقتاۋ مينيسترلىگى نە دەيدى؟

قازاقستاننىڭ دەنساۋلىق ساقتاۋ ۆيسە-مينيسترى ءلاززات اقتايەۆانىڭ ايتۋىنشا، مەديسينالىق قورىتىندى – انىقتالماعان شوك. ايەل ادامنىڭ قازاسىنا نە سەبەپ بولعانىن انىقتاۋ ءۇشىن ۇلپالاردى قوسىمشا زەرتتەۋ، پرەپاراتتارعا توكسيكولوگيالىق ساراپتاما جۇرگىزۋ قاجەت.

"وسى ناتيجەلەردى العان بويدا ءولىمىنىڭ ناقتى سەبەبى بەلگىلى بولادى"، —دەپ حابارلادى ۆيسە-مينيستر.

اقتايەۆا اتاپ وتكەندەي، ەرەجەلەرگە سايكەس، كەز كەلگەن مەديسينالىق پروسەدۋرانى جۇرگىزگەندە ناۋقاستان جازباشا رۇقسات الىنادى.

مارقۇم بولعان كەلىنشەكتەن جازباشا كەلىسىم الىندى ما، جوق پا – مەديسينالىق قۇجاتتاردى تەكسەرۋ بارىسىندا انىقتالادى.

"جولداسى بىرنەشە رەت ەسىنەن تاندى، ال قىزىنىڭ جۇرەگى اۋىرادى"

"كۇيەۋى بۇل قايعىعا سەنبەيدى. بىرنەشە رەت ەسىنەن تانىپ، قايعىدان قارس ايىرىلعالى ءجۇر. ەكى بالاسىنا ايتتىق. قىزى شالا تۋعان ەدى، وسى قاراشا ايىندا جۇرەگىنە وپەراسيا جاساۋ كەرەك. ايدىڭ كۇننىڭ امانىندا ەكى بالانىڭ اناسى ماسا شاققاننان قايتىس بولدى دەگەنگە كىم سەنەدى!؟"، — دەپ قىنجىلدى بيبەن ءجۇنىسوۆا.