اقتوبەدەگى جالپى رەجيمدەگى كولونيادا ازاتتىققا تۇتقىن 28 تامىز كۇنى ەتاپپەن كەلگەندەر اراسىندا ماكس بوقايەۆتىڭ بولماعانىن، ال كەلەسى ەتاپ ەندى 10 قىركۇيەكتەن كەيىن عانا كەلەتىنىن مالىمدەدى.

ۆاديم كۋرامشيننىڭ اقپاراتى بويىنشا، 45 جاستاعى ماكس بوقايەۆ ءقازىر قاراعاندىنىڭ تەرگەۋ اباقتىسىنداعى ايداۋعا جونەلتىلەتىن پۋنكتە وتىر. الايدا، قاراعاندىداعى تەرگەۋ اباقتىسىنداعىلار بۇعان قاتىستى قانداي دا ءبىر اقپارات بەرۋدەن باس تارتتى.

ماكس بوقايەۆتىڭ قارىنداسى جانارگۇل بوقايەۆا ازاتتىققا تۋىستارىنا اعاسىنىڭ پەتروپاۆلدان اقتوبەگە اۋىستىرىلعانى تۋرالى حابارلاما كەلمەگەنىن ايتتى. ول 76 جاستاعى اناسى راحيلا قوجاسوۆامەن بىرگە 22-24 تامىز ارالىعىندا ماكس بوقايەۆپەن ۇزاق ۋاقىت كەزدەسۋدە بولعان.

جانارگۇل بوقايەۆا اعاسىنىڭ دەنساۋلىعى ءبىرقالىپتى ەكەنىن ايتادى. بىرنەشە اپتا بۇرىن تۇرمە اكىمشىلىگى بوقايەۆقا "ەكىنشى دارەجەلى تەرىس مىنەز-قۇلىق كورسەتتى" دەگەن باعا بەرگەن. قارىنداسىنىڭ سوزىنشە، بۇعان ماكس بوقايەۆتىڭ تۇرمەدەگى تەكسەرۋ كەزىندە باس كيىمىن شەشپەي قويۋى سەبەپ بولعان. جانارگۇل بوقايەۆا اناسى ەكەۋى ماكس بوقايەۆتى اقتوبەگە اۋىستىرۋ تۋرالى تۇرمە اكىمشىلىگىمەن، يا اعاسىمەن سويلەسپەگەنىن ايتادى.

ماكس بوقايەۆقا بۇعان دەيىن دە "ءۇشىنشى دارەجەلى تەرىس مىنەز قۇلىق كورسەتتى" دەگەن باعا بەرىلگەن. ول بيىلعى قاڭتاردا 2017 جىلعى جەلتوقسان ايىندا تۇرمەدە 25 گرادۋس سۋىقتا تاڭعى دەنە شىنىقتىرۋدى جاساۋدان باس تارتقانى ءۇشىن التى رەت جازاعا تارتىلىپ، تارتىپتىك وقشاۋلاۋ كامەراسىنا قامالعان.

ماكس بوقايەۆ 2016 جىلعى اتىراۋداعى اسا اۋقىمدى جەر رەفورماسىنا قاتىستى ميتينگىلەردەن سوڭ بەس جىلعا سوتتالعان. 2016 جىلعى 28 قاراشادا اتىراۋ قالالىق №2 سوتى بوقايەۆتىڭ جازاسىن اتىراۋداعى ۋگ 157\9 مەكەمەسىندە وتەۋدى بەلگىلەگەنىمەن، 2017 جىلعى 27 قاڭتاردا ول سولتۇستىك قازاقستان وبلىسىنداعى ەس -164\3 مەكەمەسىنە جونەلتىلگەن. سودان بەرى ماكس بوقايەۆ تا، ونىڭ تۋىستارى دا بۇل اۋىستىرۋمەن كەلىسپەي، بىرنەشە مارتە ارىزدانعان، الايدا سوت بۇل ارىزداردى قاناعاتتاندىرماعان.