مۇنايشىلار ەرەۋىلىنىڭ تانىمال ليدەرى بولعان ماقسات دوسماعامبەتوۆپەن قوشتاسۋ جاڭاوزەندەگى ءوزى تۇراتىن ءۇيدىڭ اۋلاسىندا ءوتتى. مارقۇممەن قوشتاسۋعا ول بۇرىن جۇمىس ىستەگەن "وزەنمۇنايگاز" مەكەمەسىنىڭ مۇنايشىلارى عانا ەمەس، جاڭاوزەندەگى بارلىق مۇناي كاسىپورىندارىنىڭ جۇمىسشىلارى، قالا تۇرعىندارى كەلدى. ءبىراق جەرگىلىكتى بيلىك پەن وپپوزيسيا وكىلدەرى بايقالمادى.

مۇنايشىلار كەشەدەن بەرى ماقساتتىڭ ءمايىتىن ورتالىق الاڭعا اپارىپ، جانازاسىن سول جەردە شىعارۋدى جانە ونىڭ مۇنايشىلار قۇقىعىن قورعاۋداعى ەڭبەگىن ايتپاقشى بولعان.

ءبىراق جانازاعا جينالعان، ءاتى-جونىن ايتپاۋدى سۇراعان مۇنايشىلاردىڭ بىرنەشەۋىنىڭ ازاتتىققا ايتۋىنشا، دوسماعامبەتوۆتىڭ تۋىستارى جانازانى الاڭدا نەمەسە قالاداعى جاڭا سالىنعان "ءابىش قوجا" مەشىتىندە وتكىزۋگە قارسىلىق بىلدىرگەن.

مارقۇمدى جاڭاوزەننەن بەس كيلومەتردەگى تەڭگە اۋىلىنىڭ زيراتىنا جەرلەدى.

مارقۇمنىڭ ارتىندا وتباسى، ەكى ۇلى، ءبىر قىزى قالدى.

ماقسات دوسماعامبەتوۆ 2011 جىلى جاڭاوزەندە "جاپپاي تارتىپسىزدىكتى ۇيىمداستىرۋشى" دەپ تانىلىپ، التى جىلعا سوتتالعان. قازاقستان سوتىنىڭ بارلىق اپەللياسيالىق ينستانسيالارى ونىڭ جازاسىن جەڭىلدەتۋدەن دە، ءىستى قايتا قاراۋدان دا باس تارتقان.

2011 جىلعى اقتاۋداعى سوتتا ماقسات دوسماعامبەتوۆ ەڭ العاش رەت تۇرمەدەگى ازاپتاۋ تۋرالى اشىق مالىمدەمە جاساپ، ونىڭ تەرگەلۋىن تالاپ ەتتى. ونىڭ ارىزىنان سوڭ قاماۋداعى 21 مۇنايشى سوتقا ازاپتاۋ تۋرالى شاعىم ءتۇسىردى. سوت ساراپتاماسى ونىڭ قابىرعاسىنىڭ، بەت جاق سۇيەگىنىڭ سىنعانىن انىقتاعان.

كەيىن بەلسەندىگە بەت جاق قاتەرلى ىسىگى دەگەن دياگنوز قويىلعان. ماقسات دوسماعامبەتوۆ بەت سۇيەگىندەگى ونكولوگيالىق اۋرۋدىڭ نەگىزگى سەبەبىن ءوزىنىڭ جاڭاوزەن پروكۋراتۋراسى مەن ۋاقىتشا قاماۋ اباقتىسىنداعى تەرگەۋدە ازاپتالعانىنان كورەدى. "جاڭاوزەن ءىسى" بويىنشا سوتتا ول ءوزىنىڭ تەرگەۋ كەزىندە ازاپتالعانىن ايتقان. ءبىراق سوت ول كەزدە دوسماعامبەتوۆ پەن باسقا دا سوتتالۋشىلاردىڭ ازاپتاۋعا قاتىستى شاعىمدارىن "بوس ءسوز" دەپ قابىلداماي قويعان.