سوڭعى كەزدەرى سايراگۇل جايى نە بولدى دەپ الەۋمەتتىك جەلىدە سۇراۋشىلار قاتارى كوبەيدى، رىسبەك سارسەنباي، ەركىن راقىشيەۆ، قازىبەك يسا سياقتى ارداقتى اعالارىم تەلەفون سوعىپ، ءوز الاڭداۋشىلىقتارىن ءبىلدىرىپ جاتىر، جۋرناليستەر قاۋىمى ءوز الدىنا.
وسىعان بايلانىستى، سايراگۇل ماسەلەسىندە ءوزىم تاراپىنان قىسقا عانا اتقارىلعان جانە اتقارىلماق شارۋالار جايلى حاباردار ەتە كەتەيىن.
الماتى وبلىستىق كوشى-قون دەپارتامەنتى جانىنان قۇرىلعان كوميسسيانىڭ سايراگۇل ساۋىتبايعا بوسقىن ستاتۋسىن بەرۋدەن باس تارتۋ تۋرالى شەشىمىنە، ق ر كوشى-قون كوميتەتى قىزمەتىنە شاعىم ءتۇسىردىم. بىردەن سوتقا بەرۋىمە دە بولاتىن ەدى، الايدا بارلىق ينستانسيادان ءوتىپ العان دۇرىس دەپ شەشتىم. ارىز بەرىلگەن سوڭ كوميتەت ءتوراعاسىنىڭ ورىنباسارى سادانوۆ مىرزانىڭ قابىلداۋىندا بولدىم، ول كىسى ءبىرقاتار ماسەلەلەردى وڭىنان شەشەتىندەي سىڭاي تانىتتى، سونىڭ ىشىندە سايراگۇلدەن باسقا، قازاقستانعا كەلىپ، ءبىراق قۇجاتتارىن زاڭداستىرا الماي جۇرگەن ورالمانداردىڭ دا شارۋاسى بار ەدى. ول جاعىن ۋاقىت كورسەتە جاتار ەندى.
♦حالىقارالىق قۇقىق نەگىزگە الىنىپ، سايراگۇل ساۋىتباي بوستاندىققا شىقتى
ارىز تاپسىرماس بۇرىن بىرنەشە حالىقارالىق ۇيىمدارعا حات جازدىم، تەلەفون ارقىلى سويلەستىم، كەزدەسىپ كەڭەستەرىن الدىم، كومەك سۇرادىم. بارلىعى دا قولداۋ بىلدىرەتىن بولدى.
سونىمەن قاتار، بۇدان بۇرىن 3 ايعا بەرىلگەن «پانا ىزدەۋشى تۇلعا» كۋالىگىنىڭ مەرزىمىن تاعى دا سول ۋاقىتقا ۇزارتۋعا قول جەتكىزدىك. ءبىزدىڭ جاعدايدا ولدا از دا بولسا كوڭىلگە دەمەۋ.
كەشە عانا كوشى-قون كوميتەتىنەن، سادانوۆ مىرزادان ارالىق جاۋاپ الدىم، وندا الداعى ۋاقىتقا كوميسسيا جيناپ جاتقاندارىن، تۇپكىلىكتى شەشىم سونىڭ ناتيجەسى بويىنشا حابارلاناتىنى ايتىلعان. ازىرگە وسى.
ايتقانداي، ءوزىنىڭ جاعدايىن سۇراپ، الاڭداۋشىلىعىن بىلدىرگەن بارشاڭىزعا سايراگۇل العىسىن بىلدىرۋدە!
♦تۇرمەدەگى سايراگۇل ساۋىتباي ەلباسىعا حات جازدى: وتباسىممەن قاۋىشقىم كەلەدى
كوميتەتكە جازعان شاعىمىمدى فوتو/ۆيدەوعا جۇكتەي الماعاسىن، ءىستىڭ ءمان-جايىن بىلەم دەۋشىلەرگە اقپارات رەتىندە وسى جەرگە سالىپ وتىرمىن.
قازاقستان رەسپۋبليكاسى
كوشى-قون كوميتەتى قىزمەتىنىڭ
باستىعى م.قابدەنوۆكە
قورعاۋشى، بقو ادۆوكاتتار
القاسىنىڭ مۇشەسى
ا.ت.قۇسپاننان
س.ساۋىتبايدىڭ مۇددەسى ءۇشىن
ش ا ع ى م
الماتى وبلىستىق كوشى-قون قىزمەتى باسقارماسى جانىنان قۇرىلعان كوميسسيا شەشىمىنە
سىزگە وسى شاعىممەن جولدانا وتىرىپ، 16.09.1976 جىلى جۇڭگو حالىق رەسپۋبليكاسىندا تۋعان، سايراگۇل ساۋىتبايعا قاتىستى الماتى وبلىستىق كوشى-قون قىزمەتى باسقارماسى جانىنان قۇرىلعان كوميسسيانىڭ 04.10.2018 جىلى شىعارىلعان №7-18 ساندى شەشىمىنە ءوز كەلىسپەۋشىلىگىمدى بىلدىرەمىن.
جۇڭگو حالىق رەسپۋبليكاسىنىڭ ازاماتشاسى سايراگۇل ساۋتىباي (Shayilaguli Shawutibayi)، 2018 جىلدىڭ 05 ءساۋىرى استانا ۋاقىتى بويىنشا ساعات 18:00 شاماسىندا قحر-نان «قورعاس» شەكارا ماڭى ىنتىماقتاستىعى حالىقارالىق ورتىلىعىنىڭ (بۇدان ءارى - «قورعاس» شىحو) اۋماعىنىڭ اكىمشىلىك عيماراتىنىڭ ىشىندە ورنالاسقان قازاقستان رەسپۋبليكاسىنىڭ مەملەكەتتىك شەكارا ارقىلى وتكىزۋ پۋنكتىندە، وتۋگە رۇقسات بەرەتىن ەشبىر قۇجاتسىز، شەكارا باقىلاۋدان جاسىرىنىپ، ياعني بەلگىلەنگەن ءتارتىپتى بۇزا وتىرىپ، قازاقستان رەسپۋبليكاسىنىڭ مەملەكەتتىك شەكاراسىن قاساقانا زاڭسىز كەسىپ وتكەنى ءۇشىن الماتى وبلىسى پانفيلوۆ اۋداندىق سوتى بيىلعى جىلدىڭ ءبىرىنشى تامىزى كۇنى قازاقستان رەسپۋبليكاسىنىڭ قك-نىڭ 392-بابىنىڭ 1-بولىگىمەن كىنالى دەپ تانىپ، وعان 6 (التى) اي مەرزىمگە باس بوستاندىعىنان ايىرۋ جازاسى تاعايىنداعان. ق ر قك-نىڭ 63-بابىنىڭ ەرەجەلەرىنىڭ نەگىزىندە، تاعايىندالعان باس بوستاندىعىنان ايىرۋ جازاسى شارتتى دەپ سانالىپ، 6 (التى) اي مەرزىمگە پروباسيالىق باقىلاۋى بەلگىلەنگەن.
نەگىزى ق ر قك-نىڭ 392 بابىنىڭ 1 بولىگى، قوسىمشا جازا رەتىندە مىندەتتى تۇردە شەكارانى زاڭسىز كەسىپ وتكەن ادامدى كەرى شىعارۋدى كوزدەيدى. الايدا، سوت قىلمىستىق كودەكستىڭ ول تالاپتارىن قولدانعان جوق، وعان نەگىز رەتىندە بۇۇ-نىڭ كونۆەنسياسىن باسشىلىققا العان بولاتىن، اتاپ ايتقاندا (سوت ۇكىمىنەن ءۇزىندى)؛
سونىمەن قاتار ق ر قك-نىڭ 392-بابىنىڭ 1-بولىگىنىڭ سانكسياسىندا شەتەلدىكتى نەمەسە ازاماتتىعى جوق ادامدى قازاقستان رەسپۋبليكاسىنىڭ شەگىنەن تىسقارى جەرگە بەس جىل مەرزىمگە شىعارىپ جىبەرۋ تۇرىندەگى قوسىمشا جازا قاراستىرىلعان.
س.ساۋىتبايعا قوسىمشا جازا تاعايىنداۋ تۋرالى ماسەلەنى تالقىلاپ سوت كەلەسىدەي تۇجىرىمعا كەلدى. سوتتا س.ساۋىتبايدىڭ قىلمىستى جاساۋداعى ىس-ارەكەتتىڭ ماقساتتارى مەن سەبەپتەرى رەتىندە ونىڭ وتباسى: جۇبايى ۋ.سىلام جانە كامەلەتتىك جاسقا تولماعان ەكى بالاسى ءۋالي ۇكىلاي مەن ءۋالي ۇلاعاتپەن قاۋىشۋ ماقساتىندا اتالعان قىلمىستى جاساعاندىعىن انىقتالدى. قازاقستان رەسپۋبليكاسىنىڭ جوعارعى كەڭەسىنىڭ 1994 جىلعى 8 ماۋسىمداعى قاۋلىسىمەن راتيفيكاسيالانعان، نيۋ-يوركتە 1994 جىلعى 16 اقپاندا قول قويىلعان، 1989 جىلعى 20 قاراشاداعى بىرىككەن ۇلتتار ۇيىمىنىڭ بالا قۇقىقتارى تۋرالى كونۆەنسيانىڭ 8، 9، 10، 18-باپتارىنا سايكەس وتباسى قوعامنىڭ تابيعي جانە نەگiزگi ۇياسى بولىپ تابىلادى جانە قوعام مەن مەملەكەت تاراپىنان قورعالۋعا قۇقىلى. قاتىسۋشى مەملەكەتتەر سوت شەشىمىنە سايكەس قۇزىرەتتى ورگاندار قولدانىستاعى زاڭعا جانە راسىمدەرگە سايكەس بالانىڭ ەڭ قاجەتتى مۇددەلەرى ءۇشىن ونى اتا-اناسىنان ايىرۋ قاجەت ەكەندىگىن انىقتاعان جاعدايلاردى قوسپاعاندا، بالانىڭ ءوزىنىڭ اتا-اناسىمەن وزدەرىنىڭ تىلەگىنە قارسى ايىرىلىسپاۋىن قامتاماسىز ەتەدى. قاتىسۋشى مەملەكەتتەردىڭ 9-باپتىڭ 1تارماعى بويىنشا مىندەتتەمەلەرىنە سايكەس وتباسىمەن قوسىلۋ ماقساتىندا بالانىڭ نەمەسە ونىڭ اتا-اناسىنىڭ قاتىسۋشى مەملەكەتكە كەلۋى نەمەسە ودان كەتۋى تۋرالى وتىنىشتەرىن قاتىسۋشى مەملەكەتتەر وڭ سيپاتتا، ادامگەرشىلىك تۇرعىدا جانە جەدەل تۇردە قاراۋعا ءتيىس. قاتىسۋشى مەملەكەتتەر بۇدان ءارى وسىنداي ءوتىنىش بەرۋدىڭ ءوتىنىش بەرۋشىلەر مەن ولاردىڭ وتباسى مۇشەلەرى ءۇشىن جاعىمسىز سالدارلارعا اكەپ سوقپاۋىن قامتاماسىز ەتەدى. قاتىسۋشى مەملەكەتتەر اتا-اناسىنىڭ ەكەۋىنىڭ دە بالانىڭ تاربيەسى مەن دامۋى ءۇشىن ورتاق جانە بىردەي جاۋاپكەرشىلىگىن تانۋ قاعيداتتارىن قامتاماسىز ەتۋ ءۇشىن بارلىق مۇمكىن كۇش جىگەرلەردى قابىلدايدى. وسى كونۆەنسيادا باياندالعان قۇقىقتاردى جۇزەگە اسىرۋعا كەپىلدىك بەرۋ جانە جاردەمدەسۋ ماقساتتارىندا قاتىسۋشى مەملەكەتتەر اتا-انالارعا جانە زاڭدى قامقورشىلارعا بالالاردى تاربيەلەۋ جونىندەگى ولاردىڭ ءوز مىندەتتەرىن ورىنداۋىنا ءتيىستى كومەك كورسەتەدى جانە بالالار مەكەمەلەرىنىڭ جەلىسىن دامىتۋدى قامتاماسىز ەتەدى. قازاقستان رەسپۋبليكاسىنىڭ 2016 جىلعى 6 ساۋىردەگى «قۇقىقتىق اكتىلەر تۋرالى» زاڭىنىڭ 6-بابىنىڭ 2-بولىگىنىڭ نەگىزىندە، قازاقستان رەسپۋبليكاسى راتيفيكاسيالاعان حالىقارالىق شارتتار ونىڭ زاڭدارى الدىندا باسىم بولادى جانە حالىقارالىق شارتتا ونى قولدانۋ ءۇشىن زاڭ شىعارۋ تالاپ ەتىلەتىن جاعدايدان باسقا رەتتەردە تىكەلەي قولدانىلادى. قازاقستان رەسپۋبليكاسىنىڭ قك-نىڭ 1-بابىنىڭ 3-بولىگىندە كوزدەلگەندەي، قازاقستان رەسپۋبليكاسى راتيفيكاسيالاعان حالىقارالىق شارتتار وسى كودەكس الدىندا باسىمدىققا يە بولادى جانە حالىقارالىق شارتتا ونى قولدانۋ ءۇشىن زاڭ شىعارۋ تالاپ ەتىلەتىننەن باسقا جاعدايلاردا ولار تىكەلەي قولدانىلادى. قازاقستان رەسپۋبليكاسىنىڭ 2002 جىلعى 8 تامىزداعى «قازاقستان رەسپۋبليكاسىنداعى بالانىڭ قۇقىقتارى تۋرالى» زاڭىنىڭ 6-بابىنىڭ 2بولىگىنىڭ 2-تارماعىندا بالالار مۇددەسiن كوزدەيتiن مەملەكەتتiك ساياسات مەملەكەتتiك ورگاندار قىزمەتiنiڭ باسىم سالاسى بولىپ تابىلادى جانە بالالارعا تولىمدى تاربيە بەرۋدi، ولاردىڭ قۇقىقتارىن قورعاۋدى ولاردى قوعامدا تولىمدى ءومiر سۇرۋگە دايىنداۋدى قامتاماسىز ەتۋ ماقساتىندا وتباسىن مەملەكەتتiك قولداۋعا نەگiزدەلگەن دەپ كورسەتىلگەن. اتالعان زاڭ نورمالارىنا ساي، سوتپەن بىرىككەن ۇلتتار ۇيىمىنىڭ بالا قۇقىقتارى تۋرالى كونۆەنسيانىڭ تالاپتارى باسىم بولىپ تانىلادى. الايدا قازاقستان رەسپۋبليكاسىنىڭ زاڭناماسى دا وعان قارسى شىقپايدى، قازاقستان رەسپۋبليكاسىندا وتباسى جانە بالالاردىڭ قۇقىتارى قوعام مەن مەملەكەت تاراپىنان قورعانىلادى. جوعارىدا كورسەتىلگەندەي، سوتتالۋشىنى قازاقستان رەسپۋبليكاسىنىڭ شەگىنەن تىسقارى جەرگە شىعارىپ جىبەرۋ ونىڭ بالالارىنىڭ مۇددەسىن قامتاماسىز ەتۋ ماقساتىندا عانا قولدانىلۋى مۇمكىن. الايدا، س.ساۋىتبايدىڭ وتباسى، ونى قازاقستان رەسپۋبليكاسىنىڭ شەگىنەن تىسقارى شىعارىپ جىبەرۋگە قارسى. سوندىقتان سوتپەن س.ساۋىتبايدىڭ قىلمىستى جاساۋداعى وتباسىمەن قوسىلۋ تۋرالى ارەكەتىنىڭ ماقساتى مەن سەبەپتەرى باسشىلىققا الىنادى.
بۇدان باسقا وسى ۇكىمدە س.ساۋىتبايدى قازاقستاندا قالدىرۋعا، ونىڭ ەتنيكالىق قازاق جانە قازاقستان رەسپۋبليكاسىنىڭ ازاماتتىعىن الۋعا باسىم قۇقىعى بارلىعىندا ەرەكشە جاعدايلار قاتارىنا جاتقىزعان.
سونىمەن قاتار، ايىپتاۋ اكتىسىندە جانە سوت ۇكىمىندە س.ساۋىتبايدىڭ قحر تاراپىنان شىعارىلماعانى دا ناقتى كورىنىس تاپقان، اتاپ ايتقاندا (ۇكىمنەن ءۇزىندى)؛ سوتتالۋشى س.ساۋىتبايدىڭ سوتتا بەرگەن، ياعني شەكارانى وتباسىمەن قاۋىشۋ ءۇشىن زاڭسىز كەسىپ وتكەندىگى تۋرالى جاۋابى، ايىپتاۋ اكتىسىندە دە كورىنىس تاپقان. اتاپ ايتقاندا، ايىپتاۋ تاراپىنىڭ پوزيسياسى بويىنشا، س.ساۋىتباي 2002 جىلدىڭ شىلدە ايىنان باستاپ قحر-نىڭ كوممۋنيستىك پارتياسىنىڭ مۇشەسى بولۋىنا، بالاباقشا باسشىسى لاۋازىمىندا، سودان كەيىن ساياسي قۇپيا ورگاندارىندا مەملەكەتتىك قىزمەت اتقارۋىنا بايلانىستى قحر-نان شىعا الماعان. ونىڭ 2008 جىلدىڭ 16 قىركۇيەگىنەن 2018 جىلدىڭ 15 قىركۇيەگىنە دەيىنگى مەرزىمگە بەرىلگەن № G 30846841 شەتەلدىك ءتولقۇجاتى قحر-نىڭ ارنايى ورگاندارىنىڭ قىزمەتتەرىمەن الىنىپ قويىلعان، سوندىقتان وعان بەلگىلەنگەن تارتىپتە مەملەكەتتىك شەكارانى زاڭدى تۇردە كەسىپ وتۋىنە مۇمكىندىك بەرىلمەگەن. وتباسىمەن زاڭ تارتىبىمەن قوسىلا المايتىنىنا كوز جەتكىزگەن س.ساۋىتباي قحر-سى مەن قازاقستان رەسپۋبليكاسىنىڭ اراسىنداعى مەملەكەتتىك شەكاراسىن قاساقانا زاڭسىز كەسىپ ءوتۋ تۋرالى شەشىم قابىلداپ، ونى ىسكە اسىرعان.
ياعني، س.ساۋىتبايدىڭ قحر-دا ءوز وتباسىنان كۇشپەن اجىراتىلعانى جانە ونىڭ قحر ارنايى ورگاندارىنىڭ قۇجاتىن تارتىپ الۋى سەبەپتى زاڭدى جولمەن شەكارانى كەسىپ وتە الماعانى، قازىرگى تاڭدا زاڭدى كۇشىنە ەنگەن سوت ۇكىمىمەن انىقتالعان!
ق ر قىلمىستىق پروسەستىك كودەكسىنىڭ 127-بابى، 1 بولىگىنە سايكەس، سوتتىڭ قىلمىستىق iس بويىنشا زاڭدى كۇشiنە ەنگەن ۇكىمى، سونداي-اق قىلمىستىق ءىستى ءمانى بويىنشا شەشەتىن باسقا دا شەشiءمى انىقتالعان ءمان-جايلارعا دا، ولاردىڭ سوتتىڭ ۇكىمى مەن شەشىمى شىعارىلعان ادامعا قاتىستى قۇقىقتىق باعالانۋىنا قاتىستى دا بارلىق مەملەكەتتىك ورگاندار، جەكە جانە زاڭدى تۇلعالار ءۇشiن مiندەتتi بولىپ تابىلادى. زاڭ تىلىندە بۇنى پرەيۋديسيا دەپ اتايدى.
ۇستىمىزدەگى جىلدىڭ 4 قازان كۇنى سايراگۇل ساۋىتبايعا قاتىستى بوسقىن مارتەبەسىن بەرۋ تۋرالى ءىستى قاراعان كوميسسيا جانە وسى كوميسسيا جۇمىسىن ۇيىمداستىرعان الماتى قالالىق كوشى-قون قىزمەتى باسقارماسى زاڭ تالاپتارىن بىلمەگەنبە الدە ولار جوعارعى جاقتان تۇسكەن زاڭسىز تاپسىرمانى ورىنداپ وتىر ما؟
سايراگۇل ساۋىتبايدىڭ ءوزى جانە وتباسى قحر-نان نە ءۇشىن كەتۋگە ءماجبۇر بولدى دەگەن سۇراققا كەلسەك، قحر ش ۇ ا ر وڭىرىندە قازاق، ۇيعىر، دۇنگەن سياقتى از ۇلت وكىلدەرىنە بىرنەشە جىل كولەمىندە كورسەتىلىپ جاتقان ۇلتتىق، ءدىني نەگىزدە قۋدالاۋ، قىسىم كورسەتۋ فاكىلەرى اسەر ەتكەندىگىن ءوز ارىزىمىزدا كورسەتتىك، س.ساۋىتبايدا كوميسسيا الدىندا ايتىپ بەردى. ءبىراق، كوميسسيا ءوز حاتتاماسىندا ول فاكتىلەر ءوز دالەلىن تاپپادى دەپتى، بۇنى قالاي تۇسىنۋگە بولادى؟ ەكى بىردەي مەملەكەتتىڭ شەكاراسىنان قاشىپ وتۋگە ءماجبۇر بولعان س.ساۋىتباي شۇاردا ازاماتتاردى جاپپاي قاماپ، قيناپ جاتقانى تۋرالى قالاي دالەلدەپ بەرمەك؟ سوندا، كوميسسيا مۇشەلەرى نەمەسە ءسىزدىڭ قولاستىڭىزداعى قىزمەتكەرلەر قازاقستاندىق جانە الەمدىك باق-ى ماقالالاردى وقىماي ما (ءبىزدىڭ ءوزىمىز كوميسسياعا 200-دەن استام شەتەل ب ا ق ماقالالارىنا سىلتەمە ۇسىندىق)، ەگەر ونىڭ ءبارىن فاكت ەمەس وسەك دەپ قابىلداسا، ەۆروپا ادام قۇقىقتارىن قورعاۋ ۇيىمدارىنىڭ اناليتيكالىق-زەرتتەۋ قورىتىندالارىن، اقش كونگرەسىنىڭ بىرنەشە مارتە جاريالاعان رەسمي مالىمدەمەلەرىن، بۇۇ-نىڭ بوسقىندار ءىسى جونىندەگى جوعارعى كوميسسارىنىڭ، ازاپتاۋعا قارسى كوميتەتىنىڭ رەزوليۋسيالارىن نەگە باسشىلىققا الماعان؟
كوميسسيانىڭ بۇل شەشىمى ءسوزدىڭ تۋرا ماعىناسىندا قازاق حالقىنىڭ كوپ بولىگىنىڭ اشۋ-ىزاسىن تۋدىرىپ وتىر. ءبىر ەمەس بىرنەشە قوعامدىق ۇيىم وكىلدەرى ماعان جەكە حابارلاسىپ، وزدەرىنىڭ سايراگۇلدى قورعاپ قالۋ ماقساتىندا كەز-كەلگەن اكسيانى ۇيىمداستىرۋعا دايىن ەكەندىكتەرىن حابارلادى. الايدا، مەن سايراگۇل ساۋىتبايدىڭ ءىسى بويىنشا باسىنان باستاپ كەلە جاتقان ادۆوكات رەتىندە قوعام بەلسەندىلەرىن، ساياساتكەرلەردى جانە باق-قا بەرگەن ءاربىر سۇحباتىمدا رەسپۋبليكالىق كوشى-قون كوميتەتى ياعني، ءسىزدىڭ اتىڭىزعا شاعىم بەرەتىنىمدى، ءسىزدىڭ ءوز كەزەگىڭىزدە كوميسسيا شەشىمىن زاڭسىز دەپ تاۋىپ، قايتا قاراۋعا مۇمكىندىگى جوعارى دەگەن باعىتتا ايتىپ، ەلدى مەيلىنشە تىنىشتىق ساقتاۋعا شاقىرىپ كەلەمىن.
ماعان سونىمەن قاتار، بۇۇ جانىنداعى بوسقىندار ءىسى جونىندەگى جوعارعى كوميسسارياتىنان، ەۆروپا ادام قۇقىقتارىن قورعاۋ ۇيىمى، گەرمانيانىڭ «Society for threatened peoples»، حالىقارالىق ارەنادا وتە بەدەلدى «Human Rights Watch» حالىقارالىق ادام قۇقىقتارىن قورعايتىن ۇيىمدارمەن شەتەل باسپا ءسوز وكىلدەرىنەن وتە كوپ حابارلاسۋدا.
بۇل ارقىلى سايراگۇل ساۋىتباي ءىسىنىڭ قوعام، ءتىپتى الەمدىك قاۋىمداستىق نازارىندا ەكەنىن سىزگە باسا ايتقىم كەلەدى.
كورسەتىلگەندەردىڭ نەگىزىندە، سىزدەن
س ۇ ر ا ي م ى ن :
سايراگۇل ساۋىتبايعا قاتىستى الماتى وبلىستىق كوشى-قون قىزمەتى باسقارماسى جانىنان قۇرىلعان كوميسسيانىڭ 04.10.2018 جىلى شىعارىلعان №7-18 ساندى شەشىمىن زاڭسىز دەپ تاۋىپ بۇزۋدى.
قازاقستان زاڭدارىن جانە بۇۇ-نىڭ قاۋلى قارارلارىن باسشىلىققا الا وتىرىپ، سايراگۇل ساۋىتبايعا بوسقىن ستاتۋسىن بەرۋدى.
سايراگۇل ساۋىتبايدىڭ اتىنا 25.07.2018 جىلى № 35 سانىمەن بەرىلگەن قازاقستان رەسپۋبليكاسىندا پانا ىزدەگەن ادامنىڭ كۋالىگىنىڭ مەرزىمىن ۇزارتۋدى.
شاعىمدى قاراۋ ناتيجەسى تۋرالى ماعان e.Gov.kz ەلەكتروندى پورتالى ارقىلى جازباشا تۇردە، زاڭمەن كوزدەلگەن مەرزىم ىشىندە حابارلاۋدى.
شاعىم يەسى: ا.ت.قۇسپان
