يۋنەسكو قازاق ءتىلىن جويىلىپ كەتۋ ءقاۋپى بار تىلدەردىڭ قاتارىنا ەنگىزگەن دەپ جازادى Qamshy.kz اقپارات اگەنتتىگى. وسىعان قاتىستى قوعام بەلسەندىسى رۋسلان تۇسىپبەكوۆ  يۋنەسكو-دان قازاق ءتىلىن ءقاۋىپسىز تىلدەر قاتارىنا ەنگىزۋدى سۇراپ، ءوتىنىش ءبىلدىردى. 

"جويىلىپ كەتۋ ءقاۋپى بار ءتىل تەك تۇرمىستىق جاعدايدا عانا قولدانىلادى. ال ءبىلىم سالاسىندا ياعني مەكتەپتەر مەن جوو-دا قولدانىلماعان ءتىل جويىلىپ كەتۋ ءقاۋپى بار تىلدەردىڭ قاتارىنا ەنگىزىلەدى. ءقازىر جويىلۋ ءقاۋپى بار تىلدەردىڭ قاتارىنا قازاق تىلىنەن بولەك بەلورۋس، باشقۇرت جانە چۋۆاش ءتىلى بار.

ءيا، بەلورۋس ءتىلىنىڭ جاعدايى تۇسىنىكتى. بەلورۋسسيا ەلىندە تۇرعىنداردىڭ كوپشىلىگى انا ءتىلىن بىلەدى، الايدا ستۋدەنتتەردىڭ 98 پايىزى ورىس تىلىندە ءبىلىم الادى. سونىمەن بىرگە وقۋشىلاردىڭ كوپشىلىگى ورىس مەكتەپتەرىندە وقيدى.

قازاق ءتىلىن بەلارۋس تىلىمەن سالىستىرۋ اقىلعا قونبايدى. سەبەبى قازاقستاندا وزگە ۇلت وكىلدەرىن قاتار ەسەپتەگەننىڭ وزىندە وقۋشىلاردىڭ 75 پايىزى قازاق تىلىندە ءبىلىم الادى. ال قازاقتاردىڭ قازاق مەكتەبىندە ءبىلىم الۋ كورسەتكىشى 90 پايىزعا تەڭ.

ەلىمىزدەگى وقۋ ورىندارىندا دا وسىنداي جاعداي. جالپى ەسەگەندە 70 پايىز ستۋدەنتتەر قازاق تىلىندە ءبىلىم السا، قازاق تىلىندە ءبىلىم الاتىن قازاق ستۋدەنتتەرىنىڭ تازا كورسەتكىشى 85 پايىزعا جۋىقتايدى.

تاعى ءبىر ايتا كەتەرلىگى، بەلارۋس تىلىندە سويلەيتىندەردىڭ سانى 6 ملن ادامعا جۋىقتاسا، قازاق تىلىندە 15 ملن.

ءبىراق ەڭ باستىسى تاۋەلسىزدىك العاننان كەيىنگى از عانا ۋاقىتتا قازاق ءتىلى قارىشتاپ دامىدى. قازاقستانداعى قازاق تىلىندە سويلەيتىن ادامداردىڭ سانى 2 ەسەگە ءوستى جانە ءالى دە ءوسۋ ۇستىندە.

ال قازاق ءتىلىن باشقۇرت نەمەسە چۋۆاش تىلىمەن سالىستىرۋ مۇلدەم دۇرىس ەمەس. قازىرگى ۋاقىتتا وكىنىشكە وراي باشقۇرتتار مەن چۋۆاشتار ءوز تاۋەلسىزدىگىن العان جوق.

سول سەبەپتى يۋنەسكو، قازاق ءتىلىن جويلىپ كەتۋ ءقاۋپى بار تىلدەردىڭ قاتارىنان الىپ، ءقاۋىپسىز تىلدەر قاتارىنا قوسۋدى وتىنەمىن"، دەپ جازادى رۋسلان تۇسىپبەكوۆ ءوزىنىڭ فەيسبۋك پاراقشاسىنا.