نۇرلان ابدۋللين — تانىمال ءانشى، پروديۋسەر، شوۋمەن، ق ر ەڭبەگى سىڭگەن قايراتكەرى عانا ەمەس، قارجى الەمىندە باعى جانعان بيزنەسمەن. ونىڭ رەسمي تۇردە «AG Studio» جانە «Nort-A» جشس-دە ۇلەسى بار. وعان قوسا، ابدۋللين مىرزا «ينتەلەكتۋالدىق قۇقىق قورعاۋ قوعامىنىڭ» نەگىزىن سالۋشىلاردىڭ ءبىرى.

«AG Studio» كومپانياسىن ول 36-جاسار بەلگىلى كومپوزيتور رينات گايسينمەن بىرگە باسقارادى. رەسمي دەرەكتەرگە سۇيەنسەك، اتالعان فيرما، ساۋدا سالاسىنا تارتىلعان. ال «Nort-ا» كومپانياسى كونسەرت باعىتىندا جۇمىس جاسايدى. نۇرلان ابدۋللين مەن رينات گايسيننەن بولەك سەرىكتەستەر قاتارىندا ولگا گەرمان مەن تولەگەن مۇحامەدجانوۆ بار.

تولەگەن مۇحامەدجانوۆتىڭ ەسىمى دە كوپكە تانىس. اقىن، سيمفونيا، وپەرا مەن كامەرالىق شىعارمالاردىڭ،سونىمەن قاتار كينوفيلمدەردەگى اۋەندەردىڭ اۆتورى. «نيەۆادا-سەمەي» قوعامدىق قوزعالىسىنىڭ بەلسەندى مۇشەسى. ق ر پارلامەنت سەناتىنىڭ ەكس-دەپۋتاتى.

ال، نۇرلان ابدۋللين 1964 جىلى 6 قىركۇيەكتە دۇنيەگە كەلدى. ساۋلەت-قۇرىلىس ينستيتۋتىنىڭ تۇلەگى ەڭبەك جولىن مەكتەپتە، دەنە تاربيەسى ءمۇعالىمى بولىپ باستاعان. بۇگىندە «پارىز» قايىرىمدىلىق قورى مەن «الا» شىعارماشىلىق بىرلەستىگىن باسقارادى. «قازاقمىس» كورپوراسياسى پرەزيدەنتىنىڭ مادەنيەت جونىندە كەڭەسشىسى، سونىمەن قاتار «دۋەت KZ » Magic of Nomads مۋزىكالىق جوبالارىنىڭ اۆتورى. كوپتەگەن تەلەارنالاردا ارنايى جوبالاردى جۇرگىزدى، جارناماعا ءتۇستى. Forbes.kzء-تىڭ 2014 جىلعى مالىمەتىنە سايكەس شوۋ-بيزنەس جانە سپورت وكىلدەرىنىڭ 25-تىگىندە 19-ورىنعا تۇراقتاعان. ياعني، ءبىر جىلدىق كىرىسىنىڭ باعاسى – 1،9 ملن دوللار.

جاقىندا الماتىدا مەرەيتوي-كونسەرتىن وتكىزگەن نۇرلان ابدۋللين ەندى ماسكەۋدە جۇمىس ىستەمەك. رەسەي پروديۋسەرلەرى قازاق انشىسىمەن ىسكەرلىك قارىم قاتىناس ورناتۋعا نيەت ءبىلدىرىپ وتىر.