ءبىراز بۇرىن قازاقستانعا التايدان ەكى اۋىلداسىم كوشىپ كەلدى. بىرەۋى شىعىس قازاقستاننىڭ زايسان اۋدانىنا، ەكىنشىسى تالدىقورعاننىڭ كوكسۋ اۋدانىنا قونىستاندى. ەكەۋى دە ەكپىندى جاس جىگىتتەر، بالا-شاعاسى بار.
ءبىراق، ولارمەن حابارلاسا قالسام كوشى-قون تۋرالى زاڭ نە بولىپ جاتىر دەپ سۇرايدى. سەبەبى، تۇراقتى تىركەۋگە تۇرا الماي ءجۇر، ىقتيار حات، ازاماتتىق الىپ ورنىعايىن دەسە، جەرگىلىكتى اكىمدىك «زاڭ شىقپاي جاتىر» دەپ كەرى قايتارادى. جۇمىس ىستەي بەرەيىن دەسە قۇجاتى جوق، بىرەۋى بالاسىنىڭ پاسپورتىنىڭ ۋاقىتى ءبىتىپ بارا جاتقانىن ايتادى. كەلگەلى جىلعا جۋىقتادى. باستارى شاراداي بولىپ، ماڭگىرىپ وتىر.
ال، پارلامەنت كوشى-قون زاڭىن «شالدىڭ اۋزىنداعى ساعىزداي» سوزىپ، ءالى مىجعىلاپ جاتىر. ازاماتتىق الۋدى ءبىر جىلعا قىسقارتامىز دەپ، وتىرىك ەمەكسىتكەلى دە ەكى جىلعا جۋىقتادى. ارا-تۇرا، دۇيسەنوۆا، قارجاۋبايەۆ تاعى باسقالار «بويتكەلى جاتىرمىز، سويتكەلى جاتىرمىز» دەپ الداۋسىراتىپ قويادى. ولار «ءويتىپ-بويتىپ» بولعانشا قولىندا قۇجاتى جوق اعايىن ومالىپ وتىرا ما؟ انا سىلتاۋ، مىنا سىلتاۋمەن كەلگەن قازاقتىڭ جۇيكەسىن، شىدامىن تاۋسىپ، كەلمەگەن قازاقتىڭ بەتىن قايتارىپ، ايەتۋىر ۇلتتىڭ بەرەكەسىن قاشىرۋدىڭ جىمىسقى ءتاسىلىن ىستەپ-اق جاتىر. (جاعدايعا قاراي وسىلاي ويلاۋعا ءماجبۇر بولاسىڭ.)
ەگەر، پرەزيدەنت تەز قاراڭدار دەپ ناقتى تاپسىرما بەرسە، تۋلاقشا تارتقىلاپ جۇرگەن زاڭدى دەپۋتاتتار ءبىر اپتادا وزگەرتىپ، دايىن قىلار ەدى. ءبىراق، ونداي تاپسىرما جاڭا سايلاۋعا تۇسكەلى جاتقان پرەزيدەنتتەن بولماي تۇر. «باسەكەلەستەرىمەن» بولاتىن سايلاۋعا قىزۋ كىرىسىپ، قولى تيمەي جاتقان سەكىلدى. مۇمكىن، سايلاۋدان كەيىن زاڭدى وزگەرتىپ، ۇمىتتەنىپ جۇرگەن قانداستاردىڭ كوڭىلىنە قۋانىش سىيلار، ولاي بولماسا كەلگەن قازاقتىڭ كۇنى قيىنداي تۇسەدى...
مۇرات الماسبەك ۇلى، Facebook پاراقشاسىنان
