بولليۆۋدتىڭ اكتەرى اميتابح باچچان ۋتتار پرادەش شتاتىنداعى 1398 اۋىلداسىنىڭ قارىزىن جاۋىپ بەرىپتى. $560 ملن سومانى يگى ماقساتتا جۇمساعان تالانتتى تۇلعانىڭ بۇل ارەكەتى شەتەل جۋرناليستەرىنىڭ نازارىنا ءتۇستى. اتاپ ايتقاندا BBC سايتى كولدەي ءبىر ماقالانى اميتابحتىڭ قايىرىمدىلىعى مەن قاراپايىمدىلىعىنا ارنادى.

بەلگىلى بولعانداي، 1995 جىلدان بەرى 300 000 فەرمەر قيىندىققا توتەپ بەرە الماي، قارىزعا بەلشەسىنەن باتىپ، ءوز ومىرلەرىن قيعان. قۇرعاقشىلىق، ونىمدىلىكتىڭ جەتىسپەۋشىلىگى، مودەرنيزاسيانىڭ جوقتىعى ولاردى وسى قادامعا بارۋعا ماجبۇرلەگەندەي. وسىنى جاقسى بىلەتىن اميتابح باچچان سونىمەن قاتار مۋمبايدىڭ ماحاراشترا شتاتىنداعى 350 فەرمەردىڭ نەسيەسىن تولەپ بەرگەن. فەرمەرلىك جەرلەرگە بايلانىستى داۋلارعا دا بەلسەنە ارالاسقان بولاتىن.

$560 ملن سومانى ۇلتتىق بانكتىڭ يەلىگىنە وتكىزگەن اكتەر كەيىنىرەك جەرلەستەرىمەن جولىعىپ، قارىزدارى جوق ەكەندىگىن راستايتىن قۇجاتتى قولدارىنا تاپسىراتىنىن ايتىپتى.

جاسى 76-عا كەلسە دە قوعامدىق ومىردەن الىستاماعان باچچاننىڭ تەك قانا اكتەر ەمەس، ءوز ەلىن، جەرىن شەكسىز سۇيەتىن ءۇندىستاننىڭ سۇيىكتى ۇلى ەكەندىگىن مويىنداۋعا نەگىز بار.