قازاق ءتىلدى ينتەرنەت كەڭىستىگى سوڭعى جىلدارى جاڭا سەرپىنمەن دامىپ كەلە جاتىر. مۇنداعى ويىن-ساۋىقتىق ءارى «تانىس-بىلىستىك» جەڭىل-جەلپى كونتەنتتىڭ ورنىن سالماقتى تانىمدىق ماتەريالدار مەن ساپالى سۋرەت-ۆيدەولاردىڭ قاراسى باسۋدا.

2014 جىلى وتكەن «بلوگيادا» بايقاۋى قالام-فوتواپپارات ۇستاعان تالاي جاستىڭ بلوگەرلىكپەن شىنداپ كىرىسۋىنە مۇرىندىق بولدى دەسەك، ارتىق ايتقاندىق ەمەس. سونداي-اق، ناۋرىزدىڭ 26-سىندا باستالعان «قازاقيا-2015» بايقاۋى دا قازنەتكە جاڭا لەپ اكەلىپ وتىر. الدىن الا ەكى تۋر ارقىلى ىرىكتەلىپ الىنعان ۇمىتكەرلەر توبى ۇلان-عايىر قازاق دالاسىن جالعاپ جاتقان شويىن جول بەكەتتەرىن باسىپ ءوتىپ، كورگەن-تۇيگەندەرىن وقىرمانمەن ءبولىسىپ وتىردى. قالىڭ قازاق كوك جاشىكتەن كورە بەرمەيتىن، قاعاز گازەتتەن وقي بەرمەيتىن اقپاراتتى عالامتور ارقىلى لەزدە ءبولىسىپ وتىراتىن مۇنداي ءموبيلدى جوبا بۇرىن-سوڭدى بولماعان.

ءبىر اۋماقتان ءبىر مەزەتتە سان ءتۇرلى كوزقاراس پەن سان ءتۇرلى اقپاراتتىڭ وقىرمانعا بەرىلىپ وتىرۋى – قازاق بلوگەرلەرىنىڭ قارىم-قابىلەتىن جاڭا دەڭگەيگە كوتەرىپ تاستادى. وسى تۇرعىدا، ەگەر «قازاقيا-2015» جوباسى الداعى جىلدارى دا جالعاسىن تابار بولسا، جاستار اراسىندا اشىق باسەكە مەن تەڭدەسسىز تاجىريبەگە ۇندەيتىن تاۋەلسىز جۋرناليستىك مەكتەپكە اينالۋى مۇمكىن. بيىلعى جىلعى بايقاۋدىڭ باستى لوزۋنگىسى – «ەلىڭدى تانى» ەكەن.

ياعني، بلوگەرلەر جورىعى ءتۇرلى ايماقتىڭ ەكونوميكاسى، مادەنيەتى، الەۋمەتتىك جاعدايى، سونداي-اق ءداستۇرلى تانىمى جايلى ساپالى ماتەريالدار جازىپ، قازىلاردىڭ باعالاۋىنا تاپسىرادى. اتاپ وتەرلىگى، سايىستا سىنعا تۇسەتىن ماتەريالداردىڭ نەگىزگى جاريالانىم الاڭى – الەۋمەتتىك جەلىلەر. ونىڭ ىشىندە فەيسبۋك ارقىلى كوپشىلىككە ۇسىنىلعان فوتو-ۆيدەو جانە ماتىندىك ماتەريالداردىڭ كورىلىم سانى، ۇناتۋ باتىرماسىنىڭ، سونداي-اق ءبولىسۋ سانىنىڭ جيىنتىعى ەسكەرىلە وتىرىپ، قازىلاردىڭ شەشىمىمەن جەڭىمپاز انىقتالادى. جوبانىڭ جۇلدە قورى – 1 000 000 تەڭگە.

«قازاقيا-2015» بلوگ-ساپارىنىڭ سوڭعى نۇكتەسى – استانا قالاسى بولماق. ۇمىتكەرلەر اراسىنداعى باسەكە مارەگە جاقىنداعان سايىن قىزا ءتۇسىپ، وقىرمان اراسىندا ءتۇرلى تالقىلاۋلار جۇرۋدە. «التەل» كومپانياسى قولداۋ بىلدىرگەن سايىستىڭ جەڭىمپازدارىنىڭ ەسىمى 22 ساۋىردە بەلگىلى بولادى.