قازاق ينتەرنەتىندە بۇعان دەيىن بالاماسى بولماعان «قازاقيا 2015» بلوگ-ساپار بايقاۋىنا قاتىسۋشىلار ءوز جورىقتارى قاراعاندى ايماعىنداعى تەمىرتاۋ قالاسىندا ءتامامداپ، جاڭاارقا مەكەنىنە كەلىپ جەتتى.

وسىعان دەيىن الماتى، سارىوزەك، ۇشتوبە، اياگوز، ريددەر، سەمەي، اقسۋ-2، ەكىباستۇز، تەمىرتاۋ ەلدى-مەكەندەرىن باسىپ وتكەن جوبا قاتىسۋشىلارى ءقازىردىڭ وزىندە پوتەنسيالدى 100 000 قولدانۋشىسى بار اۋديتوريانى قامتي وتىرىپ، الەۋمەتتىك جەلىنى 180-گە تارتا قىزىقتى، تاريحي، تانىمدىق كونتەنتپەن تولىقتىردى. «قازاقيا 2015» قاتىسۋشىلارى ءار وڭىردىك وزىنە ءتان ەرەكشەلىكتەرىن فوتو، بەينە، اۋديوماتەريالدان باستاپ، رەپورتاج، ينفوگرافيكا، «ءبىر سۋرەتپەن»، «ءبىر سويلەممەن» فورمالارىندا جارىسا جازۋدا.

18 ساۋىردە ەكىباستۇز قالاسىنا ات باسىن بۇرعان بلوگەرلەر بۇل قالانىڭ شاما كەلگەنشە كومىرمەن بايلانىسسىز تۇستارىن اشۋعا تىرىستى. مىسالى، سەرىكبول حاسان قازاقتىڭ قولونەرىنەن شەبەر بولعان دميتريي فيليپپوۆتى سۇحباتقا تارتىپ، ونەر مەكتەبىن ارالادى. بيجان سادىبەكوۆ بولسا، سارىارقانى سۋمەن قامتىپ وتىرعان ەرتىس-قاراعاندى كانالىن ءتۇسىرىپ، قالاداعى تانىمال گراففيتيشىمەن ۋاقىت وتكىزسە، امانگۇل مادەتحان قىزى جەرگىلىكتى ۋوركاۋتەرلەردىڭ ونەرىن تاسپالاپ، وسى وڭىردەن العاشقى كەندى اشقان قوسىم پىشەنبايەۆ تۋرالى دەرەكتەرگە قانىق ەتتى. ال اقبوتا مۇسابەك قىزى بولسا، قالاداعى يپپودروم مەن ءبايىت اۋىلىنىڭ تۇرمىس-تىرشىلىگىن شىنايى سۋرەتتەگەن پوستتارىمەن ءبولىستى. امانبەك ماعزۇمحان «شەبەرلەر شاڭىراعى» دەگەن پوستىندا قازاق قولونەرىن ساقتاپ قالعان ازدىڭ ءبىرى – زىليحا تولەگەنوۆا جايلى جازىپ، قالا تۇرعىندارىنىڭ اكىم تۋرالى پىكىرىن جيناسا، نۇربەك بەكباۋ «ءبىزدىڭ مەكتەپتى بىتىرگەن بىردە-بىر قىز اجىراسقان ەمەس» دەپ، قازاقستان بويىنشا تەك قىزدار وقيتىن جالعىز گيمنازيا تۋرالى تولىق رەپورتاج دايىنداپ، قالاداعى اەروكلۋبتىڭ جۇمىسىمەن تانىستىردى. مەيىرمان ساۋرانبەك بولسا، وسى توپىراقتا تۋىپ، گيننەستىڭ رەكوردتار كىتابىنا 7 رەت ەنگەن جەلاياق مارات جىلانبايەۆتى زەرتتەپ، قالاداعى قوناقۇيلەر سەرۆيسىن دە باعالاي كەتسە، ەلۆيرا ەرعالينا ەڭ ارزان تويدىڭ ەكىباستۇزدا ەكەنىن دالەلدەۋمەن قاتار، ەكى اياعىنان جۇرە المايتىن ساكەننىڭ مىسالىندا ءومىر ءسۇرۋدىڭ قانشالىقتى قۇندى ەكەنىنە شاقىرادى.

بلوگەرلەر توبىنىڭ 19 ساۋىردەگى تەمىرتاۋ قالاسىنداعى ساپارى قازاق ينتەرنەتىن، ونىڭ ىشىندە الەۋمەتتىك جەلىلەردى مەيىرمان ساۋرانبەكتىڭ اڭشىلىق پەن بالىق اۋلاۋ، بيجان سادىبەكوۆتىڭ جاستار باسسەينى، ەلۆيرا ەرعالينانىڭ ەتتىڭ نانىن شىعاراتىن كاسىپورىن مەن ترامۆاي جۇمىسى، امانگۇل مادەتحان قىزىنىڭ تۋ ءىلۋ، اقبوتا مۇسابەك قىزىنىڭ قىسقى ب ا ق، سامارقان سۋ قويماسى جانە ءشامشىنىڭ «تامدى ارۋىنداعى» كەيىپكەر تۋرالى ماتەريالدارىمەن تولىقتىردى. بۇدان بولەك نۇربەك بەكباۋ قالا كوللەدجدەرىنە قويىلعان كوندوماتتاردىڭ پايدا-زيانىن تەكسەرسە، نۇرلىحان قالقامان ۇلى سۋ استىنا كەتكەن چكالوۆ اۋىلىنىڭ بۇگىنگى حالىمەن تانىستىردى.

بايقاۋ اياسىندا جازىلعان جازبالاردى جوبانىڭ الەۋمەتتىك جەلىدەگى پاراقشالارى مەن #qazaqia2015 حەشتەگى ارقىلى، سونداي-اق، qazaqia2015.kz رەسمي سايتىندا تانىسۋعا بولادى.

«التەل» كومپانياسى قولداۋ بىلدىرگەن جوبانىڭ جەڭىمپازدارى – 22 ءساۋىر كۇنى استانادا بەلگىلى بولادى.