جاقىندا قۇرىلعانىنا 15 جىل تولعان “وردا” توبىنىڭ مۇشەلەرى Comode.kz سايتىنا سۇحبات بەرىپ، وتاندىق شوۋ-بيزنەستىڭ كوشباسىندا تۇرعان قايرات نۇرتاستى سىنعا الدى.

“وردالىقتاردىڭ” پىكىرىنشە، قايراتتىڭ شىعارماشىلىعىن ۇلتتىق مۋزىكا كورىنىسى دەپ تانيتىن تىڭدارماندار قاتەلەسىپ وتىر. “مىسالى، دومبىرا – ءشامشى قالداياقوۆتىڭ تۋىندىلارى سەكىلدى ۇلتتىڭ ماقتانىشى. ءبىراق بۇل 100% ۆالس، ياعني نەمىس كومپوزيتورلارىنىڭ شىعارماشىلىعىنداعى سارىندى دا بايقاۋعا بولادى. سوندىقتان بىزگە دە “بۇل ءبىزدىڭ ۇلتتىق مۋزىكامىز، ال سەندەر باسقا نارسە ىستەپ جۇرسىڭدەر” دەگەن حالىقتى تۇسىنبەيمىز. بۇل دۇرىس ەمەس، ويتكەنى، ءبىز دە وسىنداي قازاق اۋەندەرىن دايىنداۋدامىز”، – دەيدى اعايىندى بەدەلحاندار. تانىمال انشىلەر قازاقستانداعى شوۋ-بيزنەستىڭ بولاشاعىنا الاڭدايدى. قايرات نۇرتاستىڭ وتاندىق شوۋ-بيزنەستە فەنومەن اتانۋى قازاقستانداعى مۋزىكانىڭ قاي دەڭگەيدە ەكەنىن كورسەتسە كەرەك. “وردا” توبىنىڭ مۇشەلەرى ۇلتتىق مۋزىكانى جاساندى مۋزىكادان اجىراتا ءبىلۋ قاجەت دەيدى. مۋزىكانتتاردىڭ پىكىرىنشە، رەسەيلىكتەردىڭ ءوزى كەزىندە دۇركىرەگەن “لاسكوۆىي ماي” ءانى مەن سونى تىڭدايتىن زاماننان ءوتىپ، باسەكەگە قابىلەتتى مۋزىكاعا كوشكەن. “ءاندى قالاي شىرقاۋ كەرەكتىگىن حالىق ايتاتىن بولسا، قايرات نۇرتاس سەكىلدى انشىلەر شىعادى. الايدا مۋزىكانىڭ مىقتىلىعىن انىقتايتىن مۋزىكانت قانا. ول حالىققا جول تارتاتىن ءونىم ءۇشىن جاۋاپتى. سوندىقتان، كاسىبي تاڭداۋ جاساۋدى مۋزىكانت ءوز قولىنا الادى. مىسالى، حالىق ديزاينەرگە تالاپ قويىپ، “سەن كيىمدى دۇرىس تىكپەدىڭ. ودان دا، بىلاي ىستەيىك”، – دەپ ايتاتىن بولسا، بارلىق كيىم ينكۋباتوردان شىققانداي بولىپ كەتپەي مە؟ مىنە اتالعان ءارتىستىڭ اينالاسىنداعى وقيعالار وسىعان ۇقساس. كاسىبي شەبەرلىك جوق جەردە الۋان تۇرلىلىك تە جوق. سوندىقتان، ەڭ باستى نارسە – ساپا دا بولمايدى”، – دەيدى اعايىندى مۋزىكانتتار. ەسكە سالا كەتەيىك، وسىعان دەيىن ايگىلى وپەرا ءانشىسى بيبىگۇل تولەگەنوۆا دا قايرات نۇرتاستى سىناپ، ونىڭ اندەرىن تىڭدامايتىنىن ايتقان بولاتىن.