تۋعان ۇلدان تويوتانى ارتىق كورگەندەر ۇزاق مەرزىمگە تەمىر تورعا قامالدى. بۇگىن استانا سوتى ەرلى-زايىپتىلارعا 7 جىل ۇكىم كەستى.

 سەبەبى تاسباۋىر كەلىنشەك كۇيەۋىمەن سىبايلاسىپ جاڭا تۋعان شاقالاعىن كولىككە ايىرباستاماق بولعان دەپ حابارلايدى كتك ارناسى. ءبىراق قىلمىس ۇستىندە قولعا ءتۇستى. 3 اي تەرگەلگەن اتىشۋلى ءىس بۇگىن نەبارى 3 ساعاتقا سوزىلدى. ال ۇكىمدى ەستىگەندە، تۋعان بالاسىنان بەزىنگەن ايەل جىلاپ جىبەردى. جاڭا تۋعان ۇلىن ساۋداعا سالامىن دەپ جاس جۇبايلاردىڭ كۇللى ەلگە اتى شىقتى.  قۇرساعىن جارىپ شىققان ءسابيىن ساتىپ بايىماق بولعان انا دا نە ىستەپ قويعانىن ەندى تۇسىنگەندەي. ءبىراق قاڭتار ايىندا ويىنا تۇك كىرمەگەن ەدى. 3 اي بۇرىن ليۋبوۆ تۇكەنوۆا پەرزەنتحانادان شىققان بويدا، قۇنداقتاۋلى بوبەگىنەن قۇتىلۋعا اسىقتى. الايدا “ءتىرى تاۋاردى” كۇيەۋىمەن بىرگە تويوتوعا ايىرباستاپ جاتقاندا قولدارىنا كىسەن سالىنعان بولاتىن.

جاس وتباسىنىڭ ينتەرنەتكە جاريالاعان حابارلاندىرۋىن پوليسەيلەر وقىپ قويىپتى. ءسويتىپ ساتىپ الۋشىنىڭ كەيپىنە ءتارتىپ ساقشىلارى ەنگەن.

ەندى ولار سايت مودەراتورىن جازالماق ويدا. ىسكە اسپاعان ساۋدادان سوڭ 4 كەلى بوپ تۋىلعان بالپاناقتاي ۇل ءقازىر استاناداعى بالالار ۇيىندە تاربيەلەنىپ جاتىر. تۋعان بوبەگىنەن بەزىنگەن ەرلى-زايىپتىلار جايلى تۇرمىس ىزدەپ وزبەكستاننان كەلگەن ەكەن. 25 جاستاعى بەزبۇيرەك انا وزبەكستان ازاماتى. ال 29 جاستاعى كۇيەۋى ءوز وتانداسىمىز. وسىلايشا، 3 ميلليون تەڭگەنىڭ تويوتاسىن مىنبەك بولعاندار تۇرمەدەن ءبىر شىقتى. “ليۋبوۆ تۇكەنوۆا، امانبەك تۇكەنوۆ كىنالى دەپ تانىلىپ 7 جىلعا باس بوستاندىقتارىنان ايىرىلسىن. دۇنيە-مۇلكى تاركىلەنىپ، جازاسىن قاتاڭ رەجيمدەگى تۇرمەدە وتەسىن”، – دەدى سۋديا يۆان كەرن.

مۇنداي ۇكىمدى كۇتپەسە كەرەك كەلىنشەك جىلاپ جىبەرە جازدادى. ءتىپتى سۋديادان اياقاستى قالعان بالارىنىڭ تاعدىرىنا الاڭدايتىنىن ايتتى.

اقشاعا قۇنىققان بۇل ەكەۋدىڭ بالاعا قىساستىق جاساعانى تەك بۇل ەمەس. ۇلكەن قىزدارى 8 جىلدان بەرى جەتىمدەر ۇيىندە تاربيەلەنىپ جاتىر ەكەن. ال 4 جاسار ۇلى وزبەكستاندا تۋىستارىنىڭ قولىندا. بۇگىن ۇلى مەن كەلىنىنەن كوڭىلى قالعان شەشەسى سوتتان ولاردى قارعاپ شىقتى. ال اكە-شەشەسى بەزىنگەن ۇلعا 3 اي تولعان. بالالار ۇيىندەگىلەر وعان ارمان دەگەن ەسىم بەرىپتى. دەنى ساۋ، جەتىلۋىندە كىنارات جوق بالا ەندى باسقا وتباسىنىڭ اسىرۋىنا بەرىلۋى مۇمكىن. ال ەرلى-زايىپتى تۇكەنوۆتەردىڭ ادۆوكاتى اپەللياسيالىق شاعىمنان باس تارتتى. سوندىقتان تاسباۋىر اتا-انا بىردەن اباقتىعا جىبەرىلەتىن بولادى.