بۇرىن قارۋلانۋعا اسا ءمان بەرە بەرمەيتىن جاپونيا ءقازىر الاڭداۋلى. مۇنىڭ سەبەبى دە بار شىعار. ويتكەنى وسى ايماقتا ءالى دە ءقاۋىپ بار. سەبەبى، بۇكىل الەم، اسىرەسە جاپونيا سولتۇستىك كورەياعا قاراپ الاڭدايدى. ازىرگە سولتۇستىكتەگى كارىستەر يادرولىق سىناق جاساۋدى توقتاتسا دا، ءبىراق قاتەر ازايماي وتىر. سوندىقتان دا بولار، جاپونيا الداعى ۋاقىتتا اسكەري ماقساتقا، اسىرەسە ەلدى قارۋلاندىرۋعا قوماقتى قارجى بولەتىنىن جاريا ەتتى.

كەشە جاپون ۇكىمەتى Lockheed Martin F-35 Lightning II تيپىندەگى 105 يسترەبيتەلدى ساتىپ الاتىنىن مالىمدەدى. وعان ەل قازىناسىنان دا قارجى ءبولىنىپ قويدى. ولاردىڭ ىشىندە  42  F-35B يسترەبيتەلدەرى بار. بۇل عانا ەمەس، الداعى بەس جىلدا جاپونيا F-35  مودەلىندەگى 45 اسكەري ۇشاق ساتىپ الاتىنىن ءمالىم ەتتى. بۇل جاپون اۋە قارۋلى كۇشتەرىنىڭ قۋاتىن كۇرت ارتتىرادى. سونداي-اق جاپوندىقتار پيلوتسىز باسقارىلاتىن اپپاراتتاردىڭ سانىن دا   ارتتىرۋدى جوسپارلاپ وتىر. بۇل عانا ەمەس، اسكەري تەڭىز ايلاعىنىڭ قۋاتىن كۇشەيتپەك بولىپ وتىرعان جاپوندىقتار تەڭىزدە دە پاترۋلدىك ۇشاقتاردى كوبەيتپەك. تەز جانە جىلدام ۇشاتىن اسكەري يسترەبيتەلدەر قوناتىن جانە بىردەن اۋەگە كوتەرىلەتىن ۇشاقتاردى قوندىراتىن Izumo كەمەسىن ساتىپ الۋ دا الداعى بەسجىلدىقتىڭ ەنشىسىندە. ەلدىڭ كيبەرقاۋىپسىزدىگىن نىعايتۋ مەن عارىش سالاسىندا جاپوندىقتاردىڭ ۇلەسىن ارتتىرۋ دا باستى جوسپاردا تۇر. وعان دا ءتيىستى قارجى ءبولىندى.

دەمەك، بۇدان شىعاتىن قورىتىندى نە؟ قاۋىپسىزدىك – باستى نازاردا. بەيبىت ەل رەتىندە كورىنەتىن جاپوندىقتاردىڭ جانتالاسا قارۋلانۋى تۇسىنۋگە تۇرارلىق. ويتكەنى سولتۇستىك كورەيادان اتىلعان تالاي وقتۇمسىق جاپون تەڭىزىنە بارىپ قۇلاعان. دونالد ترامپ پەن كيم چەن ىن وسىدان تورت-بەس اي بۇرىن جولىعىپ، كۇردەلەنگەن جاعدايدى جەڭىلدەتۋگە تىرىسقانىمەن، ماسەلە  تۇبەگەيلى شەشىلدى دەۋگە ءالى ەرتە. جاپونداردىڭ دا جانتالاسا قارۋلانۋعا ۇمتىلىپ وتىرعان سەبەبى وسى. ويتكەنى ولار كورەيا جارتى تۇبەگىنە قاراپ الاڭدايدى...