كەلەر جىلى –ۋكراينادا پرەزيدەنتتىك سايلاۋ. پەتر پوروشەنكو ورىنتاعىن ساقتاپ قالا ما، جوق پا؟ ارينە، ونى ۋاقىت كورسەتەدى. ءبىراق انىعى، كوپ نارسە رەسەي مەن ۋكراينانىڭ اراقاتىناسىنا قاتىستى بولىپ تۇر. دەسەك تە، ساراپشىلار پوروشەنكونىڭ جەڭىستى قولدان بەرمەۋگە بارىنشا تىرىساتىندىعىن ايتۋدا. ال اقش-تا دونالد ترامپقا قارسىلار از ەمەس. كەلەر جىلى اقش پرەزيدەنتىنە يمپيچمەنت جاريالانۋى مۇمكىن بە؟ 2019 جىلى جاپونيا مەن رەسەي كۋريل ارالدارىنا قاتىستى مامىلەگە كەلە مە؟ ال لۋكاشەنكوعا سەنۋگە بولا ما؟ ساۋالدار كوپ...
–"حالىق تاڭداۋىنا سالساق، پەتر پوروشەنكونىڭ جەڭىسكە جەتۋى ەكىتالاي. ول وسىدان ءبىراز ۋاقىت بۇرىن كەرچ بۇعازىندا بولعان وقيعانى پايدالانىپ، ەلدە 60 كۇن اسكەري جاعداي جاريالاۋعا تىرىستى. ءبىراق جوعارى رادا 30 كۇنگە عانا كەلىسىمىن بەردى. سوندىقتان ءالى دە ءوزىنىڭ پرەزيدەنتتىك قۇقىن پايدالانىپ، پوروشەنكو باسقا دا قادامدارعا بارۋى مۇمكىن. قالاي ايتقاندا، قازىرگى ۋكراينادا ءسوز بوستاندىعى بولعانىمەن، اۆتوريتارلىق جۇيەنىڭ ازداعان بەلگىلەرى بايقالادى. سوندىقتان كەلەر كوكتەمدە ونىڭ ورنىنا باسقا ليدەر كەلەدى دەۋ قيىنداۋ.
ال اقش پرەزيدەنتى دونالد ترامپقا كەلەر بولساق، وعان يمپيچمەنت جاريلانادى دەۋ قاتە. بۇل نۇسقا جۇزەگە اسپايدى. ويتكەنى، سەنات –رەسپۋبليكاشىلداردىڭ باقىلاۋىندا. ءبىراق امەريكادا ترامپقا قارسى وراسان زور كولەمدە نارازىلىق كامپانياسى جۇزەگە اسىپ جاتىر. ونى جوققا شىعارۋعا بولمايدى. سونداي-اق، اق ءۇيدىڭ حالىقارالىق ساياساتتاعى رەسەي، يران، جۇڭگو مەن سولتۇستىك كورەياعا قاتىستى ساياساتىن اقش كونگرەسى رەتتەپ وتىر. مۇنى ترامپتىڭ ءوزى دە سەزەدى. سوندىقتان حالىقارالىق ارەنادا ءوزىنىڭ الپاۋىت ەلدىڭ ليدەرى ەكەندىگىن كورسەتۋ ءۇشىن ول كەز كەلگەن ۋاقىتتا قانداي دا ءبىر توسىن ارەكەتتەرگە بارۋى مۇمكىن. ءبىراق ءبىز مىنانى ءتۇسىنۋىمىز كەرەك، ول حالىقارالىق دەڭگەيدەگى ليدەر ەمەس، الەمگە الىمجەتتىك جاساۋعا تىرىساتىن بۇزاقى ادام عانا. دەگەنمەن، بۇل ونىڭ حالىقارالىق ارەنادا پوتەنسيالى جوق دەگەن ءسوز ەمەس. ونىمەن كەزدەسىپ، كەلىسسوزگە وتىرۋدىڭ ءمان-ماڭىزى شامالى. ترامپ – نيكسون، فورد نەمەسە رەيگان ەمەس. كىشى دجوردج بۋش، باراك وباما دا اقش-تىڭ ساياساتىن مەن مۇددەسىن جوعارى دەڭگەيدە جۇزەگە اسىردى.
ال دونال ترامپقا ءقازىر پرەزيدەنتتىككە قايتا سايلانۋى كەرەك. سول ءۇشىن ول ءار قادامىن وزىنە پيار جاساۋعا پايدالانادى. امەريكانىڭ ساياساتىن مىقتاپ جۇزەگە اسىرادى. ول امەريكانىڭ باسقا پرەزيتدەنتتەرىنە قاراعاندا جۇمساق، الەمگە ادىلەتتىلىك اكەلەدى دەۋ – اقىماقتىق.
ترامپ رەسەيدى الەمدەگى ەڭ قۋاتتى يادرولىق مەملەكەت بولعاسىن عانا مويىنداپ وتىر. ويتكەنى رەسەي عانا اقش -قارسى قارسى سوققىمەن جاۋاپ بەرە الادى.
ال جاپونياعا كەلسەك، ولارعا قيىر شىعىستاعى ارالداردى ەشقاشان بەرۋگە بولمايدى. مىسالى، ءبىز كەزىندە قىرىم تۇبەگىن ۋكرايناعا بەردىك. زورعا قايتارىپ الدىق. ەندى سونىڭ زاردابىن تارتىپ وتىرمىز. سوندىقتان جاپونياعا قيىر شىعىستاعى بەس ارالدى بەرسەك، ونىڭ دا سالدارىن بولاشاقتا تارتاتىن بولامىز. جەر قاي ۋاقىتتا بەرەلەدى؟ ەگەر سوعىستا جەڭىلىسكە ۇشىراعان مەملەكەت قانا مامىلە بويىنشا جەرىنىڭ ءبىر بولىگىن بەرەدى. ءبىز سوعىستا جاپونيادان جەڭىلگەن جوقپىز. جەڭدىك. سوندىقتان بۇل اڭگىمەگە نۇكتە قويىلۋى كەرەك.
ءبىز باۋىرلاس ەل اتانىپ جۇرگەن بەلارۋس رەسپۋبليكاسىنا دا كۇدىكپەن قاراۋىمىز قاجەت. ءبىر عانا مىسال. 25 جىلدان بەرى الەكساندر لۋكاشەنكو ماسكەۋگە كەلەدى دە، پۋتينمەن ستول باسىندا بىرگە وتىرىپ، جىلىنا 10 ميلليارد دوللار اقشا سۇرايدى. كەرەگىن الادى، سوسىن ەلىنە بارىپ، رەسەيگە قارسى ساياساتىن جۇرگىزەدى. ءپۋتيننىڭ الدىندا ۇنەمى تۇلكىبۇلاڭعا سالىنىپ، وتىرىك سويلەيدى. ۇنەمى سولاي. ال ءبىز سونى ساراپتاپ، زەرتتەپ وتىرمىز با؟ جوق. لۋكاشەنكو –الەمدە وتىرىكتى كوپ ايتاتىن پرەزيدەنتتەردىڭ ءبىرى. ءبىز 25 جىل بويى 100 ميلليارد دوللاردان استام اقشانى بەلارۋسسيا وندىرىسىنە قۇيدىق. ءتىپتى بۇل قارىزدىڭ ءبىر بولىگىن جويىپ تا جىبەردىك. ءبىراق قايتارىم رەتىندە ءبىزدىڭ مينسكىدەن الىپ جاتقان تۇگىمىز جوق. ورىن الۋى مۇمكىن ءبىر اقيقات نارسەنى ايتايىن، «بەلارۋس نۇسقاسى» تۇبىندە ۋكرايناداعى جاعدايدان دا قورقىنىشتى بولۋى ىقتيمال. ءبىز سودان ساقتانۋىمىز كەرەك، ءقازىر ەشكىمگە سەنۋگە بولمايدى. لۋكاشەنكوعا دا».
بۇل رەسەيلىك ساياساتتانۋشى، جوعارى ەكونوميكا مەكتەبى ساياسات جانە ەكونوميكا فاكۋلتەتى دەكانىنىڭ ورىنباسارى اندرەي سۋزدالسيەۆتىڭ پىكىرى. مەملەكەتى قانداي ساياسات جۇرگىزسە دە، ساراپشىلارى دا سونداي سيپاتتا امبيسيالىق پىكىر بىلدىرەتىن رەسەيلىك مامانداردىڭ دا كوزدەگەنى – ءوز مۇددەسى. حالقى كەدەي تۇرمىستا، ەلى الەمدىك سانكسيانىڭ قۇرساۋىندا جاتسا دا، كەسىرتكەلىك ءالىن كورسەتكىسى كەلەتىن رەسەي وسىلاي الەمدىك ساياسي جاعدايدى شاماسىنا قاراماي، رەتتەگىسى كەلەدى. ءقايتسىن ەندى، قارۋى بار، قۋاتى بار. كۇشتى. ديىرمەن تارتاتىنى دا سودان...
