قازاقستان 2015 جىلى، ياعني بيىل  دۇنيەجۇزىلىك ساۋدا ۇيىمىنا مۇشە بولىپ كىرەتىن بولادى. بۇل تۋرالى بۇگىن ەلباسى نۇرسۇلتان نازاربايەۆ اقوردادا وتكەن باسپاسوز-كونفەرەنسياسىندا مالىمدەدى، دەپ حابارلايدى يا «نوۆوستي-كازاحستان».

"بيىلعى جىلى ءبىز دسۇ-عا مۇشە بولۋدى كوزدەپ وتىرمىز"،-دەدى نازاربايەۆ.

وسىنىڭ الدىندا ءبىرقاتار قازاقستاندىق ەكونوميستەر مەن مۇددەلى ورگان وكىلدەرى 2015 جىلدىڭ مامىر-ماۋسىم ايلارىندا قازاقستان دسۇ-عا مۇشە بولۋى مۇمكىن دەگەن جورامالدار كەلتىرگەن بولاتىن.

پرەزيدەنت نازارباييەۆتىڭ مالىمدەمەسىندە ايتىلعانداي، دسۇ-عا مۇشە بولىپ كىرۋ ءۇشىن جۇرگىزىلىپ جاتقان كەلىسسوزدەر اياعىنا جەتىپ قالعان. كەلىسسوزدەردىڭ ەڭ نەگىزگى كەزەڭى  2014 جىلى دسۇ-عا قابىلداۋدا جاۋاپتى ءرول اتقارۋشى، ەۋروپا وداعىنىڭ ەڭ بەدەلدى مۇشەسىمەن وتكەن ەكى جاقتى كەلىسسوزدەردىڭ ءساتتى اياقتالعانى بولعان. سونىمەن قاتار، قازاقستاننىڭ دسۇ-عا مۇشە بولۋىنا اقش-تىڭ سەنىمدىلىك ءبىلدىرۋى بولىپ وتىر.

نۇرزات توعجان