Halalagoogling اتتى ۆەبسايتتىڭ اۆتورلارى ينتەرنەتتەن اقپارات ىزدەگەندە مۇسىلماندار ءۇشىن حارام سانالاتىن بارلىق مالىمەتتىڭ سۇزگىدەن وتپەي قالاتىنىن ايتادى. رامازان ايىنىڭ باسىندا اشىلعان Halalgoogling سايتى - مۇسىلماندار ءۇشىن ينتەرنەتتەن اقپارات قارايتىن جاڭا ىزدەۋ قۇرىلعىسى. سايتتىڭ فيلترلەرى شاريعات بويىنشا "حارام" دەپ سيپاتتالعان كونتەنتتى ءسۇزىپ الىپ تاستاپ وتىرادى.
Halalagooglingء-دى ناسيحاتتاۋشى ۆەبسايتتىڭ جازۋىنشا، ىزدەۋ جۇيەسى "پورنوگرافيا، جالاڭاش دەنە، گەي، لەسبي، بيسەكسۋال، قۇمار ويناۋ جانە كەز-كەلگەن شاريعاتقا قايشى حارام كونتەنتتى" فيلتردەن وتكىزبەيدى.
مۇنداي ءسوز تىركەستەرىن ىزدەگەن ادامعا سول سوزدەردىڭ سوزدىكتە جازىلعان ءمان-ماعىناسى عانا كورسەتىلەدى. 11 تىلدە اقپارات تابۋعا بولاتىن ىزدەۋ جۇيەسىندە سۋرەت قاراۋ فۋنكسياسى جوق.
شىلدەنىڭ 7ء-سى كۇنى براۋزەر ەڭ العاش تانىستىرىلعان كەزدە تاراتىلعان پرەسس-رەليزدى جاريالاعان پاكىستاندىق The Express Tribune گازەتى Halalgooglingء-تىڭ اقپاراتتى Google مەن Bing جۇيەلەرىنەن الاتىنىن حابارلادى.
جوبا اۆتورلارىنىڭ كىم ەكەنى بەلگىسىز كۇيدە قالدى. باسپا ءسوز حابارلاماسىندا دۇنيەنىڭ ءار تۇكپىرىنەن جينالعان ماماندار توبى بۇل يدەيانى بىرنەشە جىل بويى جەتىلدىرگەنى تۋرالى ايتىلادى. Halalgoogling ازاتتىق راديوسىنىڭ سۇحبات الۋ تۋرالى وتىنىشىنە ءالى جاۋاپ قاتپادى.
ۆەب-كونتەنتتى ۇزدىكسىز تۇردە تازارتىپ وتىرۋدىڭ قيىن ەكەنىن مويىنداعان سايت ادمينيستراتورلارى قولدانۋشىلارىنان يسلامعا قايشى اقپارات تاۋىپ جاتقان بولسا، دەرەۋ حابارلاۋلارىن وتىنەدى. ولار بولاشاقتا شىعىپ قالۋى مۇمكىن قانداي دا ءبىر قاتەلىكتەر ءۇشىن كەشىرىم وتىنەدى.
ىزدەۋ جۇيەسىنەن بولەك Halalgoogling سايتىنان جالپىعا پايدالى اعارتۋشى اقپارات پەن يسلام تۋرالى فورۋمدار تابا الاسىز. ونلاين جۇيەدە قاي تاقىرىپتى ىزدەۋدى بىلمەسەڭىز، "كەزدەيسوق مازمۇن" تۇيمەسىن باسۋ ارقىلى سايتتىڭ ۇسىنىسىن كورۋگە بولادى. وسىلايشا كوپتەگەن پايدالى سىلتەمەلەرگە شىعىپ، گرامماتيكالىق قاعيدانى ەسكە تۇسىرۋگە، شاشتىڭ ءتۇسۋىن قالاي توقتاتۋ تۋرالى كەڭەس الۋعا نەمەسە ايگىلى مۇسىلمانداردىڭ ءتىزىمىن كورۋگە بولادى.
Halalgoogling - "جالاڭاش مازمۇندى" ينتەرنەتتى سۇزگىدەن وتكىزەتىن العاشقى جوبا ەمەس. بۇعان دەيىن Google كومپانياسى دا سەكسۋالدىق سيپاتتى فوتو مەن ۆيدەو ماتەريالداردى ىزدەۋ ناتيجەسىنە ىلىندىرمەي تاستايتىن SafeSearch اتتى فۋنكسياسىن ىسكە قوسقان.
Google جاساعان تاعى ءبىر Islamic Search جۇيەسى بار. ونىڭ ەرەكشەلىگى - اقپاراتتى كوبىنە مۇسىلماندىق سايتتاردان ىزدەيدى دە، پورنوگرافيالىق سايتتاردى جۋىتپايدى.
سول سەبەپتى "شوشقا ەتىن جەۋ" دەگەن تىركەس بويىنشا Halalgoogling مەن Islamic Search ءبىر بولەك، Google ءبىر بولەك اقپارات ىزدەپ تاۋىپ كورسەتەدى. اۋەلگىلەرى شوشقا ەتىنە نەگە تىيىم سالىنعانى تۋرالى اقپارات كورسەتسە، سوڭعىسى مۇلدەم باسقا ەگجەي-تەگجەيلى مالىمەت بەرەدى.
Halalgoogling سايتىنان سەكسۋالدىق سيپاتى بار اقپارات ىزدەگەن ادام يا سول ءسوزدىڭ سوزدىكتەگى ماعىناسىن كورەدى، يا "ەشقانداي ناتيجە تابىلمادى نەمەسە ءسىز حارام نارسە ىزدەدىڭىز" دەگەن جازۋعا كەز بولادى.
اقپارات كوزى: ازاتتىق راديوسى
