ءقازىر «ۇلى»، «تۇلعا» سوزدەرىنىڭ تۇعىرى تومەندەپ كەتتى. پ ۇلى باردى ۇلى قىلعان، ءسوزدىڭ دە ءقادىرى كەتكەن زامان عوي. بۇرىن بارشانى تاڭ قالدىراتىن بيىكتىك اتاۋلى ءقازىر الاسارعان. بايىرعىلار “بي ايتاتىن ءسوزدى قۇل دا ايتادى، ءبىراق اۋزىنىڭ دۋاسى جوق” دەسە، ءقازىر “بي” تيتۋلىنىڭ ءوزى قۇلدىق دەڭگەيگە تۇسكەندەي. ويتكەنى، قازىرگىنىڭ «ءبيىن» بۇرىنعى بيمەن سالىستىرۋعا بولماسى بەلگىلى. عالىم دا، دارىن دا — دايىننىڭ قۇراندىسى. اقشاڭ بولسا الشاڭداي بەر. ەڭ اقىرى حالقى ءۇشىن قانىن توگىپ، جانىن بەرگەندەر ۇلى ەمەس، قۇلقىننىڭ ق ۇلى بوپ جۇرگەندەر ۇلىعا اينالدى. بۇرىنعىنىڭ ۇلى عالىمى مەن قازىرگىنىڭ ۇلى عالىمىن قاتار اتاۋدىڭ ءوزى ۇيات. ءبارىڭىز بىلەتىن ۇلتىمىزدىڭ بۇرىنعى ۇلى تۇلعالارى وزدەرىن “مەن ۇلىمىن” دەمەگەن، حالقىنىڭ قاجەتىنە جارار ۇلى بولۋعا ۇمتىلىپ ءجۇرىپ، ۇلى تۇلعا دەڭگەيىنە كوتەرىلدى.
ەل بالاسى مەن اكە بالاسىنىڭ جەر مەن كوكتەي ايىرماسى بار ەكەنىن بۇگىنگىلەر بىلگىسى دە كەلمەيدى. جەكە ءبىر وتباسىنىڭ داڭقىن جاماپ-جاساۋمەن شىعارعان نەمەسە اكە بەدەلىن بۇركەنىپ كۇن كورگەندەر ەلگە ەرەن ەڭبەك سىڭىرگەندەي بوپ ءجۇر. قازاق ەرتەدە بالاسىن ەلىنىڭ ازاماتى بولۋعا تاربيەلەگەن. سوندىقتان كىشكەنە بالا “اكەمنىڭ بالاسىمىن” دەمەگەن، “اتامنىڭ بالاسىمىن” دەگەن. ال ءقازىر “ماما بالاسى” تۇلعا تۇعىرىنان كورىنگىسى كەلەدى. ماسەلە، اكە مەن شەشەنى ەلدەن ءبولۋ ەمەس، باستىسى — ەلگە تۇتقا بولارلىق ۇل تاربيەلەۋدە.
“قازىرگىلەردىڭ اراسىندا تۇلعا جوق” دەگەن ءسوز ەمەس. ەلگە ەڭبەك سىڭىرمەك تۇگىلى، ەلەۋلى ءىس اتقارماستان تۇلعا بولا سالعاندار جان-جاقتى ناسيحاتتالۋدا. ءسوز ءقادىرىن كەتىرۋ ارقىلى تانىم تايازدالادى. جارناما ارقىلى «تۇلعا» بولۋ دەگەن ۇعىم سانامىزعا ءسىڭىپ بارادى.
بىرنەشە جىل بۇرىن باسپالاردان وبلىستىق ەنسيكلوپەديالار جارىققا شىقتى. كوبىسىنىڭ اتى ەنسيكلوپەديا بولعانمەن، زاتى — قالىڭ بروشيۋرا. ماسەلەن، جەتىسۋ ەنسيكلوپەدياسىندا بۇل وڭىرگە مۇلدەم قاتىسى جوق بىرەۋلەر كىرىپ كەتكەن. شەنى ءۇشىن كىرگىزگەن ارينە. ءتىپتى باسقا ءبىر وبلىستىڭ بيزنەسمەنىنىڭ ەسترادادا جۇرگەن ەركە بالاسى “جەتىسۋعا ەڭبەك سىڭىرگەن تۇلعا” رەتىندە تۇر. بۇل ەنسيكلوپەديادا شەت ەلگە اقشا الىپ قاشىپ كەتىپ، بۇگىندە وتباسىمەن «ىزدەۋدە» جۇرگەندەر دە بار. اكىم بولىپ تۇرعان كەزىندە ەنسيكلوپەدياعا ءومىربايانىن قوسا سالعان. قۇراستىرۋ كەزىندە ەنسيكلوپەديالىق تالاپتار ەسكەرىلمەگەندىگىن كورۋگە بولادى. ءقايسىبىرىن ايتايىق، بىزدە ناعىز ۇلى تۇلعانى تانۋ قابىلەتى تومەندەپ بارادى.
شارافات جىلقىبايەۆا
