قازىرگى كەزدەگى قازاق پسيحولوگياسى الەمدىك ءبىلىم كەڭىستىگىندەگى سونى باعىتتارعا جانە  ەلىمىزدەگى قوعامدىق سۇرانىستارعا ساي دامىپ قالىپتاسىپ كەلەدى. پسيحولوگيا عىلىمىنىڭ باستاۋلارىندا تۇرعان، قازاق پسيحولوگياسىنىڭ وزىندىك ورنەگىن عىلىمي تۇردە نەگىزدەپ،  بۇگىنگى پسيحولوگيا عىلىمىنىڭ قالىپتاسۋى مەن دامۋى تاريحىنىڭ تورىندە ەسىمدەرى ەرەكشە اتالاتىن ج.ايماۋىتوۆ جانە ت.تاجىبايەۆ سىندى كورنەكتى  عالىمدارىمىزدىڭ وراسان زور ەڭبەكتەرىن سارالاپ،  قازىرگى ۇرپاققا جەتكىزۋدە وزىندىك مەكتەبى بار عالىم، پسيحولوگيا جانە پەداگوگيكا عىلىمدارىنىڭ دوكتورى، پروفەسسور ق.ب. جارىقبايەۆتىڭ  جەتەكشىلىگىمەن  كوپتەگەن جۇمىستار اتقارىلۋدا. ەلىمىزدە تۇڭعىش رەت اشىلىپ وتىرعان «قازاق پسيحولوگيالىق قوعامى» سونىڭ ءبىر ايعاعى  بولىپ تابىلادى.   كەڭەستىك داۋىردە ، ياعني 1958 جىلدان 1991 جىلعا دەيىن كسرو پسيحولوگتارى قوعامىنىڭ بولىمشەسى رەتىندە قازاقستان پسيحولوگتار قوعامى بولعان، الايدا تاۋەلسىز ەلىمىزدىڭ ءتول   تاريحىندا مۇنداي قوعام العاش رەت قۇرىلىپ وتىر.

ق ر ادىلەت مينيسترلىگىندە قوعامدىق عىلىمي بىرلەستىك رەتىندە بەكىتىلىپ، تىركەلگەن  «قازاق پسيحولوگيالىق قوعامىنىڭ» رەسمي تۇساۋكەسەرى 2015 جىلدىڭ 15 مامىرىندا اكادەميك ت.تاجىبايەۆ اتىنداعى ەتنوپەداگوگيكا جانە ەتنوپسيحولوگيا عىلىمي-زەرتتەۋ ورتالىعىندا ءوتتى. اتالعان ءىس-شاراعا  وسى سالاداعى تانىمال عالىمدار، الماتى قالاسىنداعى جوو وقىتۋشىلارى قاتىستى. جيىننىڭ سالتاناتتى اشىلۋ راسىمىندە العاشقى ءسوز پروفەسسور ق.ب.جارىقبايەۆقا بەرىلدى. پروفەسسور ەلىمىزدەگى پسيحولوگيا عىلىمى بويىنشا قازىرگى ۋاقىتتا اتقارىلىپ جاتقان جۇمىستارعا توقتالىپ، ونىڭ دامۋ باعىتتارىن اتاپ ءوتتى. سونىمەن قاتار وسىنداي قوعامنىڭ قۇرىلۋى قازاق ۇلتتىق پسيحولوگياسىن  تەرەڭ زەرتتەۋگە، عىلىمي جۇمىستاردى جانداندىرۋعا ىقپال ەتەرى ءسوزسىز ەكەندىگىن تىلگە تيەك ەتتى.

تۇڭعىش رەت قۇرىلىپ وتىرعان بۇل قوعامنىڭ ۇرپاق تاربيەسىنە قوسار ۇلەسى زور  ەكەنىن ايتا وتىرىپ،  جوعارى وقۋ ورىندارىنىڭ كافەدرا مەڭگەرۋشىلەرى اتاپ ايتقاندا ، ءال-فارابي اتىنداعى قازاق ۇلتتىق ۋنيۆەرسيتەتى فيلوسوفيا جانە ساياساتتانۋ فاكۋلتەتى جالپى جانە ەتنيكالىق پەداگوگيكا كافەدراسىنىڭ مەڭگەرۋشىسى، پ.ع.د.، پروفەسسور ا.ق.مىنبايەۆا، اباي اتىنداعى قازۇپۋ ءبىلىم بەرۋ پسيحولوگياسى جانە الەۋمەتىك كوممۋنيكاسيالار كافەدراسىنىڭ مەڭگەرۋشىسى، پسيح. عىل.كانديداتى، دوسەنت ۇ.س.نۇرعالييەۆالار قوعامعا اق جول تىلەپ، ءوز ويلارىن ورتاعا سالدى. ەلىمىزدىڭ تانىمال عالىمدارى م. قۇدايقۇلوۆ، ا.ت. اقاجانوۆا، ر.ب. باشاروۆ، ي.ءا.ابەۋوۆا،  م.ق. باپايەۆا، گ.ا. قاسەن،  اعا وقىتۋشى  س.ءا. رامازانوۆا   جانە ورتالىقتىڭ ديرەكتورى، پ.ع.ك.، دوسەنت ب.ا.ءارىنوۆا بۇل قوعام  پسيحولوگيا عىلىمىنىڭ قالىپتاسۋى مەن دامۋىندا كوشباسشى بولاتىن ىرگەلى يدەيالار مەن تەگەۋىرىندى تۇجىرىمداردى جۇزەگە اسىراتىن عىلىمي ورتاعا اينالۋى ءتيىس دەگەن تىلەكتەرىن ءبىلدىردى.

جيىندى پسيحولوگيا عىلىمىنىڭ دوكتورى، قازاقستان ۇلتتىق جاراتىلىستانۋ عىلىمدارى اكادەمياسىنىڭ اكادەميگى جانە قۇرىلىپ وتىرعان جاڭا قوعامنىڭ پرەزيدەنتى م.پەرلەنبەتوۆ قورىتىندىلاپ، بولاشاقتا اتقارىلاتىن ىستەرگە توقتالدى. قوعامنىڭ باسشىسى سونىمەن قاتار بۇل قوعامنىڭ قازاق پسيحولوگياسىنىڭ حالىقارالىق پسيحولوگيا ارەناسىنا شىعۋىنا اشىلعان جول ەكەنىن ەرەكشە اتاپ كورسەتتى.

ءارىنوۆا ب.ا.

ءال-فارابي اتىنداعى قازۇۋ، جالپى جانە ەتنيكالىق پەداگوگيكا كافەدراسىنىڭ دوسەنتى، پ.ع.ك.، ت.ت.تاجىبايەۆ اتىنداعى ەتنوپسيحولوگيا جانە ەتنوپەداگوگيكا عىلىمي-زەرتتەۋ ورتالىعىنىڭ ديرەكتورى

شاعىربايەۆا م.د.

ءال-فارابي اتىنداعى قازۇۋ،جالپى جانە ەتنيكالىق پەداگوگيكا كافەدراسىنىڭ دوسەنتى، پ.ع.ك.، ت.ت.تاجىبايەۆ اتىنداعى ەتنوپسيحولوگيا جانە ەتنوپەداگوگيكا عىلىمي-زەرتتەۋ ورتالىعىنىڭ ديرەكتورىنىڭ ورىنباسارى