ەل پرەزيدەنتى قايتا سايلاندى. ەكونوميكالىق داعدارىس ەسىك قاعۋدا. الەمدىك گەوساياسي احۋال كۇن سايىن قۇبىلىپ تۇر. تاۋەلسىزدىكتىڭ 25 جىلىندا شەنەۋنىكتەردىڭ تىزگىندى مىقتى ۇستاعانى دا، اتتان قۇلاعانى دا از ەمەس. اكىم كىم؟ حالىققا جاقىن كىم؟ ونى مىنا جۇرت انىق اڭعارۋدا. شەندىلەردىڭ ىشىندە اتى ايگىلىسى دە، ەسىمىن ەل بىلمەيتىن ەلەۋسىزى دە كوپ. قاي وڭىردە ءوندىرىس وركەندەپ، قاي وڭىردە كوررۋپسيا قانات جايىپ وتىرعانى قاراپايىم حالىققا ايان. قاي اكىمنىڭ ۇلتتىق رۋحتى ۇلىقتاپ، قاي اكىمنىڭ شەتەلدىڭ شەكپەنىنە قۇمار ەكەنى دە جاسىرىن بولماسا كەرەك.

ءبىز وسى ولشەمدەردى نەگىز ەتىپ، وقىرماندار اراسىندا «ەڭ ۇزدىك اكىمدى تاڭداڭىز» اتتى ساۋالناما ۇيىمداستىرعان بولاتىنبىز. ساۋالناماعا 7000-عا جۋىق ادام نازار سالسا، 2000-عا جۋىق ادام داۋىس بەرىپتى. ساۋالناما ناتيجەسى بويىنشا الماتى وبلىسىنىڭ اكىمى اماندىق باتالوۆ 34%(572) داۋىس جيناپ، قارا ءۇزىپ العا شىقتى. وقىرمانعا ءاربىر كومپيۋتەردەن ءبىر جولعا عانا ياعني ءبىر IP-دەن ءبىر رەت قانا داۋىس بەرۋ مۇمكىندىگى بەرىلگەنىن ەسكەرسەك، بۇل، ارينە ۇلكەن جەڭىس.

جەرى تۇڭكەلى، قونىسى قۇتتى الماتى وبلىسىنىڭ تىزگىنىن ۇستاعان اماندىق مىرزانىڭ اكىمدەر اراسىندا كوش باستاۋىن اركىم ءارقالاي تۇسىنەر. ءبىز ءوز الىمىزشە باعامداپ كوردىك. سويتسەك، اماندىق عابباس ۇلىنىڭ جەتىسۋ وڭىرىنە سىڭىرگەن ەڭبەگى جىلدار قويناۋىنان مەنمۇندالىپ تۇر ەكەن.

ول 2001-2008 جىلدارى اكىمنىڭ ورىنباسارى بولسا، 2008-2014 جىلدارى اكىمنىڭ ءبىرىنشى ورىنباسارى قىزمەتىن اتقارعان. بىلدەي ءبىر وبلىستا 13 جىل بويى ورىنباسارلىق قىزمەت اتقارعان اماندىق مىرزا اكىم ورىنتاعىنا جايعاسپاي-اق ءبىراز جۇمىستىڭ نۇكتەسىن قويىپتى.

الماتى وبلىسىنىڭ ورتالىعى تالدىقورعان قالاسىنا كوشىرىلگەن كەزدە قالاداعى ءتىل سارايى، دوستىق ءۇيى، جاستار سپورت سارايى سىندى كولەمدى جوبالاردى جۇزەگە اسىرۋدا باتالوۆ مىرزانىڭ ايقىن قولتاڭباسى اڭعارىلادى. قۇرىلىس سالاسىندا قىزمەت اتقارىپ، كەزىندە ش. ايمانوۆ اتىنداعى «ءقازاقفيلمدى» سالۋعا اتسالىسقان  اماندىق مىرزا الماتى وبلىسىنداعى قۇرىلىستاردىڭ بوي تۇزەۋىنە دە ايتارلىقتاي ىقپال ەتكەن كورىنەدى.

ال اماندىق عابباس ۇلىنىڭ قىزىلاعاشتاعى الاپات اپات كەزىندەگى ەڭبەگىن ەل ءالى كۇنگە اۋىزىنان تاستامايدى.

ءبىر ايتا كەتەرلىگى، سەرىك ۇمبەتوۆ مىرزا الماتى وبلىسىنىڭ اكىمى قىزمەتىنەن كەتكەننەن كەيىن الماتىداعى ب ا ق وكىلدەرى بۇل وڭىردەن مۇلدەم بەيحابار قالعانداي بولىپ ەدى... ءتىپتى وسى ايماقتا نە بولىپ جاتقانىن جۇرت اۋىزىنداعى قاۋەسەتتەن عانا ەستيتىن جاعدايعا تۇسكەندەي كۇي كەشكەن. سوڭعى كەزدەرى وبلىس اكىمىنىڭ اپپاراتىنا باقتيار ونەربايەۆ، عالياسقار سارىبايەۆ سىندى باسشىلاردىڭ كەلۋىمەن، سونداي-اق، تالدىقورعان قالاسىنىڭ باسپا ءسوز تىزگىنىن ۇستاعان عاليمۇرات جۇكەلدىڭ ارقاسىندا  بۇل كەمشىلىكتىڭ دە ورىنى تولىعاتىن سياقتى...

ال، ساۋالنامامىزدىڭ العاشقى كۇندەرىندە توپ جارعان قىرىمبەك كوشەربايەۆ ءوز ۋاقىتىندا قانعا بويالعان "جاڭاوزەندى" باقارعانىنا قاراماستان قىزىلوردا حالقىنىڭ الدىندا اجەپتاۋىر ات-اتاققا، قۇرمەتكە يە ەكەن. ءسويتىپ، ق.كوشەربايەۆ 23% داۋىسپەن ەكىنشى ورىنعا تۇراقتادى.

ساۋالناما ناتيجەسىندە شىرايلى وڭتۇستىك ءوڭىردىڭ ءبىرىنشى قولى بولىپ وتىرعان اسقار مىرزاحمەتوۆتىڭ دە حالىق الدىنداعى بەدەلىنىڭ تىم تومەندە جاتپاعانى بەلگىلى بولدى. ىسكەرلىگى مەن ءوز حالقى ءۇشىن جاساپ جاتقان يگى ىستەرىنىڭ ارقاسىندا «اكىمدەر سايىسىندا» ءۇشىنشى ورىنعا تۇراقتادى. اسىرەسە سوڭعى ۋاقىتتارداعى وڭتۇستىك ءيميدجىنىڭ جاقسارۋىنا وسى ءوڭىردىڭ ىشكى ساياساتىن ۇستاپ وتىرعان بەرىك ءۋالي مىرزانىڭ ىقپالى زور بولسا كەرەك...

اتاۋعا تۇرارلىق العاشقى ۇشتىك وسى. ەندى حالىق نازارىنان مۇلدە كوتەرىلىپ كەتكەن، بارى مەن جوعى بەلگىسىز اكىمدەردى دە اتاي كەتۋدى ءجون كوردىك. اقمولا وبلىسىنىڭ اكىمى سەرگەي كۋلاگين. بار-جوعى 8-اق داۋىسپەن 0% كورسەتكىشتە تۇرسا، استانا قالاسى، قاراعاندى وبلىسى، قوستاناي وبلىسىنىڭ اكىمىدەرى 1% داۋىسپەن جوققا تەڭەسىپ تۇر.

7000 رەت قارالىپ، 215 پىكىر جازىلىپ، 2000-عا جۋىق ادام داۋىس بەرگەن ساۋالنامامىزدىڭ قورتىندىسى بويىنشا ەلدەگى اكىمدەردىڭ حالىق اراسىنداعى كورسەتكىشى مۇلدە تومەن. ءتىپتى رەسمي ءىس قاعازدارى بولماسا اتىن دا ەستىپ كورمەگەن اكىمدەر جايلى جازىلعان پىكىرلەر بولدى.

اماندىق باتالوۆ مىرزانىڭ قىزمەتىنە ساتتىلىك تىلەيمىز! ەلباسىنىڭ عانا ەمەس ەلدىڭ دە سەنىمىنە يە بولعان اكىمدەردىڭ قاتارى كوپ بولسا  ەكەن...

جەبە نويان