ماڭعىستاۋدا «بيزنەس 3 كۇندە» جوباسى ەرەكشە قارقىن الدى. 1 ايدىڭ ىشىندە 100-دەن استام كوپبالالى انا مەن از قامتىلعان وتباسىلار ءۇي جاعدايىندا ءوز ءىسىن باستادى. باسىم بولىگى جاڭاوزەن قالاسىنىڭ تۇرعىندارى.
بۇگىن جاڭاوزەن قالاسىندا جەكە كاسىبىن اشقان كاسىپكەر-انالاردىڭ جارمەڭكەسى ءوتتى. تۇرعىندار كاسىپكەرلەردىڭ قىسقا مەرزىم ىشىندە جەتكەن جەتىستىكتەرىنە كوز جەتكىزىپ، ولاردىڭ وندىرگەن تاۋارلارىن ساتىپ الدى. انالاردىڭ قۋانىشىن بولىسۋگە وبلىس اكىمى ەرالى توعجانوۆ تا بارىپ، كورمەنى ارالادى. ايماق باسشىسى دا كاسىپكەر-انالاردىڭ ءونىمىن ساتىپ الدى.
از عانا ۋاقىتتا جاڭاوزەندە «AliTort»،«Xanbibi»، «Ozen nan»، «رايىمبەك»، «ايان»، «تەڭگە سامساسى»، «ءالينۇر»، «اراي» سەكىلدى 100-دەن اسا جاڭا برەندتەر پايدا بولدى. الەۋمەتتىك جاعدايى تومەن وتباسىلار مەن كوپبالالى انالارعا ءۇي جاعدايىندا ءوز بيزنەسىن اشۋعا، ونى ساۋاتتى جۇرگىزۋگە قارجى – جەكە كاسىپكەرلەر مەن مەساناتتاردىڭ قولداۋىمەن جۇزەگە اسىپ جاتىر.
وسىلايشا، ءوڭىردىڭ الەۋمەتتىك از قامتىلعان جانە كوپبالالى وتباسىلارى جاپپاي جەكە كاسىبىن اشۋدا. سولاردىڭ ءبىرى – كوبەنوۆا گۇلجامال كوپ بالالى انا. نەبارى 2 كۇن ىشىندە «ايداي» برەندىمەن نان ونىمدەرىن شىعارا باستادى. كۇندەلىكتى تاۋارىن سۋپەرماركەتتەرگە جونەلتىپ، جەكە تاپسىرىستاردى ورىندايدى. ءسويتىپ، كۇنىنە 20-25 مىڭ تەڭگە تابىس تاۋىپ وتىر. جوبا ناۋرىزدىڭ 14-دە باستاۋ العان.
«مەن قىزىلساي اۋىلىنىڭ تۇرعىنى كوبەنوۆا گۇلجامال وبلىس اكىمى ەرالى توعجانوۆتىڭ باستاماسىمەن جانە جەرگىلىكتى كاسىپكەرلەردىڭ قولداۋىمەن باستاۋ العان «بيزنەس 3 كۇندە!» جوباسىنا ءوتىنىش ءبىلدىرىپ، «ايداي» نان ونىمدەرى اتاۋىمەن ءوز كاسىبىمدى باستاپ كەتتىم. باستاپقىدا جوبا ۇيلەستىرۋشىلەرى ۇيگە كەلىپ تۇسىندىرگەن كەزدە، بۇل قانداي جوبا؟ نەگە نەسيەسىز، كەپىلسىز، دەگەندە وتىرىك دەپ ويلادىم. شىن مانىسىندە ءبىر اپتادان كەيىن ماعان حابارلاسىپ، كەرەكتى قۇرال-جابدىقتارىمدى اكەلىپ بەردى. مەن قاتتى قۋاندىم.
قازىرگى تاڭدا ءوزىمنىڭ كاسىبىمدى باستادىم ۇلكەن راحمەت! سونىمەن قاتار وسى جوبا ۇيلەستىرۋشىلەرىنە جانە قولداۋ بىلدىرۋشىلەرگە ۇلكەن العىسىمدى ايتامىن. وسىنداي الەۋمەتتىك جوبالار كوپ بولسىن، ابىرويلارىڭىز ارتا بەرسىن!»-دەگەن جوبا قاتىسۋشىسى قۋانىشىن جاسىرمادى.
ال، بورانوۆا ايگەرىم «اسىلىم» برەندىمەن قولونەر بۇيىمدارىن ساتتىققا شىعارا باستادى.
«وسى ۋاقىتقا دەيىن، تەك جاڭاوزەن قالاسى بويىنشا ارنايى توپ 307 ءۇيدى ارالاپ، 100-گە جۋىق وتباسىنىڭ كاسىپپەن اينالىسۋىنا مۇمكىندىك سىيلادى. ءار وتباسىدا ورتاشا ەسەپپەن 6-8 ادام دەپ العاندا، شامامەن 600-گە جۋىق ادامنىڭ الەۋمەتتىك جاعدايى جاقساردى دەگەن ءسوز. بۇل جوبانىڭ بارلىق الەۋمەتتىك جوبالاردان ەرەكشەلىگى – حالىققا بالىق ەمەس، قارماق بەرۋ»، - دەيدى جوبا جەتەكشىسى ايجاني نۇرلانوۆا.
ماڭعىستاۋ وبلىسىنىڭ اكىمى ەرالى توعجانوۆ «بيزنەس 3 كۇندە» كاسىپكەرلىك جوباسىنىڭ اياسىندا وڭىردە 370 جاڭا كاسىپ اشۋدى تاپسىرعان بولاتىن. بۇل جوبا ءوڭىردىڭ بارلىق اۋدان-قالالارىندا قارقىندى جۇزەگە اسىپ جاتىر. جىل اياعىنا دەيىن 1000 وتباسىنىڭ كاسىپ اشۋىنا مۇمكىندىك جاساۋ جوسپارلانۋدا. «بيزنەس 3 كۇندە» كاسىپكەرلىك-جوباسىندا جەلىلىك ماركەتينگ تاسىلدەرى پايدالانىلادى. ءۇي جاعدايىندا بيزنەس اشىپ، كاسىبىن تۇراقتاندىرعان ازامات، تاعى 5 ازاماتقا كاسىپ اشۋىنا كومەكتەسسە ءار ادام ءۇشىن، سىياقى بەرىلەدى.
بۇدان بولەك، «بيزنەس 3 كۇندە» جوباسىنىڭ اياسىندا «جاقسىلىق جاسا!» اتتى جاڭاوزەن قالاسى تۇرعىندارىنىڭ اراسىندا مارافون ۇيىمداستىرىلدى.
جالپى جاڭاوزەندە جۇمىسپەن قامتۋ كەشەندى تۇردە جۇزەگە اسۋدا. قالا، اۋىل تۇرعىندارىنىڭ اراسىندا جۇمىسسىزدىق ماسەلەسىن شەشۋ ماقساتىندا جىل باسىنان بەرى بارلىعى 2159 ادام الەۋمەتتىك شارالارمەن قامتىلدى. ونىڭ 350ء-ى «وزەنينۆەست» ج ش س ورنالاسقان. 104 ادام وندىرىستىك سالاعا، 40 كولىك، 61 شاعىن جانە ورتا بيزنەسكە، 382 ادام بيۋدجەتتىك سالاعا، 105 الەۋمەتتىك جۇمىس، 55 كوممۋنالدىق جانە 1020 ازامات قوعامدىق جۇمىسپەن قامتىلدى. 130 ازامات اقتاۋ قالسىنا قونىس اۋدارۋعا نيەت ءبىلدىرىپ، جۇمىسپەن قامتىلۋدا.
