مامىردىڭ العاشقى تاڭى ادەتتەگىدەن ايرىقشا اجارلانىپ اتقان سەكىلدى كورىندى بىزگە. اقىن جىرلاعانداي، «ون ءبىر ۇلى بار ءۇيدىڭ جاسانعان ءبىر بويجەتكەنى بوي كورسەتكەندەي سۇلۋ مامىر مەزگىلىنىڭ كەرەمەتىنە كوز تويمايدى». توبەدەن مەيىرلەنە توككەن ارايلى كۇننىڭ شاپاعى ايماق-اتىراپتى تەگىس شاتتىققا بولەگەندەي. كوككە قالىقتاعان كوڭىلدى اۋەن بۇگىن ەرەكشە مەيرام ەكەنىن سەزدىرىپ تۇر. لەڭگىر قالاسىنداعى تولەبي الاڭىنا قاراي قالا تۇرعىندارى اسىعىپ كەلۋدە. تولە بي بابانىڭ ەسكەرتكىشى تۇرعان ورىن جاساندى ساحنا سەكىلدى. ونەرپازدار اننەن شاشۋ شاشىپ، كۇمبىرلەتىپ كۇي توگۋدە. ءيا، بيىلعى مەرەكە باسقاشا فورماتتا اتالىپ ءوتتى. الاڭدا حالىقتار دوستىعىن پاش ەتەتىن ستەندىلەر مەن پلاكاتتار، كورمە زاتتارى كوزدىڭ جاۋىن الادى. مادەنيەت سارايىنىڭ ماڭىندا تىگۋلى تۇرعان قازاقى كيىز كەرەمەت بەزەندىرىلىپتى. اسىرەسە، ۇلتتىق كيىم كيگەن قىزدار مەن جىگىتتەردىڭ ءجۇرىس-تۇرىسى قانداي جاراسىمدى. كيىز ۇيدەن بىلاي قاراي تولەبي اۋداندىق تۇرىك مادەني ورتالىعى وزدەرىنە بەرىلگەن بۇرىشتى بەزەندىرۋگە بار ونەرلەرىن سالىپتى. مۇنان كەيىن نەمىس-سلاۆيان، كۋرد، وزبەك مادەني ورتالىقتارى جايعاسىپتى. كورمەدە ءاربىر ۇلتتىڭ وزىندىك ەرەكشەلىگىن ايقىندايتىن قولدانبالى ونەر تۋىندىلارى، تۇرمىستىق سالت- ادەت-عۇرىپتارى بويىنشا پايدالاناتىن زاتتارى، ۇلتتىق تاعامدارى، باسقا دا كونە بۇيىمدارى جايعاسقان. ءاربىر ۇلتتىق مادەني ورتالىقتىڭ قاسىندا ۇلتتىق كيىمدەگى ەتنوس وكىلدەرى ءان شىرقاپ، بي بيلەۋدە. تولەبي اۋدانىنىڭ اكىمى اۋەلحان تۇرعىنبەكوۆ باستاعان ءبىر توپ كوميسسيا مۇشەلەرى اۋدانداعى ۇلتتىق مادەني ورتالىقتار ۇسىنعان كورمەلەردى ارالاپ، ءتيىستى باعاسىن بەردى. مۇنان كەيىن سالتاناتتى شارا باستالدى. اۋدان باسشىسى الاڭعا جينالعان لەڭگىرلىكتەردى ۇلىق مەيراممەن قۇتتىقتاپ ءسوز سويلەدى. اۋدان ومىرىنە بەلسەنە ارالاسىپ، قوعامدىق جۇمىستا بەلسەندىلىك تانىتقان ءبىرقاتار ۇلتتىق مادەني ورتالىقتاردىڭ مۇشەلەرىنە العىس حات تابىس ەتتى. سالتاناتتى شارادا اۋداندىق ءماسليحاتتىڭ حاتشىسى ءاتىرحان شىڭعىسبايەۆ جانە ءبىرقاتار مارتەبەلى مەيماندار قۇتتىقتاۋ ءسوز سويلەدى. الاڭعا جينالعاندار ءۇشىن مەرەكەلىك باعدارلاما ۇسىنىلىپ، شارا سوڭى جاپپاي سەرۋەنگە ۇلاستى.
"ايماق تىنىسى"
