الماتى وبلىسىندا جىل باسىنان ۇلكەندى-كىشىلى جولداردا تىركەلگەن جول-كولىك وقيعالارىنىڭ سانى 512-گە جەتىپ، ءولىم جاعدايى كوبەيگەن. جول ۇستىندە 100 ادام قايعىلى قازاعا ۇشىراسا، 700-دەن استام جولاۋشى ءتۇرلى جاراقاتتار العان، - دەپ حابارلايدى وڭىرلىك كوممۋنيكاسيالار قىزمەتى.

الماتى وبلىستىق پوليسيا دەپارتامەنتى باسشىسىنىڭ ورىنباسارى نۇرلان  الماسبەكوۆتىڭ ايتۋىنشا، تىركەلگەن  جول-كولىك وقيعالارىنىڭ باسىم كوپشىلىگى جۇرگىزۋشىلەردىڭ جاۋاپسىزدىعىنان بولىپ وتىر.

«الماتى وبلىسىنا قاراستى الماتى-تالدىقورعان، الماتى-تاراز، باتىس ەۋروپا – باتىس جۇڭگو اۆتوماگيسترالدارىندا جول-كولىك وقيعالارى ءجيى تىركەلۋدە. بىلتىرعى جىلدىڭ وسى ۋاقىتىمەن سالىستىرعاندا جول ۇستىندە كوز جۇمعان جاندار سانى وكىنىشكە وراي، 53 پايىزعا ارتتى. قايعىلى جاعدايدىڭ باستى سەبەبتەرىنىڭ ءبىرى جىلدامتىقتى اسىرۋ جانە ماس كۇيىندە كولىك ايداۋ. وسى جاعدايعا بايلانىستى بارلىق كولىك جۇرگىزۋشىلەرىنە جانە جولاۋشىلارعا دابىل قاعامىز. جول ۇستىندە بارىنشا مۇقيات جانە جاۋاپكەرشىلىكتى بولىڭىزدار، - دەيدى ول.

جول-كولىك وقيعالارىنىڭ 73% -ى جەرگىلىكتى جولداردا جانە جول جەلىسىندە تىركەلسە، قالعان 27%-ى رەسپۋبليكالىق جولداردا ورىن العان. انىقتالعان وقيعا سەبەپتەرىنە سايكەس جىل باسىنان 41 مىڭعا جۋىق وقيعا كولىك جۇرگىزۋشىلەرىنىڭ كۇناسىنان بولعان. ونىڭ 500-دەن استامى ماس كۇيىندە ايداعان.

سونىمەن بىرگە، كۇرە جولدار وتەتىن اۋداندارداعى ەلدى مەكەندەر تۇسىندا اۆتوكولىكتەردىڭ مالمەن قاقتىعىسۋى دا كوبەيگەن. مۇنداي جاعدايلارعا جولداردى توسەگەندە مالدىڭ وتۋىنە ارنالعان وتپەلەردىڭ دۇرىس ورنالاسپاۋىمەن بىرگە تۇرعىنداردىڭ ءتورت تۇلىكتى قاراۋسىز قالدىرۋىنان،- دەيدى ماماندار.

دەپارتامەنت  الماتى وبلىسىنى اكىمدىگىنىڭ قولداۋىمەن جولداردىڭ ساپاسىن جاقسارۋعا، جارىقتاندىرۋعا جانە جول بەلگىلەرىن قويۋعا باعىتتالعان جۇمىستار جۇرگىزۋدە. سونداي-اق، ءساۋىر ايىنىڭ 2 جانە 15 ارالىعاندا وبلىستا جول-كولىك وقيعالارانىڭ ورىن الۋىنىڭ باستى فاكتورلارىنىڭ الدىن الۋ اياسىندا،  «ءقاۋىپسىز جول» جەدەل الدىن الۋ شاراسى وتپەك.