الماتى وبلىسىنىڭ تەكەلى قالاسىندا كوپ بالالى جانە تۇرمىسى تومەن وتباسىلارعا ارنايى 40 پاتەرلى تۇرعىن ءۇي سالىنباق. اتالمىش تۇرعىن ءۇي قۇرىلىسى وسى جىلدىڭ ماۋسىم ايىندا باستالىپ، 6 ايعا سوزىلادى دەپ حابارلايدى وڭىرلىك كوممۋنيكاسيالار قىزمەتى.

40 وتباسىعا ەسەپتەلگەن بۇل جوبانىڭ سمەتالىق قۇجاتى وتكەن جىلى  دايىندالعان. بۇگىن دە مەملەكەتتىك ساراپتامادان وڭ باعا الىپ، كەرەكتى قاراجات ءبولىندى.

«قازىرگى تاڭدا قالادا كوپ بالالى جانە تۇرمىسى تومەن وتباسىلارعا كوپ كوڭىل بولىنۋدە. قالادا 415 كوپبالالى جانە 197 تۇرمىسى تومەن وتباسى تىركەلگەن. جاقىندا 40 پاتەرلى تۇرعىن ءۇيدىڭ قۇرىلىسى باستالادى. قۇرىلىس جۇمىستارى جىل سوڭىنا دەيىن جالعاسادى »، - دەيدى قالا اكىمى باحتيار ونەربايەۆ.

ايتا كەتۋ كەرەك، ءدال وسىنداي 40  پاتەرلى 2  تۇرعىن ءۇيدىڭ سمەتالىق قۇجاتتارى دايىن، ەندى مەملەكەتتىك ساراپتامادان وتسە، كەلەسى جىلى تاعى دا 80 وتباسى ءۇيلى بولادى.