عىلىمدا رەسەنتيمەنت  دەگەن تۇسىنىك بار. مۇنى اباي ولشەمىنە اينالدىرساق: «...ءوزىمنىڭ يتتىگىمنەن بولدى دەمەي، جەڭدى عوي دەپ شايتانعا بولار كومەك».  ياعني، ءوز ءمىنىڭ مەن كىناڭدى موينىڭا الماي، وزگەگە جابۋ دەگەن ماعىناعا سايادى.

ەرتەڭ  قازاقياعا  اللا جەتكىزسە، 31  مامىر تۋادى.  بۇل بارشامىزعا بەلگىلى ساياسي  قۋعىن-سۇرگىن   قۇرباندارىن  ەسكە  الۋ  كۇنى.

دالىرەك ايتساق، ستالين مەن گولوششەكيننىڭ جەتى باباسىن جەلدەي كوشىرىپ، ارۋاعىنا انوفەما ايتىپ، قارعىس جاۋدىراتىن كۇن. بۇل ءبىزدىڭ تۇراقتى تۇسىنىگىمىز بەن مىزعىماس كوزقاراسىمىزعا  اينالعانى قاشان...

قۇرمەتتى  وقىرمان قاۋىم، سىزدەر  دۇرىس پايىمداعاندارىڭىز  ءجون، ءبىز بۇل ارادا  قوس  قاندىقولدى  اقتاماققا  ەشقانداي دا  تالپىنىس جاساپ  وتىرعانىمىز جوق.  ءوزىمىزدى سۇتتەن اق، سۋدان تازا، وزگەلەردى  كىساپىر  سانايتىن  ءسابي سانامىز (ينفانتيليزم) تۋراسىندا عانا ازىراق ءسوز شىعىنداپ وتىرمىز. ايتالىق، كەڭەس وداعىنىڭ تۇتاس تەرريتورياسىن شارپىعان قاندى رەپرەسسيادان  سلاۆيان تەكتەستەردى ءسوز قىلماعاندا  قىرعىزدان 38، تاجىكتەن 2، وزبەكتەن 7،  ال  قازاقتان  67  مىڭ ادامنىڭ  اجال  قۇشۋىن نەندەي  قيسىندارمەن  تۇسىندىرە  الار  ەكەنبىز؟ اتقان ستاليندىك جۇيە ەكەندىگى ايداي بولعانىمەن، اتقىزعان كىم؟

31 مامىر - وتقا ۇمسىنعان ءپارۋانا كوبەلەكتەي تىزاق قاققان  وسى ساۋالدارعا بارشا قازاقتىڭ ۇيات پەن ۇجدان الدىندا تىك تۇرىپ جاۋاپ بەرەتىن كۇنى.

ۇلت بولىپ ۇيىسقان بولساق، بايىبىنا ەندەپ، ءوز ىشىمىزگە ءۇڭىلىپ، وقيعادان وي تۇيەرمىز. ەل بولۋدان كەتىسكەن بولساق، ءوز ءمىنىمىزدى  تاعى دا وزگەگە جابارمىز. ورىستى، ونىڭ ىشىندە لەنين مەن ستاليندىك جۇيەنى تىلدەپ، سۇڭقىلداعاننان  شىققان قازاقتىڭ  ءمۇيىزى كانى؟

 ويلانساق نەتتى...