ءساۋىردىڭ 10-ى كۇنى قاراعاندى قالاسىنداعى قازىبەك بي اۋداندىق سوتىنىڭ سۋدياسى ەركەش ماۋكەن ايىپتالۋشى دياس كۋشۋگۋلوۆتى بەس جىلعا سوتتادى. بۇل تۋرالى سوتتان تۆيت-ترانسلياسيا جاساعان جەرگىلىكتى "نوۆوستي-كاراگاندا" سايتى حابارلادى.
26 جاستاعى دياس كۋشۋگۋلوۆقا قازاقستان قىلمىستىق كودەكسىنىڭ ءتورت بابى بويىنشا ايىپ تاعىلعان: "تەرروريزم نەمەسە ەكسترەميزمدى ناسيحاتتاۋ"، "الەۋمەتتىك، ۇلتتىق جانە ءدىني الاۋىزدىق تۋدىرۋ"، "زاڭسىز سۋىق قارۋ ۇستاۋ"، "قارۋ جانە ءوق-دارىنى الۋ جانە ساقتاۋ". سوتتا ونىڭ "2011 جىلى رەسەيدىڭ كاۆكاز ايماعىندا ارەكەت ەتكەن راديكالدى اعىمنىڭ وكىلى بولعانى، قازاقستانعا كەلگەننەن كەيىن اينالاسىنداعى ادامداردى قارۋلى جيھادقا ۇندەگەنى" ايتىلدى.
دياس كۋشۋگۋلوۆ سوتتا وزىنە تاعىلعان ايىپتاردى جوققا شىعاردى. سوت وعان جازاسىن جالپى رەجيمدەگى كولونيادا وتەۋگە ۇكىم شىعاردى.
پىكىر قالدىرۋ