Cءۇيىنشى سۇراۋعا ءسال ەرتە، دەگەنمەن سۇراي بەرۋگە دە بولادى...
بۇگىن ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋعا ارنالعان جۇمىس توبىنىڭ سەگىزىنشى وتىرىسى بولدى.
قازاقستان رەسپۋبليكاسىنىڭ 2011 جىلعى 22 شىلدەدەن بەرى قانداستارىمىزدىڭ تۇراقتى تىركەۋگە تۇرۋىنا ەڭ باستى كەدەرگى بولىپ كەلگەن كوشى-قون زاڭىنىڭ «كوشىپ كەلۋشىلەرگە قازاقستان رەسپۋبليكاسىندا تۇراقتى تۇرۋعا ارنالعان رۇقساتتى بەرۋدەن باس تارتۋ نە ونىڭ كۇشىن جويۋ ءۇشىن نەگiزدەر» دەگەن 49-بابىنا وزگەرىس ەنگىزىلدى.
اتاپ ايتار بولساق، «اۋىر نەمەسە اسا اۋىر قىلمىس جاساعانى ءۇشىن سوتتالعاندىعى بولعان» دەگەن 9) تارماق «قازاقستان رەسپۋبليكاسىنىڭ اۋماعىندا اۋىر نەمەسە اسا اۋىر قىلمىس جاساعانى ءۇشىن الىنباعان نەمەسە وتەلمەگەن سوتتالعاندىعى بار» دەپ وزگەرتىلدى. گ.سەيىتماعامبەتوۆا، ا.سمايىل، گ.يشيمبايەۆا، ن.سابيليانوۆ قاتارلى ءتورت دەپۋتات ۇسىنعان بۇل وزگەرتۋدى جۇمىس توبىنىڭ وزگە دە مۇشەلەرى تەگىس قولدادى. «ەگەر، وسى وزگەرىس قابىلدانسا، كەلگەن ەلىنەن «سوتتىلىعى» تۋرالى انىقتاما سۇراۋعا نەگىز جوق بولادى» دەدى ىشكى ىستەر مينيسترلىگىنىڭ وكىلى سابىرجان سەيىتجانوۆ.
الداعى جەردە سەناتتان ءوتىپ، ەلباسى قول قويىپ جاتسا، اتاجۇرتقا ورالىپ، قازاقستان ازاماتى اتانعىسى كەلەتىن قازاقتار «سوتتىلىعى» تۋرالى انىقتامانىڭ ازابىنان قۇتىلارى ءسوزسىز.
سونىمەن بىرگە، الدىڭعى ماقالامىزدا ايتىلعان ۇسىنىستار دا جان-جاقتىلى پىسىقتالۋ ۇستىندە.
مىسالى، ءبىلىم الۋ ماقساتىمەن كوشىپ كەلەتىن ەتنيكالىق قازاق جاستارىنا قازاقستاندا الىناتىن سىناقتارعا ۇلگەرۋ ءۇشىن شەتەلدەن ۆيزا اشتىرعاندا باسىمدىق بەرىلسە دەگەن ۇسىنىستى سىرتقى ىستەر مينيسترلىگىنىڭ وكىلدەرى نەگىزسىز دەپ قاراۋدا. ۆيزا الۋدا كەزەكتىڭ بار ەكەنىن دە جوققا شىعارمايدى تاعى. سەبەپ، قولدانىستاعى قىزمەت ستاندارتتارى مەن قاۋلىلارىندا مۇنداي ءتارتىپ جوق ەكەن.
ءبىراق، ءسىم وكىلدەرىنىڭ وسى زاڭ جوباسى قولدانىسقا ەنگەن كۇننەن باستاپ، قاتىستى قاۋلى اتاۋلىنىڭ دا جاڭارتىلاتىنىن ەسكەرگەندەرى ءجون ەدى.
ارينە، نەزىزسىز تالاپتى ءبىز دە ۇسىنبايمىز، دەپۋتاتتار دا قويمايدى. ەڭ باستى نەگىز – ەلباسىمىز نۇرسۇلتان نازاربايەۆتىڭ «جاستار – ءبىزدىڭ بولاشاعىمىز. ءبىزدىڭ الەمدەگى بارشا قازاق جاستارىنىڭ ساپالى ءبىلىم الۋىنا ءتيىستى جاعداي جاساۋىمىز قاجەت. قازاقستاندا ءبىز ونى جۇزەگە اسىرامىز. وسىعان بايلانىستى ءبىلىم جانە عىلىم مينيسترلىگىنە قانداستارىمىزعا بولىنەتىن گرانتتىق كۆوتانى ناقتىلاپ، جاستارمەن جۇيەلى جۇمىس جۇرگىزۋدى تاپسىرامىن» (دۇنيەجۇزى قازاقتارىنىڭ 4-قۇرىلتايى) دەگەن ءسوزىن قاپەرلەرىنە الماي وتىرعانى قىنجىلتادى.
ول از دەسەڭىز، «ءبىلىم تۋرالى» قازاقستان رەسپۋبليكاسىنىڭ زاڭىنىڭ 66-بابىندا «1. قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامداردىڭ قازاقستان رەسپۋبليكاسىندا ءبىلىم الۋعا قۇقىعى بار. 2. مەملەكەت شەت ەلدەگى قازاق دياسپوراسىنىڭ ءبىلىم الۋ قاجەتتىلىكتەرىن قاناعاتتاندىرۋعا جاردەمدەسەدى» دەپ اشىق جازىلعان.
ەندى سول جاستاردىڭ وقۋ مەرزىمىنە ۇلگەرىپ كەلۋ ءىشىن وقۋعا باراتىنىن ايتىپ، ءوتىنىش بىلدىرۋىنە، وعان ءسىم كونسۋلدىق دەپارتامەنتىنىڭ شەتەلدەگى وكىلدىكتەرى كومەكتەسۋىنە ابدەن بولادى عوي...
سوندىقتان، كەلەسى وتىرىستا بۇل ماسەلەلەر دە شەشىمىن تابادى دەپ سەنەمىز.
اۋىت مۇقيبەك
استانا
11.06.2015
