بۇگىن الماتىداعى شەت تىلدەر جانە ىسكەرلىك كارەرا ۋنيۆەرسيتەتىندە ەلباسى نۇرسۇلتان نازاربايەۆتىڭ  «قازاقستان-2050» ستراتەگياسى مەن «نۇرلى جول» جولداۋىن قولداۋعا ارنالعان حالىقارالىق سيمپوزيۋم باستالدى. حالىقارالىق وقۋ ورنىنىڭ ون جىلدىق مەرەيتويىمەن قاتار وتكىزىلىپ وتىرعان القالى باسقوسۋعا قازاقستان، تۇركيا، قىرعىزستان، رەسەي، ءۇندىستان،  كاتار، ۋكراينا، ت.ب. مەملەكەتتەردەن عالىمدار مەن لاۋازىمدى وكىلدەر شاقىرىلعان.  جيىننىڭ سالتاناتتى اشىلۋىندا شەت تىلدەر جانە ىسكەرلىك كارەرا ۋنيۆەرسيتەتىنىڭ رەكتورى، دوكتور، پروفەسسور سابري حيزمەتلي بايانداما جاساپ، وقۋ ورنىنىڭ ون جىلدا اسقان اسۋلارى جونىندە ەسەپ بەردى. تۇركيا رەسپۋبليكاسىنىڭ الماتىداعى  باس كونسۋلى سۋپحي اتان ەكى ەل اراسىنداعى ديپلوماتيالىق ىنتىماقتاستىقتىڭ دامۋ قارقىنى تۋرالى باياندادى. قازاقستان رەسپۋبليكاسى ۇلتىق عىلىم اكادەمياسىنىڭ پرەزيدەنتى، اكادەميك مۇرات جۇرىنوۆ قازاق-تۇرىك ۋنيۆەرسيتەتتەرىنىڭ قۇرىلۋ تاريحىنا توقتالا كەلە، قازاق حاندىعىنىڭ 550 جىلدىعىنا تۇسپا-تۇس كەلگەن شەت تىلدەر جانە ىسكەرلىك كارەرا ۋنيۆەرسيتەتىنىڭ مەرەيتويىنا وراي ۇيىمداستىرىلعان بۇل سيمپوزيۋم  تۇركى بىرلىگىن پاش ەتۋى كەرەكتىگىن اتاپ ءوتتى. مۇرات جۇرىنوۆ ۋنيۆەرسيتەت رەكتورى سابري حيزمەتليدى  ق ر ۇلتتىق عىلىم اكادەمياسىنىڭ قۇرمەت گراموتاسىمەن ماراپاتتادى.  بۇدان كەيىن، تيكا باسقارماسىنىڭ ءتوراعاسى سەردار چام، قازاقستان  عالىمدار وداعىنىڭ پرەزيدەنتى، اكادەميك ءورازالى سابدەن،  ق.ا.ياسساۋي حالىقارالىق ۋنيۆەرسيتەتىنىڭ ءتوراعاسى، دوكتور، پروفەسسور مۋسا يىلدىز ءسوز الىپ، قازاق-تۇرىك ىنتىماقتاستىعىنىڭ ءار قىرىنا توقتالدى. جيىننىڭ اشىلۋ سالتاناتىندا ماناس اتىنداعى ۋنيۆەرسيتەتتىڭ، اتاتۇرىك اتىنداعى ۋنيۆەرسيتەتتىڭ، حيتيت، كاستامونۋ، تۇران  ۋنيۆەرسيتەتتەرىنىڭ، كييەۆ ەكونوميكالىق ۋنيۆەرسيتەتىنىڭ، پامۋككالە ۋنيۆەرسيتەتىنىڭ، ت.جۇرگەنوۆ اتىنداعى ۇلتتىق ونەر اكادەمياسىنىڭ، قىرعىز ەكونوميكالىق ۋنيۆەرسيتەتىنىڭ، ستامبۇل ۋنيۆەرسيتەتىنىڭ،  قازان ەكونوميكا جانە قۇقىق ۋنيۆەرسيتەتىنىڭ، دجيەۆەحارلال ۋنيۆەرسيتەتىنىڭ، باحاۆالپۋر ۋنيۆەرسيتەتىنىڭ رەكتورلارى بايانداما جاسادى. ءۇش كۇنگە سوزىلاتىن سيمپوزيۋم «الماتى: يسلام مادەنيەتى استاناسى»، «ورتا ازيا يسلام مادەنيەتى مەن وركەنيەتى»، «تۇركى حالىقتارىنىڭ ۇلتتىق جانە رۋحاني قۇندىلىقتارى»، «ورتا ازيا تۇركى ويشىلدارى، عۇلامالارى جانە مەملەكەت قايراتكەرلەرى»، «تۇركى دۇنيەسىنىڭ ءبىرتۇتاستىعى جانە ورتاق مادەنيەت سالاسىنداعى پروبلەمالارى»، «قازاقستان رەسپۋبليكاسى شەت تىلدەر جانە ىسكەرلىك كارەرا ۋنيۆەرسيتەتىنە 10 جىل»، «الماتىلىق تۇلعالار: مەملەكەت، قوعام، ونەر قايراتكەرلەرى» دەگەن سەكسيالار بويىنشا جۇرگىزىلۋدە.

سونداي-اق بۇگىن شەت تىلدەر جانە ىسكەرلىك كارەرا ۋنيۆەرسيتەتىنىڭ جاڭا عيماراتىنىڭ سالتاناتتى اشىلۋ ءراسىمى ءوتتى.  ديپلوماتيالىق مەكەمەلەردىڭ باسشىلارى مەن قالالىق اكىمدىك وكىلدەرى، تانىمال عالىمدار مەن وقىتۋشىلار قاتىسقان جيىندا ۋنيۆەرسيتەت دەكانى ۇلان ابدىكالىكوۆ 2015-2016 وقۋ جىلىندا  جوعارى بالل جيناعاندارعا 105 گرانت بولىنگەنىن اتاپ ايتتى. وعان قوسا بيىل كۇندىزگى بولىمگە تۇسكەندەرگە  تۇگەلدەي 10 % جەڭىلدىك بەرىلەدى. بۇل ۋنيۆەرسيتەتتە ستۋدەنتتەر از دەگەندە 3 شەت ءتىلىن مەڭگەرىپ شىعادى ەكەن. كەيبىر ماماندىقتار اعىلشىن تىلىندە وقىتىلادى. جاقسى وقىعان ستۋدەنتتەر  تۇركيا مەن قىتايداعى وقۋ ورىندارىندا گرانت نەگىزىندە ستيپەنديا الىپ، وقۋىن جالعاستىرادى. بارلىعى ون ءۇش ماماندىق بويىنشا ءبىلىم بەرەتىن ۋنيۆەرسيتەتتە ۇبت-دان 80-85 بالل العاندارعا  15% جەڭىلدىك،      86-90 بالل بولسا 20 % ، 90-99 بالل العاندارعا 25%،   100 بالل جانە ودان جوعارى بولسا 50% جەڭىلدىكتەر بەلگىلەنگەن. «التىن بەلگى» يەلەرى ءتورت جىل تەگىن وقىتىلادى. جەتىم بالالار، كوپ بالالى وتباسىنان شىققاندار مەن مۇگەدەكتەرگە ارنايى جەڭىلدىكتەر بەرىلگەن. اۋىلدان كەلگەن ستۋدەنتتەر ءۇشىن  ءۇش مەزگىل تاماقپەن قامتاماسىز ەتىلگەن  جاتاقحانا بار. ۋنيۆەرسيتەتتە قازاقستاندىق دوسەنت، پروفەسسورلارمەن بىرگە امەريكا، تۇركيا، جۇڭگو، اراب مەملكەتتەرىنەن كەلگەن وقىتۋشىلار جۇمىس ىستەيدى. ءورىسى جىلدان جىلعا كەڭەيىپ كەلە جاتقان حالىقارالىق وقۋ ورنىنىڭ دەكانى ۇلان ابدىكالىكوۆ  بيىل ۇبت تاپسىرا الماعان  جاستاردى «حالىقارالىق foundation» باعدارلاماسىنا قاتىسۋعا  شاقىردى. سالتاناتتى شارا بارىسىندا الماتىداعى شەت تىلدەر جانە ىسكەرلىك كارەرا ۋنيۆەرسيتەتىمەن ارىپتەستىك ورناتقان تۇركيانىڭ كاستامونۋ، پامۋككالە، ستامبۇل، ت.ب. شەت ەلدىك  جوو-نىڭ باسشىلارى ون جىلدىعىن تويلاپ وتىرعان اتالمىش وقۋ ورنىنىڭ ۇزدىك ستۋدەنتتەرىنە  تۇركيادا وقۋعا ارنالعان گرانتتاردى تاپسىردى. شارافات جىلقىبايەۆا