قاراعاندى وبلىسىندا سوت 15 جاستاعى ءۇش وقۋشىعا تاعايىنداعان جازاسىن جەڭىلدەتۋدەن باس تارتتى. ولاردىڭ ءار قايسىسى 10 جىل باس بوستاندىعىنان ايىرىلدى. ايىپتىلار 13 جاستاعى قىز بالانى سوققىعا جىعىپ، جىنىستىق قاتىناسقا ماجبۇرلەگەن جانە سول ءساتتى ۇيالى تەلەفوندارىنا ۆيدەوعا تۇسىرگەن.

وبلىستىق سوتتىڭ قىلمىستىق ىستەر بويىنشا اپەللياسيالىق كوللەگياسى وقۋشىلاردىڭ جازانى جەڭىلدەتۋ تۋرالى ارىزدارىن قاراستىرىپ، 10 جىلعا تەمىر تورعا توعىتۋ ءتيىستى جازا دەگەن توقتامعا كەلدى.

«كوللەگيا تاعايىندالعان جازا زاڭعا سايكەس ءارى نەگىزدەلگەن دەگەن توقتامعا كەلدى»، — دەپ مالىمدەدى اپەللياسيالىق ينستانسيا تورەشىسى سەرىك سپانوۆ.

وقۋشىلار ءوز ارىزدارىندا زارداپ شەگۋشىنىڭ كامەلەتكە تولماعانىن بىلمەگەنىن ايتىپ اقتالعان. الايدا، وبلىستىق سوت بۇل سوزدەرىن شىندىققا جاناسپايدى، ءارى قىلمىستىق جازادان قاشىپ قۇتىلۋ ءۇشىن ايتىلعان دەپ تانىدى.

«ايىپتىلاردىڭ اپەللياسيالىق ارىزدارىن سوت كەرى قايتاردى»، — دەپ ءتۇسىندىردى سەرىك سپانوۆ.

بەلگىلى بولعانداي، ايىپتىلار زارداپ شەگۋشىمەن بىرگە ونىڭ 13 جاسقا تولۋىن تويلاتىپ، جەتكىنشەكتىڭ جاسى نەشەدە ەكەنىن جاقسى بىلگەن.

ەسكە سالساق، 13 جاستاعى ولگا ناتاليا، تانيا جانە دميتريي ەسىمدى دوستارىنىڭ قۇربانىنا اينالعان بولاتىن. دوستارى ولگاعا ءجابىر كورسەتىپ، مازاققا الماق بولعان.

ولار ونى سوققىعا الىپ، دميترييمەن ورالدىق جىنىستىق قاتىناسقا تۇسۋگە ماجبۇرلەگەن. ءدميتريدى جەتكىنشەكتىڭ سوققىعا جىعىلىپ، جىلاپ تۇرعانى توقتاتپاعان. ولار جىنىستىق زورلىق كورسەتۋ ءساتىن تولىقتاي ۆيەدوعا ءتۇسىرىپ تۇرعان.

وزگە ەكى جەتكىنشەك ۆياچەسلاۆ پەن سلون لاقاپ اتىمەن بەلگىلى ولەگ بولعان جايتتىڭ كۋاگەرلەرى بولا تۇرا، قىز بالاعا ءجابىر كورسەتۋشىلەردى توقتاتۋدىڭ ورنىنا، باقىلاپ تۇرۋمەن بولعان.

ولگانى شارۋالارىن بىتىرگەن جەتكىنشەكتەر بواستىپ سالا بەرگەن. زارداپ شەگۋشى بولعان جايتتى ەشكىمگە ايتپاعان. كەلەسى كۇنى تانيا مەن ناتاشا ولگانىڭ ۇيىنە كەلىپ، تۇسىرگەن ۆيدەولارىن جاريا ەتەمىز دەپ اقشا بوپسالاعان. ولار 15 مىڭ تەڭگە بەرمەگەن جاعدايدا، ۆيدەونى بارلىق دوستارىنا، ينتەرنەتكە تاراتاتىندارىن ايتقان.

ولگا اقشام جوق دەپ جاۋاپ قايتارعاندا، وقۋشىلار ونىڭ قولىنداعى ۇيالى تەلەفونىن تارتىپ العان.

كوپ ۇزاماي بار جاعدايدى ءبىلىپ العان ولگانىڭ اناسى پوليسياعا حابار بەرەدى.

ءىىب قىزمەتكەرلەرى 4 كۇدىكتىنى قۇرىقتادى. ۆياچەسلاۆتان وزگەلەردىڭ بارىنە قىلمىستىق كودەكستىڭ 121 بابى بويىنشا كامەلەتكە تولماعان قىزعا سەكسۋالدى تۇرعىدا ءجابىر كورسەتۋ ايىبى جانە بوپسالاۋ ايىبى تاعىلدى. ال ۆياچەسلاۆقا قىلمىستى پوليسيادان جاسىرۋ ايىبى تاعىلدى.

قىلمىستىق ىستەر بويىنشا مامانداندىرىلعان اۋدانارالىق سوتتىڭ تورەشىسى تولەگەن تاڭسىقپايەۆ ءدميترييدى 10 جىل ورتاق رەجيمدەگى تاربيەلەۋ كولونياسىندا باس بوستاندىعىنان ايىرۋ جازاسىن تاعايىندادى. ورتا مەكتەپ وقۋشىلارى ناتاليا مەن تاتيانا دا 10 جىل تاربيەلەۋ كولونياسىندا جازاسىن وتەيتىن بولادى. قىلمىستى توقتاتۋعا ەش ارەكەتتەنبەي، باقىلاپ تۇرعان ۆياچەسلاۆ 1 جىل باس بوستاندىعىنان ايىرىلدى.

ۆياچەسلۆاتان وزگە بارلىق سوتتالۋشىلار وبلىستىق سوتقا اپەللياسيالىق ارىز تۇسىرگەن. ولار زارداپ شەگۋشىنىڭ كامەلەتكە تولماعانىن بىلمەگەندەرىن ايتىپ، جازاسىن جەڭىلدەتۋىن سۇراعانىمەن، شەشىم وزگەرىسسىز قالدىرىلدى.

زاڭ بويىنشا 14 جاسقا تولماعان جەتكىنشەكتەردى زورلاعاندارعا قاتاڭ جازا تاعايىندالادى.