قاراعاندى وبلىسىنىڭ ۇلىتاۋ اۋدانىندا مال جاپپاي قىرىلىپ جاتىر. بۇل جايىندا تۇرعىندار تەلەفون ارقىلى استانا ارناسىنا حابارلادى.

اسىرەسە، قاراكەڭگىر اۋىلىندا جاعداي ۋشىققان. مۇندا ءبىر اپتانىڭ ىشىندە 100 باستاي مال باسى ارام ولگەن.

«ول اۋرۋدىڭ قايدان كەلگەنىن بىلمەيمىز. اۋىزدارى ۋىلىپ، سۋ اعىپ، ءسۇت ءىرىپ جاتىر. قىرىلعان مال كوپ. قوي، سيىر، اسىرەسە، بۇزاۋلار قىرىلىپ جاتىر. اۋىلداعىلار، دارىگەرلەر كورگەنمەن، قانداي دياگنوز ەكەنىن ايتقان جوق»، — دەيدى ۇلىتاۋ اۋدانى، قاراكەڭگىر اۋىلىنىڭ تۇرعىنى زينا ايتبايەۆا.

تۇرعىندار بۇل جاعدايدىڭ اي باسىندا باستالعانىن ايتادى. دەرت مالداردىڭ بىرىنەن-بىرىنە جۇعىپ، قىرىلۋى جيىلەپ كەتكەن. وعان قوسا، اياقتارى ءىسىپ جۇرە الماي قالعان ءتورت تۇلىكتى، اۋىل حالقى ءقازىر قورادا، ءۇي ماڭىندا ۇستاپ وتىرۋعا ءماجبۇر.

ال، ولاردان الىنعان قان ساراپتاماسى استاناداعى ۆەتەريناريا جونىندەگى ۇلتتىق زەرتتەۋ ورتالىعىنا جىبەرىلگەن. دەگەنمەن، قاراعاندىلىق ماماندار جۋىقتا كيىكتەردىڭ جاپپاي قىرىلۋىنا سەبەپ بولعان پاستەرەللەز اۋرۋىنان دا كۇدىكتەنەدى. ازىرگە، قاراكەڭگىر اۋىلى مەن وسى ماڭداعى ەكى قىستاق مالدارىن وزگە اۋىلدان وقشاۋلاۋ شاراسى جاريالاندى.

«ءقازىر پاستەرەللەز، ميكروباكتەرياز، ليستەريوز، وسى ءۇش اۋرۋعا كۇدىك تۋىپ تۇر. الىنعان ماتەريالدار ءبارى استاناعا ۆەتەريناريالىق ۇلتتىق رەفەرەنتتىك ورتالىققا زەرتتەۋگە جىبەرىلدى. زەرتتەۋ ناتيجەسى بويىنشا انىقتالادى. ءقازىر اۋرۋدى تاراتپاۋ ءۇشىن جاڭاعى قاراكەڭگىر اۋىلىندا مالداردى ۋاقىتشا شەكتەۋ جاريالاندى»، — دەيدى قاراعاندى وبلىسى ۆەتەريناريا باسقارماسىنىڭ باستىعى قايىربەك تۇرسىنبەكوۆ.