كەزدەسۋگە دەيىن ۇلكەن ومىرگە العاش قادام باسىپ جاتىرعان تۇلەكتەر، ماڭعىستاۋ وبلىستىق تاريحي-ولكەتانۋ مۇراجايىنا بارىپ، ولكەمىزدىڭ اتاقتى ادامدارى تۋرالى ەستىپ، تۋعان جەردىڭ وتكەن باي تاريحىمەن تانىستى. سودان كەيىن كەشەگى وقۋشىلار ۇلى وتان سوعىسىنىڭ باتىرلارىنا قۇرمەت كورسەتىپ، «ماڭگىلىك الاۋ» ەسكەرتكىشىنە گۇل شوقتارىن قويدى. كەزدەسۋگە 46 «التىن بەلگى» يەگەرلەرى، 32 حالىقارالىق، رەسپۋبليكالىق وليمپيادالار مەن عىلىمي جارىستاردىڭ جەڭىمپازدارى قاتىستى. ءوڭىر باسشىسى اليك ايداربايەۆ ءوز بىلىمدەرىن دالەلدەپ شىققان تۇلەكتەرگە «التىن بەلگى» مەن ەستەلىك سىيلىقتار تابىستادى. - قۇرمەتتى بالالار، بىزدەر، ۇلكەندەر، سىزدەردىڭ جەتىستىكتەرىڭىزدى، سىزدەردى ماقتان تۇتامىز. ءار ادامنىڭ ارمانى بولادى، ءبىراق سول ارماننىڭ ورىندالۋى ءۇشىن سابىر مەن كۇشتى قايرات قاجەت. قاي جەردە بولساڭىز دا، قاي شىڭعا جەتە الماسىڭىز دا، ماڭعىستاۋ سىزدەردى سۇيەتىنىن جانە ءاردايىم كۇتەتىنىن ەستەن شىعارماعايسىزدار. ءبىزدىڭ وبلىس، ەلىمىز سياقتى تەز قارقىندا دامىپ كەلەدى. بىزگە جوعارى ءبىلىمدى، زامانعا ساي ويلانا الاتىن بىلىكتى ماماندار، ءوز ەلىنىڭ ناعىز پاتريوتتارى قاجەت. مەنىڭ ويىمشا، اتا-انا ءۇشىن جانە مۇعالىمدەر ءۇشىن ەڭ ۇلكەن العىس سىزدەردىڭ بولاشاقتاعى جەتىستىكتەرىڭىز. سىزدەردىڭ جەكە جەتىستىكتەرىڭىز ەلىمىزدىڭ تابىسىنىڭ نەگىزىن قۇرايدى» – دەدى ماڭعىستاۋ وبلىسىنىڭ اكىمى اليك ايداربايەۆ. ءوڭىر باسشىسىنىڭ باستاماسىمەن ايماعىمىزدا ءۇش ءتىلدى «ماڭعىستاۋدىڭ التىن جاستارى» اتتى كوپتومدى ەنسيكلوپەديا كىتابىن شىعارۋ جوسپارلانىپ وتىر. اليك ايداربايەۆ اتاپ وتكەندەي: «كىتاپتىڭ العاشقى تومىن بۇگىنگى سالتاناتتى راسىمگە قاتىسۋشىلار، 46 التىن بەلگى يەگەرلەرى مەن 32 حالىقارالىق، رەسپۋبليكالىق وليمپيادالار مەن عىلىمي جارىستاردىڭ جەڭىمپازدارى اشادى. كىتاپتىڭ ءبىرىنشى نۇسقاسى، ارينە، ءسوزسىز وبلىستىق ولكەتانۋ مۇراجايىنا تۇسەدى».