قازگيدرومەت وسى اپتادا ەلىمىزدىڭ 6 وبلىسىندا وتە كۇشتى اپتاپ ىستىق بولاتىندىعى جايلى شۇعىل ەسكەرتۋ تاراتقان بولاتىن. سينوپتيكتەردىڭ مالىمەتى بويىنشا 29 ماۋسىم - 1 شىلدە ارالىعىندا كۇندىز اتىراۋ وبلىسىندا +40+43 گرادۋس اپتاپ ىستىق ساقتالىپ، 30 ماۋسىم - 2 شىلدە ارالىعىندا كۇندىز ماڭعىستاۋ وبلىسىندا +40+45 گرادۋس اپتاپ ىستىق كۇتىلەتىنىن جانە 30 ماۋسىم - 2 شىلدەدە كۇندىز قىزىلوردا وبلىسىندا اپتاپ ىستىق +45 گرادۋسقا دەيىن كوتەرىلەتىن ەسكەرتكەن ەدى. سونداي-اق 30 ماۋسىم - 1 شىلدەدە كۇندىز اقتوبە، قاراعاندى، قوستاناي وبلىستارىندا كەي جەرلەردە +40 گرادۋسقا دەيىن اپتاپ ىستىق بولۋى ىقتيمال ەكەندىگىن ايتقان. الايدا سينوپتيكتەردىڭ بەلگىلەپ بەرگەن ۋاقىتى اياقتالعانىمەن، كۇن قايراتى قايتار ەمەس. ءتىپتى، ەلىمىزدەگى اپتاپ ىستىق ءبىرقاتار وبلىستاردى اۋرەگە سالعان.
اۋەلى، كۇننىڭ اپتاپ ىستىعىنان قىزىلوردا وبلىسى جاڭاقورعان اۋدانىندا ۇساق مال قىرىلۋدا. بۇل تۋرالى اۋداندىق اكىمشىلىكتىڭ باسپا ءسوز قىزمەتى مالىمدەدى. ماۋسىمنىڭ 24ء-ى مەن شىلدەنىڭ 3ء-ى ارالىعىندا اپتاپ ىستىقتان ءۇش بىردەي وتاردان 5000 مىڭعا جۋىق قوي قىرىلىپ قالعان. اۋا رايىنىڭ توسىن قۇبىلىسىنان اۋدانداعى «ىنتىماق»، «اقسەڭگىر» جانە «كوبەلدەس» شارۋا قوجالىقتارى قىرۋار شىعىنعا باتقان. قىرىلعان مالدىڭ 90 پايىزى جاڭا تۋعان تولدەر بولعان. وسى وقيعاعا بايلانىستى ارنايى كوميسسيا قۇرىلىپ، اۋداندىق ۆەتەرينارلىق باقىلاۋ كوميتەتى ماماندارى جايىلىم ءشوبى مەن سۋىنىڭ نۇسقالارىن جانە قىرىلىپ قالعان قويلاردىڭ قانىن تەكسەرگەن. ساراپتاما قورىتىندىسى 15 كۇننىڭ ىشىندە دايىن بولادى، دەيدى شارۋالار. ال اۋدان اكىمشىلىگىندەگىلەر بولسا، شوپاندارعا اۋا تەمپەراتۋراسىنىڭ كۇرت كوتەرىلۋىنە بايلانىستى مالدى كۇن قايتقاندا ورىسكە شىعارۋدى ۇسىنعان.
ال اتاراۋ وبلىسىندا ورال وزەنى تاسىعاننان كەيىن پايدا بولعان كولدەردە جاپپاي بالىقتار قىرىلۋدا. بۇل تۋرالى اتىراۋ وبلىستىق تابيعاتتى قورعاۋ جونىندەگى مامانداندىرىلعان پروكۋرورىنىڭ اعا كومەكشىسى ساپار تۇرسىنوۆ مالىمدەيدى. كولدەردەگى بالىقتىڭ جاپپاي قىرىۋىنىڭ باستى سەبەبى – اۋا تەمپەراتۋراسىنىڭ 40 گرادۋستان اسىپ جىعىلعاندىعى بولۋى مۇمكىن.
-اپتاپ ىستىقتان كولدەر تارتىلىپ، ونداعى اۋا تارىلعان. سالدارىنان بالىقتارعا اۋا جەتپەي، قىرىلىپ قالعان. ءدال قازىرگى ۋاقىتتا بالىقتاردىڭ جاپپاي قىرىلۋىنىڭ سەبەپتەرى انىقتالۋدا. ماماندار بالىق ولەكسەلەرى مەن سۋدىڭ قۇرامىن تەكسەرۋدە. ال ءقازىر كولدەردەگى قالعان بالىقتاردى اۋلاپ الىپ، ارنايى ورىندارعا جىبەرۋ جۇمىستارى جۇرگىزىلۋدە. بۇل كولدەگى بالىقتاردى ساقتاپ قالۋدىڭ جالعىز جولى،-دەيدى س.ءتۇرسىنوۆ.
كۇننىڭ كۇرت جىلىنۋى تەك قازاقستاندا عانا ەمەس، الەمنىڭ ءبىرقاتار مەملەكەتتەرىندە بايقالعان.
- جاپونيادا اپتاپ ىستىقتان زارداپ شەگۋشىلەر سانى ارتىپ، اۋرۋحاناعا تۇسكەندەر سانى 500-گە جۋىقتاعان. بۇعان دەيىن جاپونيادا اپتاپ ىستىقتان ەكى ادام كوز جۇمعان.
- ءۇندىستاندا مامىر ايىنان بەرى بەرى باسىلماعان اپتاپ ىستىقتان 1200 ادام قازا تاپقان. اسىرەسە، ەلدىڭ وڭتۇستىك-شىعىسىنداعى اندحرا-پرادەش جانە تەلانگا شتاتتارىنداعى حالىقتىڭ جاعدايى مۇشكىل. بۇل ولكەدە اۋا تەمپەراتۋراسى كۇندىز 48،8 گرادۋسقا دەيىن كوتەرىلگەن.
- پاكىستاندا اپتاپ ىستىقتان كوز جۇمعاندار سانى كۇن ساناپ ارتۋدا. بۇگىن بۇل كورسەتكىش 400-دەن استى. پاكىستاندا تەمپەراتۋرا باعانى سەلسيي شكالاسى بويىنشا 47 گرادۋسقا جەتكەن. نۇرزات توعجان
