بۇگىن، 6 شىلدەدە، قازاقستاندىقتار استانا كۇنىن اتاپ وتۋدە. بيىلعى جىلعى ەلوردانىڭ 17 جىلدىعىن مەرەكەلەۋدىڭ باستى تاقىرىپتارى مەرەيتويلىق اتاۋلى كۇندەر: قازاق حاندىعىنىڭ 550 جىلدىعى، قازاقستان حالقى اسسامبلەياسىنىڭ 20 جىلدىعى، ال ەلوردا كۇنىنىڭ باستى ۇرانى – «ەل جۇرەگى – استانا!». اتاپ وتەيىك، ەلوردا كۇنىن مەرەكەلەۋدى رەسمي تۇردە استانادا 4 شىلدە كۇنى «اتامەكەن» ەتنو-مەموريالدىق كەشەنى الاڭىندا پرەزيدەنت نۇرسۇلتان نازاربايەۆ باستاپ بەردى جانە وندا مەملەكەتتىك تۋدى كوتەرۋ سالتاناتىنا قاتىسىپ، كۋرسانتتارعا وفيسەر شەندەرىن تاپسىردى. مەرەكە اۋقىمىندا استانادا 6 شىلدەدە كونسەرتتەر، مادەني-بۇقارالىق شارالار، فەستيۆالدار وتەدى. استانا كۇنى ءداستۇرلى تۇردە مەرەكەلىك وتشاشۋمەن اياقتالادى، ونى قالانىڭ بىرنەشە جەرىنەن – ەسىل وزەنىنىڭ جاعاسىنان، «حان شاتىر» ساۋدا ويىن-ساۋىق ورتالىعى جانىنان جانە ابىلاي حان داڭعىلى مەن پۋشكين كوشەسىنىڭ قيىلىسىنداعى گۇلزاردان كورۋگە بولادى. سونداي-اق استانا كۇنىنە ارنالعان مەرەكەلىك شارالار قازاقستاننىڭ بارلىق ايماقتارىندا وتەدى. ەسكە سالا كەتەيىك، ەلوردانى الماتىدان اقمولاعا كوشىرۋ تۋرالى شەشىمدى 1994 جىلعى 6 شىلدەدە قازاقستان رەسپۋبليكاسى جوعارعى كەڭەسى قابىلداعان بولاتىن. ەلوردانى رەسمي كوشىرۋ 1997 جىلعى 10 جەلتوقساندا بولدى. ق ر پرەزيدەنتىنىڭ 1998 جىلعى 6 مامىرداعى جارلىعىمەن اقمولا اتاۋى استانا بولىپ وزگەرتىلدى. جاڭا استانانىڭ حالىقارالىق تۇساۋكەسەرى 1998 جىلعى 10 ماۋسىمدا ءوتتى. ەلوردا كۇنى 6 شىلدەدە اتاپ وتىلەدى جانە ق ر پارلامەنتى ءماجىلىسىنىڭ باستاماسىمەن «قازاقستان رەسپۋبليكاسىنداعى مەرەكەلەر تۋرالى» قازاقستان رەسپۋبليكاسىنىڭ زاڭىنا تولىقتىرۋلار ەنگىزۋ تۋرالى» 2008 جىلعى 25 ماۋسىمداعى قازاقستان رەسپۋبليكاسىنىڭ № 47-IV زاڭىمەن بەلگىلەنگەن مەملەكەتتىك مەرەكە بولىپ تابىلادى. بۇل مەرەكەنىڭ حالىق ءۇشىن تاريحي-مادەني ماڭىزى زور جانە قازاقستان رەسپۋبليكاسىنىڭ جەتىستىكتەرىن بەينەلەيدى. مەملەكەتتىك دەڭگەيدە استانا كۇنى 2009 جىلدان بەرى اتالىپ وتىلۋدە.

يا "كازينفورم"