1955 جىلدىڭ 16 ماۋسىمىندا ءۇندىستان پرەمەر-مينيسترى دجاۆاحارلال نەرۋ مەن قىزى ينديرا گاندي الماتىعا ارنايى ىس-ساپارمەن كەلىپ، سول كەزدەگى قازاقستاننىڭ ءبىرىنشى باسشىسى دىنمۇحاممەد قونايەۆپەن كەزدەستى. وداقتىڭ ورتالىعى ماسكەۋ بولعان كەزدە نەرۋدىڭ الماتىعا كەلۋى اسا ۇلكەن وقيعا سانالدى. ءۇندىستان پرەمەر-مينيسترىن الماتى حالقى زور قوشەمەتپەن قارسى العان ەدى.  ءۇندىستان دەلەگاسياسى الماتى اۋەجايىنا تۇسكەن ساتتە ۇلتتىق ءانۇران ورىندالدى.  ودان كەيىن دجاۆاحارلال نەرۋ قازاقستاندىق بۇقارالىق اقپارات قۇرالدارىنىڭ وكىلدەرى مەن جوعارعى لاۋازىمدى شەنەۋنىكتەر الدىندا ۇندەۋ جاسادى.

 نەرۋمەن كەزدەسۋگە عابيت مۇسىرەپوۆ، مۇحتار اۋەزوۆ سياقتى جازۋشىلار، قانىش ساتپايەۆ سىندى عالىمدار، داڭقتى ارتىستەر مەن مەكتەپ وقۋشىلارى قاتىتسى. سول ساتتەگى ينديرا گاندي مەن قازاق بۇلدىرشىندەرىنىڭ تۇسكەن فوتوسۋرەتتەرى مەن باسقا دا تاريحي قۇجاتتار ءۇندىستان مەن قازاقستاننىڭ مەملەكەتتىك مۇراعاتتارىندا ءالى كۇنگە ساقتاۋلى. ءبىر فوتوسۋرەتتە قونايەۆ پەن نەرۋ مىنگەن ءۇستى اشىق اۆتوكولىك قالا كوشەلەرىمەن كەتىپ بارا جاتسا، ەندى بىرىندە ەكى ەل باسشىلارى الماتى تۇرعىندارىنىڭ ورتاسىنان كورىنەدى.

الپىس جىل بۇرىن ازياداعى تاۋەلسىزدىگىن العان ەلدەر اراسىندا ىنتىماقتاستىق يدەياسى تۇراقتى تۇردە قالىپتاسا باستادى. 1954 جىلى ءۇندىستان مەن قىتايدىڭ ۇسىنعان  «پانچ شيل» (بەيبىت ءومىر ءسۇرۋ) قاعيدالارى، 1955 جىلى تاريحي باندۋنگ كونفەرەنسياسى جانە ازيادا كونسترۋكتيۆتى ىنتىماقتاستىق جۇيەسىن قۇرۋدى ودان ءارى جالعاستىرۋ سياقتى ماسەلەلەر ازياداعى تاۋەلسىز ەلدەر اراسىنداعى ىنتىماقتاستىق يدەياسىنا ۇيىتقى بولدى. «سۋىق سوعىس» اياقتالىسىمەن، ازيا قۇرلىعىنداعى ىنتىماقتاستىق پەن سەنىم شارالارى جۇيەسىن جۇزەگە اسىرۋ جونىندەگى باستاما ازياداعى ىنتىماقتاستىقتى نىعايتۋعا ءوز سەپتىگىن تيگىزدى.

ازيادا ءوزارا ءىس-قيمىل جانە سەنىم شارالارى ءماجىلىسىنىڭ نەگىزىن قالاۋشىلاردىڭ اراسىندا  ءۇندىستان مەن قازاقستان دا بار. 1999 جىلى  ازيادا ءوزارا ءىس-قيمىل  جانە سەنىم شارالارى ۇيىمىنا مۇشە ەلدەر سىرتقى ىستەر مينيسترلەرىنىڭ قالىپتاستىرعان قاعيدالارى 1954 جىلى قابىلدانعان «پانچ شيل» قاعيدالارىمەن بارابار كەلەتىنىن اتاپ ءوتۋ كەرەك.

2005 جىلى قازاقستان پوشتاسى ءۇندىستان پرەمەر-مينيسترى دجاۆاحارلال نەرۋ مەن قىزى ينديرا گانديدىڭ الماتىعا كەلگەنىنە 50 جىل  تولۋىنا وراي ارنايى پوشتا ءمورىن باسىپ شىعارعان بولاتىن.

شارافات جىلقىبايەۆا

(دەرەكتەردى ۇسىنعانى ءۇشىن قازاقستانداعى ءۇندىستان ەلشىلىگىنە العىسىمىزدى بىلدىرەمىز)