تىرشىلىك تۇنەگىن سەرپەر ءۇن
اقىرەت اۋەنىن تاراتتى.
كۇرسىنە كوز اشىپ كوركەم مۇڭ،
مەككەنىڭ مۇباراك تاڭى اتتى...
ماڭگىلىك سازىنا مۇلگيدى
جالعاننىڭ ءجانناتىن جيعان جەر.
...سەزىمسىز سۇلدەلەر سىرعيدى،
جاراتقان، بۇل ەلگە يمان بەر!
4.11.2011.
* * *
ۋا، پايعامبار!
جاپپار يەم قويعانىمەن كەشىرىپ،
مەن وزىمە نازالىمىن، وسىنى ۇق!
كوڭىلىنە قاعبا ورناتقان ۇمبەتىڭ
كەتە المادى ءقابىرىڭدى كوشىرىپ...
سەنىڭ نۇرلى ءىزىڭ قالعان ءوڭىردى
قيىپ كەتەر كەشەم قالاي كوڭىلدى؟
قيامەتتە كورىسكەنشە كۇڭىرەنىپ،
سۇرەم قالاي سەنەن قالعان ءومىردى؟!
شەرمەندەمىن شاراسىزدان قايراڭدار،
كەلتە نىعمەت ءناسىپ بولسا، نە ايلام بار؟!
ەرتەگىسى ەرتە ۇزىلگەن شەر كوڭىل
ۇمبەتىڭدى ۇمىتپاشى، پايعامبار!!!
11.11.2011.
* * *
پەرزەنتىمىن مەن دە وزىڭدەي مۇڭلى ەلدىڭ،
قازاقى مۇڭ – قانىمداعى ءبىر بەلگىم.
سار دالادا ساعىنىشپەن سەلبەسىپ،
مەن ءومىردى سەنى اڭساۋمەن سۇرگەنمىن...
قايعىلىعا جالعان بولسىن قايدان جار،
جان شىداماس جازالى ەتكەن جايدى اڭعار:
كورگەنىمشە ءبىر مۇڭ ەدىڭ كوڭىلىمدە،
كورگەننەن سوڭ مىڭ مۇڭ بولدىڭ، پايعامبار!
بولمىسىڭا ب ا ق بۇيىرعان بيىكتەن،
جاندى تۇگىل، جاراتقانعا سۇيىكتى ەڭ.
اقىرەتتى ارمان ەتەم مەن ەندى
قۇتقارار دەپ ساعىنىشتاي كۇيىكتەن...
13.11.2011.
* * *
نۇر قۇشقان جۇرتتىڭ نىعمەتى حاقتان ەن تەگىن،
وسىنشا باقتى كوتەرگەن قالاي جەر تەگى:
جاناردا جاسى، ساجدەگە باسى ءيىلىپ،
كۇن سۇيگەن كوكتەن پايعامبار ەلى – ەرتەگى...
ءالىمساق كۇننەن اقىرعا جەتەر ءارمان-ان
كۇيرەيدى كەيدە كۇدىكتەن كوڭىل قارماعان.
...كۇرسىنىپ ءجيى قول جايام كوككە بەيۋاقتا،
ازاندى ەلدىڭ اقىرىن تىلەپ اللادان...
11.11.2011.
* * *
بۇل نەتكەن جەر، نەتكەن جەر؟
قۋارعان تىنگە قۇت دارىپ،
ءتاڭىرىم نۇرىن توككەن جەر.
توزاقتان ءتىرى قۇتقارىپ،
پايعامبار كەلىپ جەتكەن جەر.
مۇڭسىزدىڭ كوگى بۇلتتانىپ،
مۇڭلىقتىڭ جاسى كەپكەن جەر،
ءدىندى دە ءدىنسىز سۇقتانىپ،
ارمان عىپ ماڭگى وتكەن جەر.
بۇل نەتكەن ەل، نەتكەن ەل؟
قۇدايدىڭ ءوزى قيعانىن
قيىسپاي قۇلدار كەتكەن ەل.
جالعاننان اسىپ جيعانى،
بارلىقتىڭ زارىن شەككەن ەل.
تارك ەتىپ تاعدىر ءسىي-دامىن،
باقىتتى باسقا تەپكەن ەل،
شايقالىپ بارىپ يمانى
تاريحىن تالقان ەتكەن ەل...
11.11.2011.
* * *
كۇرسىندى كوزتانىس كورەسىم،
تۇگەسىپ شاقتاۋلى شاتتىعىن.
جۇتاتىپ جۇماقتىڭ ەلەسىن،
بەيۋاقتا بۇلتتانىپ باتتى كۇن...
جاۋتاڭداپ جاز-عۇمىر قالدى ءۇمىت،
قۇرسانا قارسى الدى تاعى قىس.
جاراتقان جار ەتكەن ماڭگىلىك
جانىمنىڭ جازاسى – ساعىنىش...
11.11.2011.
* * *
...بوزمۇنار كوشكەن دالادا
بۇلىڭ دا بۇلىڭ بەل جاتىر.
ساعىنىش ەسكەن سانادا
ساقتارسىڭ نەنى، سەن عاپىل؟!
جالعاندى ويلاپ جۇدەسەڭ،
جازمىشتان جالعىز جانعا ۇكىم:
جەرۋاني باقىت تىلەسەڭ –
جەر بەتى بولار ءجانناتىڭ.
«تىلەگىم – ديدار تەك» دەسەڭ،
جاقسىلىق كۇتپە جەردە كوپ.
سەرتىنە رۋحتىڭ جەتپەسەڭ،
سۇيسىنەر عۇمىر سەندە جوق!
ءپاني مەن باقي اراسىن
پەيىلمەن پەندە جالعاعان.
ءناپسى مە، رۋح پا الاسىڭ –
ەكىنىڭ ءبىرىن تاڭدا، ادام!
پەيىشتەن قالعان اداسىپ
پەرىشتە داۋرەن كوشكەن كۇن،
كۇناھار ادام بالاسى،
كۇناسىز جەرگە قوش كەلدىڭ!!!
13.11.2011.
* * *
تامۇقتا ءتىرى تۇنشىعىپ،
جەر باسىپ ءجۇرۋ – قۇلشىلىق.
تۇسىڭە تاعدىر ەنەدى
ۇشپاققا رۋحىڭ ۇمسىنىپ.
سەبەزگى ساۋلە توگەدى
كوڭىلىڭنەن سوندا كۇن شىعىپ.
جارق ەتىپ، قايتا سونەدى
جالعاننان جانى تۇرشىگىپ.
باقىتتىڭ تاپپاي دەرەگىن،
كوشەدى كۇندەر كۇرسىنىپ.
...كۇيىكپەن تولعان كەمەرى
توزاعىم مەنىڭ – تىرشىلىك...
15.11.2011.
* * *
كور باقىتقا ءبارىمىز دە بىردەيمىز،
جازمىش قانا جاندى ۇرلار.
قايتسە دۇرىس بولاتىنىن بىلمەيمىز،
سوندىقتان دا تاعدىر بار...
كوڭىل شىركىن كەمەلدىككە كەزەرگەن،
كۇي كەشسە دە نە ءتۇرلى.
ال ادامدىق تاڭدالمايدى ازەلدەن،
و دا تاعدىر سەكىلدى...
30.11.2011.
* * *
تاعدىرىم تاۋقىمەتتەي عالام كۇتكەن،
ارىلماي ازالايدى سانام جۇكتەن.
توزعانشا تەمىر تاعات تۇرالاتقان
ازاپتىڭ ارمانى جوق ماعان بىتكەن.
قالسا دا كەلتە عۇمىر قاس-قاعىمداي،
پەندەلىك پارىز كوشپەس باستان ۇداي:
وتەرمىن مۇڭ ارقالاپ، قايعى تەڭدەپ،
ءبىر تامشى اقىرەتكە جاس قالدىرماي...
30.11.2011.
* * *
تامىرىنان تاناتىن تۇس كەلگەندە،
تور ناپسىگە تۇتقىن بوپ تۇسكەن جەرگە،
جازا باسىپ، جاڭىلعىش جاراتىلعان
پەرىشتەدەن مەرەيى ۇستەم پەندە...
تاعدىر سىنى تاعى دا ساعاتسىز كەپ،
تالاۋراتقان تۇل جالعان تاعاتتى ۇزبەك.
...شىرقاي الماي رۋح قۇسى شىرقىرايدى،
ءالىمساقتا قىرقىلعان قاناتتى ىزدەپ...
30.11.2011.
* * *
حاۋا انانىڭ زارى
جازمىشقا تاڭار جۇماقى جاندى
سايابىر ەدى سۇراپىل الدى.
جاراتۋشىنىڭ جاسامپاز ءىسى
جاراتىلىسقا، ءسىرا، تۇمان-دى...
سيقىر بوپ تارتار سانالى جاندى،
سىرقۇمارلىقتىڭ الاۋى جاندى.
...ءتانىمنىڭ ەمەس، جەمىستە سول ءبىر
جانىمنىڭ، بالكىم، قالاۋى بار-دى.
بەلگىسىزدىكتىڭ دەرتى كۇشتى ەدى،
تاعدىر بوپ تاپتى تولقىن ىشتەگى.
ءجانناتتى جايلاپ، سەزىنبەي، سۇيمەي،
پەرىشتە بولۋ قورقىنىشتى ەدى...
اداسقان ساتتەن ايبىندى سەرتىم،
قىزىعىم ەمەس، ءقايعىم-دۇر ەركىم.
ارمان مەن اجال ارىلماس مۇڭ بوپ،
جۇماقتان جىلاپ ايرىلدىم سول كۇن...
بولمىستان بەرىك بار ما تىرەگىم؟!
ادامي عۇمىر – اردا تىلەگىم.
...جانداۋا جوقپەن جول تارتتىم جىراق،
جۇمىر جەر بولعاي ءجانناتىم مەنىڭ...
01.12.2011.
* * *
تىرشىلىكتەن ءتۇيىر ب ا ق تاپپاعان مۇڭ
جالعان-وتقا جانىمدى قاقتاعان مىڭ.
قورلىعىنا قيا الماي قۇل-عۇمىردىڭ،
عازيز جاندى عارىشقا ساقتاعانمىن.
جارالىستا جازعان دەرت – جەر-تىرلىكتىڭ
بوساعاسىن بولجاۋسىز اتتاعانمىن.
ادام ۇلىن ارمانمەن ازاپتاعان
ار الدىندا اجالمەن اقتالارمىن.
اقىرەتتەن ءبىر حابار جەتكەن كۇنى
جالقى ساتكە شىن كۇلىپ، شاتتانارمىن.
كۇناھارلىق قۇرساۋىن كۇل-تالقان عىپ،
اي مەن كۇننىڭ ەلىنە اتتانارمىن...
* * *
قۇل-عۇمىردى قيماعانمەن كۇمانگە،
بولمىسىڭا ب ا ق قونباسا، كىناڭ نە؟
...ءالىمساقتا اراشاعا باتپاعان
جازمىش ەندى جۇباتا الماي مىڭ اۋرە...
بوزداي كوشىپ بەيباق داۋرەن باستاعى،
تاعدىر كەشتىم توزاتىنداي تاس-داعى.
...ماڭداي تۇستان مىزعىمايدى ايتەۋىر
جالقى جۇلدىز...
استانانىڭ اسپانى...
* * *
ءنار تاتىرساڭ نىعمەتتەن نەڭ كەتەر-دى،
قۇر بەسىكتى، قور جالعان، تەربەت ەندى –
ءالىمساقتا انتتاسقان اسىل رۋحتار
ءبىرى قالماي تاستاپتى جەر-مەكەندى...
ۇجدانسىزدان ۇمىتقان ۇلىعىن شىن
تامىرى جوق تەكسىزدىڭ تۇعىرىسىڭ.
ىبىلىسكە ءىلدىرىپ ار تىزگىنىن
سال-سال بولعان ساناڭنىڭ سۇرى قۇرسىن...
* * *
نىعمەتتىڭ نۇرىنا مالىنىپ،
جەتى كوك جاۋھارىن جيا كەپ،
ادامزات تەرىسىن جامىلىپ
كۇن كەشۋ نە دەگەن قيامەت!!!
تۇل قالۋ تاعدىرىن تۇعىردان
جات جەرلىك جوقتاۋسىز جان ۇقسىن.
...توزاقتىڭ وتىنا جىلىنعان
سور جالعان، سەن دە ءبىر ءعارىپسىڭ...
* * *
شۋاق قيماي سەزىمگە، شابىتقا – جىر،
تاڭارىڭ حاق تۇبىندە تابىتقا ءبىر.
مەن ولسەم دە سەنەن ءسال بيىك تۇرام،
جاسىپ كورگەن جەرىم جوق، جانىقپا قۇر!
ءاز جالعاننىڭ ازەلدەن ەسى دەل-سال:
كولەڭكەسىز كۇندەرىم كەشىگەر ءسال.
...ءجيى ەنەسىڭ تۇسىمە نەسىنە، اجال،
مەنىڭ ءالى كول-كوسىر نەسىبەم بار...
* * *
جالعان جولى جۋىستىرماي جۇماققا،
مىڭدار كوشكەن مۇڭ ورناعان مۇنارتتا.
كۇرسىنىسىڭ كوكتى جارىپ، ءاز الەم،
جۇرەگىڭە جۇك ارتپا!!!
حاديس بار-دى: «ءبىر كۇننەن ءبىر كۇن بەتەر»،
جازمىش – جالعىز، بۇيىرماپ ەد كىمگە كور؟!
سۇلەيمەننىڭ جۇزىگىندە جازعانداي:
«ءبارى وتەدى... بۇل دا وتەر!!!»
* * *
جادىلاپ ەستى جىر-ەلەس،
كۇدىكپەن كوشىپ كۇن-ەگەس،
باعدارسىز كەتىپ باراسىڭ،
باقىتتىڭ جولى بۇل ەمەس!
جالعاننان كۇتپە جانداۋا!!!
ءپانيدىڭ پاقىر قوناعى –
جەرباۋىر سەزىم سولادى.
ادامعا ادام ماڭگىلىك
اڭسار بوپ كورگەن جوق ءالى!
ءوزىڭدى-وزىڭ الداما!!!
ەنشىنىڭ بىتكەن ەرەگى
كەمەلدىك بولسا كەرەگىڭ،
مىڭ سوقپاق كەزىپ، ماڭىپ كور –
دۇنيەنىڭ شىقپاس دەرەگى،
باستايدى ءبارى اللاعا!!!
* * *
بوساعاڭا بايلانىپ بار عۇمىرىم،
جادىلاپ ەد بەيداۋا جاندى نۇرىڭ.
قايتار جولدىڭ قورلىعىن قالاي قيدىڭ،
مەنى وزىڭنەن بولگەندە، ماڭگىلىگىم؟!
قۇل-تاعدىرعا قالاۋسىز قوسقاندا مۇڭ
جازمىشىڭنان جانى ۇركىپ، قاشقان باعىم.
جارسىزدىق پەن جولسىزدىق ماعان ايان
سەنەن كەتكەن كۇنىمنەن باستالعانى...
قۇدىرەتتەن دارىعان قۇتىم بارىن
تانىپ تۇرىپ، جالعانعا جۇتىلعامىن.
...مەن – مۇڭلىقپىن بايانسىز بولمىسىمنان،
ءۇزىرىم سول، ەي، مۇڭسىز ۇكىمدارىم!
* * *
ساۋدايى تاعدىر سىناقتا
سانسىراپ كەشەر جەرلىكپىن.
جامالىڭ سىڭگەن مۇنارتقا
تال بەسىگىمدە تەلمىرتتىڭ،
سارىلتقان سيقىر ساعىم-جار...
ەرەندەر ەلتىپ ىزىڭدە
تابا الماي سىردى سورلاعان.
ءپانيدىڭ پاقىر جۇزىندە
پەرىشتە-پەندە بولماعان –
ءپارۋانا سۇرلى ءحالىم دال...
كۇرمەۋىن مۇڭنىڭ شەشە الماي
قور بولىپ وتكەن قۇلىڭمىن.
جەرۋاني تىرلىك كەشە الماي،
جەر بولىپ كەتكەن عۇمىرمىن...
جازاڭا لايىق جانىم بار...
* * *
مەن قاتالدىق كۇتپەپ ەدىم تەك سەنەن...
ءوزىڭ ءسۇيىپ جاراتىپ ەڭ،
جاردان كوڭىلىڭ قالدى ما؟!
تالىپ تۇرىپ، تىلەۋىمدى كەسپەپ ەم –
توز-توز بولعان تاعاتىممەن
جىعىلعانمىن الدىڭا...
مۇز-كوڭىلمەن سىنا قاعىپ سەنىمگە،
اڭسارىما جەر قۇشتىرىپ،
ارمانىمدى الداتتىڭ.
ساعان سەنىپ كەلگەن ەدىم ومىرگە،
جار-سەزىمدى جەلگە ۇشىرىپ،
ەندى قايدا بارماقپىن؟!
* * *
تۋرا كەلگەن تاعدىرىما تاۋەكەل:
سەن تۇرعاندا جاندى قالاي جار ەتەم؟!
سۇرىنسەم دە، تۇڭىلسەم دە (و، توبا!) –
سەنىڭ مەنى سۇيەتىنىڭ حاق ەكەن!!!
قۇلشىلىقتىڭ كىم باعالار قۇنىن ءدال،
ۇعار بولساڭ، ۇعىنىپ كور سىرىمدى ال:
الەم حالقى قىزىعاتىن باعىم بار!!!
الەم حالقى تورىعاتىن مۇڭىم بار...
* * *
ب ا ق پەنەن سورى كىندىكتەس
بۇيىرعان جولىم بۇلعاق بوپ،
تاعدىردى تاپتىم تاڭداماي.
ايتىلعان سايىن سىر بىتپەس،
اشىلعان سايىن جۇمباق كوپ،
ارىلماي ءوتتىم، ارمان-اي...
عازالىن ۇقپاي عالامنىڭ
تاعاتسىز كۇتكەن ءتاڭسارىم،
كۇرمەلگەن ساعان كۇلكىم – مۇڭ.
سورىما بىتكەن سانامنىڭ
اسقىنىپ تىنعان اڭسارى،
اجالى سەنەن رۋحىمنىڭ...
اينۇر ءابدىراسىل قىزى
